24-Apr-2023

ଡୁଙ୍ଗୁରିପାଲି/ଏସ୍‌.ରାମପୁର(ଅରବିନ୍ଦ ମିଶ୍ର)-  ଭାଗିଟିକିରା ଗ୍ରାମରେ ଆଜି ଅକ୍ଷୟ ତୃତୀୟା ଦିବସ ଅବସରରେ କୃଷକ ଦିବସ ପାଳିତ ହୋଇଯାଇଛି । କୃଷକ ପରାମର୍ଶଦାତା କମିଟିର ଅଧ୍ୟକ୍ଷ ପ୍ରଶାନ୍ତ କୁମାର ପଧାନଙ୍କ ସଭାପତିତ୍ୱରେ ଅନୁଷ୍ଠିତ କୃଷକ ସଚେନତା ସଭାରେ ମୁଖ୍ୟ ଅତିଥି ଭାବେ କୃଷି ଜିଲ୍ଲା ଅଧିକାରୀ ଦିଲ ରଞ୍ଜନ ମହାଲିକ, ସମ୍ମାନିତ ଅତିଥି ଭାବେ ବାଙ୍କିପାଲି ସରପଞ୍ଚ ଲକ୍ଷ୍ମୀ ପାଣ୍ଡେ, ମୁଖ୍ୟ ବକ୍ତା ଭାବେ ଶସ୍ୟ ସଂରକ୍ଷଣ ସହାକରୀ ସୁଦାମ ଚରଣ ଦିଶ୍ରୀ ଯୋଗ ଦେଇ ଚାଷୀମାନଙ୍କୁ ଅକ୍ଷୟ ତୃତୀୟା ଦିବସର ମହତ୍ୱ ଏବଂ ଖରିଫ ଚାଷ ଋତୁର ପାଇଁ ଆଗୁଆ ପ୍ରସ୍ତୁତି ଉପରେ ଆଲୋକପାତ କରିଥିଲୋ କୃଷି ଅଧିଦର୍ଶକ ଗୋବିନ୍ଦ ଚନ୍ଦ୍ର ତ୍ରିପାଠୀ ସ୍ୱାଗତ ଅଭିଭାଷଣ ଏବଂ ସଭା ସଂଯୋଜନା କରିଥିଲେ । ଗ୍ରାମ୍ୟ କୃଷି କର୍ମଚାରୀ ରଞ୍ଜନ  କୁମାର ସାହୁ ଧନ୍ୟବାଦ ଅର୍ପଣ କରିଥିଲେ । ସର୍ବ ପ୍ରଥମେ ମହିଳା ଚାଷୀ ତଥା ମହିଳା ଚାଷୀମାନେ ଏକ ଶୋଭାଯାତ୍ରାରେ ଭାଗିଟିକିରା ଗ୍ରାମର ଅଗ୍ରଣୀ ଚାଷୀ ଗୋବିନ୍ଦ ପଧାନଙ୍କ କ୍ଷେତରେ ଧରିତ୍ରୀ ମାତାଙ୍କ ପୂଜା ସହିତ ହଳ ଲଙ୍ଗଳ ପୂଜା କରିବା ପରେ ଅଖିମୁଠୀ ଅନୁକୂଳ କରାଯାଇଥିଲା ।  ଚାଷୀଙ୍କ ହଳିଆ ଗୀତ ଏବଂ  ମହିଳା  କୃଷକଙ୍କ ହୁଳହୁଳି ଧ୍ୱନୀରେ ପୂଜାସ୍ଥଳ ମୁଖରିତ ହୋଇ ଉଠିଥିଲା । ଏହି କାର୍ଯ୍ୟକ୍ରମରେ ଗ୍ରାମ କୃଷି କର୍ମଚାରୀ ଗୁରୁଦେବ ସା, ପ୍ରତାପ କୁମାର ଦୀପ,ସାମାଜିକ କର୍ମୀ ରମେଶ ପଧାନ ଏବଂ ଭାଗିଟିକିରା ଗ୍ରାମର ଚାଷୀ ଭାଇ ଭଉଣୀମାନେ ସକ୍ରୀୟ ସହ ଯୋଗ  କରିଥିଲେ ।