10-May-2023

ଖରାଦିନେ ଜନସାଧାରଣଙ୍କୁ ପିଇବା ପାଣି ଯୋଗାଇ ଦେବା ନିମନ୍ତେ ସରକାର କୋଟି କୋଟି ଟଙ୍କା ଖର୍ଚ୍ଚ କରୁଥିବା ବେଳେ ସରପଞ୍ଚ ଓ ପିଇଓ ମାନେ ମିଶି ଶୋଷଣ କରୁଥିବା ଦେଖିବାକୁ ମିଳୁଛି। ବାଟୋଇ ପାଇଁ ଜଳଛତ୍ର ର ସୁବିଧା କରି ପାଣି ଯୋଗାଇ ଦେଉଥିବା ବେଳେ ପାଣି ଦେଉଥିବା ବ୍ୟକ୍ତିଙ୍କ ପାଇଁ ଆସୁଥିବା ଟଙ୍କାକୁ ଲୁଣ୍ଠନ କରୁଛନ୍ତି ପିଇଓ ଆଉ ସରପଞ୍ଚ ।ଟେଙ୍କର ଜରିଆରେ ଘର ଘର ପାଣି ଯୋଗାଇ ଦିଆଯାଉ ଥିବା ବ୍ୟକ୍ତିଙ୍କ ପାଉଣାକୁ ମଧ୍ୟ ହଡ଼ପ କରୁଛନ୍ତି ପିଇଓ ଓ ସରପଞ୍ଚ। ଏପରି ଏକ ଘଟଣା ଲୋକାଲୋଚନକୁ ଆସିଛି ପାଟଣାଗଡ଼ ବ୍ଳକରେ। ସୂଚନା ଅନୁସାରେ ପାଟଣାଗଡ଼ ବ୍ଳକ ଭଇଁଷା ଗ୍ରାମପଞ୍ଚାୟତରେ ଗତବର୍ଷ ପାଣି ଯୋଗାଇ ପାଇଁ ଟେଙ୍କର ର ସୁବିଧା କରାଯାଇଥିବାବେଳେ ଉକ୍ତ ଗ୍ରାମର ଟ୍ରାକ୍ଟର ବ୍ୟବହୃତ ହୋଇଥିଲା।ପାଣି ଦେବାର ଏକ ବର୍ଷ ପୁରିଯାଇଥିଲେ ସୁଦ୍ଧା ଆଜି ପର୍ଯ୍ୟନ୍ତ ଟ୍ରାକ୍ଟର ମାଲିକଙ୍କ ପ୍ରାପ୍ୟ ଟଙ୍କା ନ ମିଳିବାରୁ ସେ ଉତ୍କ୍ଷିପ୍ତ ହୋଇ ବର୍ତ୍ତମାନ କାର୍ଯ୍ୟରତ ଥିବା ପିଇଓ ଦୁଃଖିତ ବାଗ କୁ ପଞ୍ଚାୟତ କାର୍ଯ୍ୟାଳୟ ଭିତରେ ତାଳା ମାରିଦେଇଥିଲେ ।ସେ ଘଟଣା ସମ୍ପର୍କରେ ପାଟଣାଗଡ଼ ବିଡ଼ିଓ ସୁମନ୍ତ କୁମ୍ଭାରଙ୍କୁ ଜଣାଇବା ପରେ ଘଟଣାସ୍ଥଳକୁ କନିଷ୍ଠ ଯନ୍ତ୍ରୀଙ୍କୁ ପଠାଇ ଥିଲେ ଓ ବୁଝାସୁଝା କରି ବ୍ଳକ କୁ ଆଣି ଟଙ୍କା ଦେଇଥିବା ଜଣାପଡିଛି।ଏ ବିଷୟରେ ଆମେ ପାଟଣାଗଡ଼ ଗୋଷ୍ଠୀ ଉନ୍ନୟନ ଅଧିକାରୀ ସୁମନ୍ତ କୁମ୍ଭାରଙ୍କୁ ପଚାରିବାରୁ ସେ କହିଲେ କି ଫଣ୍ଡ ରେ ଦୁଇ ଲକ୍ଷ ଟଙ୍କା ବଜେଟ ପାସ୍ କରାଯାଇଛି ସେମାନେ ଅଧିକ ମାତ୍ରାରେ ପାଣି ଦେଇଥିବା ହେତୁ ଅଧା ଟଙ୍କା ଦିଆଯାଇନାହିଁ ଏବେ ଫଣ୍ଡ ରେ ଟଙ୍କା ଅଛି ଦିଆଯିବ। ଏଠାରେ ପ୍ରଶ୍ନ ଉଠୁଛି ଯେ କାହା ସ୍ବାର୍ଥରେ ଅତ୍ୟଧିକ ମାତ୍ରାରେ ପାଣି ବଣ୍ଟନ କରାଯାଇଥିଲା। କେଉଁଠି କେତେ ପରିମାଣରେ ଜଳଯୋଗାଣ ବ୍ୟବସ୍ଥା ରହିଛି ଜିପିଇଓ ତଦନ୍ତ କରୁନାହାନ୍ତି କାହିଁକି ? ପାଟଣାଗଡ଼ ବ୍ଳକ ର କେଉଁ ପଞ୍ଚାୟତ ରେ କେତୋଟି ଜଳଛତ୍ର ଖୋଲାଯାଇଛି ତାର ହିସାବ ଜିପିଇଓ ପାଖରେ ଅଛି ତ; ନାଁ ଗତବର୍ଷ ଭଳି ଏବର୍ଷ ମଧ୍ୟ ସେହି ପରିସ୍ଥିତି ଉପୁଜିବ ।

(ପୂର୍ଣ୍ଣ ଶଶୀ ଶେଖର ରାଓ ଙ୍କ ରିପୋର୍ଟ )