22-Apr-2023

ବଲାଙ୍ଗୀର(ପ୍ରେରଣା ଖବର)-ମଣିଷ ପଳାୟନପନ୍ଥୀ ଓ କାପୁରୁଷ ହେଲେ ଆତ୍ମହତ୍ୟା କରିଥାଏ । ମଣିଷ ଜନ୍ମ ଏକ ଦୁର୍ଲଭ ଜନ୍ମ । ଜୀବନକୁ ଜିଇଁବାକୁ ହେଲେ ସାହସୀ ଓ ସଂଘର୍ଷର ଆବଶ୍ୟକତା ରହିଛି । ଇଶ୍ୱର ସମସ୍ତଙ୍କୁ ସମାଜରେ କିଛି କରିବାକୁ ନିର୍ଦ୍ଧାରିତ ଦାୟୀତ୍ୱ ଦେଇଥାନ୍ତି । ତେଣୁ ଇଶ୍ୱର ଦେଇଥିବା ଦାୟୀତ୍ୱ ଆମକୁ ତୁଲାଇବାକୁ ପଡିବ । ସମସ୍ତଙ୍କ ଜୀବନରେ ଅନେକକିଛି ସମ୍ଭାବନା ରହିଥାଏ । ସେହି ସମ୍ଭାବନାକୁ ଆମକୁ ଖୋଜି ଜୀବନକୁ ଜିଇଁବାକୁ ପଡିବ । ଜୀବନରେ ଅନେକ ଉତ୍ଥାନ ପତନ ଆସିଥାଏ । ସଂଘର୍ଷ କରି ତାକୁ ସାମନା କରି ଜୀବନକୁ ଏକ ମଧୂମୟ ରୂପରେ ବଞ୍ଚିବାକୁ ହେବ । ଆତ୍ମହତ୍ୟା ଏକ ସାମାଜିକ ବ୍ୟାଧି । ଆଜି ଏହି ବ୍ୟାଧି ବଢିଚାଲିଛି । ମୁଖ୍ୟତଃ ଯୁବବର୍ଗରେ ଓ ଘରୋଇହିଂସା କାରଣରୁ ଏହା ବେଶିପରିମାଣରେ ବଢୁଛି । ତେଣୁ ଛାତ୍ରସମାଜ ସଚେତନ ହେବା,ଅବିଭାବକମାନେ ପିଲାଙ୍କ ସହିତ ଉତ୍ତମବୁଝାମଣା ରଖିବା ଓ ସର୍ବୋପରି ଧୈର୍ଯ୍ୟଶୀଳ ହେବାକୁ ପଡିବ ବୋଲି ଆଜି ସ୍ଥାନୀୟ ସାମ୍ବାଦିକ ଭବନଠାରେ ଜିଲ୍ଲା ସାମ୍ବାଦିକସଂଘ ଓ ମାହେଶ୍ୱରୀ ସାମାଜିକ ସଂଗଠନ ପକ୍ଷରୁ “ସୁଇସାଇଡ ଏଣ୍ଡ ଲାଇଫ” ଶୀର୍ଷକ ଆଲୋଚନାଚକ୍ରରେ ବକ୍ତାଗଣ ମତବ୍ୟକ୍ତ କରିଛନ୍ତି । ଜିଲ୍ଲା ସାମ୍ବାଦିକ ସଂଘର ସଭାପତି ଶିବପ୍ରସାଦ ପରିଡାଙ୍କ ସଭାପତିତ୍ୱ ଓ ମାହେଶ୍ୱରୀ ସଂଗଠନର ବିଷ୍ଣୁପ୍ରୀୟା ପାଣିଙ୍କ ସଂଯୋଜନାରେ ଅନୁଷ୍ଠିତ ଏହି ଆଲୋଚନାଚକ୍ରରେ ଆଲୋଚକଭାବରେ ବଲାଙ୍ଗୀର ଏସପି ନୀତିନ କୁସଲକର,ବଲାଙ୍ଗୀର ତହସିଲଦାର ଡ.ପୁଷ୍ପାଞ୍ଜଳି ପଣ୍ଡା,ବରିଷ୍ଠ ଆଇନଜୀବୀ ପ୍ରମୋଦ ମିଶ୍ର, ଓଟିଭିର ପଶ୍ଚିମଓଡିଶା ବ୍ୟୁରୋ ହେଡ୍ ସାମ୍ବାଦିକ ମନୋରଂଜନ ଯୋଷୀ ଓ ସମ ମଲ୍ଟି ସ୍ପେସାଲିଟି ହସପିଟାଲର କ୍ଲିନିକାଲ ସାଇକୋଲୋଜିଷ୍ଟ ସୁଶ୍ରୀ ଅଙ୍କିତା ପରିଚ୍ଛା ଯୋଗଦେଇଥିଲେ । ବଲାଙ୍ଗୀର ଏସପି ଶ୍ରୀ କୁସଲକର ଆତ୍ମହତ୍ୟା ଘଟଣାମାନ କେଉଁ ସବୁ କାରଣରୁ ଘଟୁଛି ସେନେଇ ବିଶଦଭାବରେ ବୁଝାଇବା ସହିତ ଏହାର ନିରାକରଣ ସମ୍ବନ୍ଧରେ କହିଥିଲେ । ତହସିଲଦାର ଡ.ପଣ୍ଡା କହିଥିଲେ ଯେ,ଜୀବନରେ ସଂଘର୍ଷ ବିନା ସଫଳତା ମିଳିନଥାଏ । ନିଜର ଦୁଃଖକୁ ଅନ୍ୟ ସହିତ ଆଲୋଚନା କରିବା ଆବଶ୍ୟକ । ଅନ୍ତତଃ ନିଜ ବାପାମାଆ କିମ୍ବା ଘନିଷ୍ଟ ବନ୍ଧୁସହିତ ସେୟାର କରିବା ଜରୁରୀ । କୌଣସି ବିଫଳତା ଜୀବନର ଶେଷ ନୁହେଁ । ପ୍ରତ୍ୟେକ ବିଫଳତା ପରେ ସଫଳତା ମଧ୍ୟ ରହିଥାଏ ବୋଲି ଡ.ପଣ୍ଡା ମତବ୍ୟକ୍ତ କରିଥିଲେ । ବରିଷ୍ଠ ଆଇନଜୀବୀ ଶ୍ରୀ ମିଶ୍ର କହିଲେ ଯେ,ମାନସିକସ୍ତରକୁ  ଯଦି କେହି ଉଚ୍ଚକୁ ନେଇ ଜୀବନର ସୁନ୍ଦରତା ଓ ମାଧୁର୍ଯ୍ୟକୁ ବୁଝିବ ତାହେଲେ ସେକେବେ ଆତ୍ମହତ୍ୟା କରିବ ନାହିଁ । ଆଇନ ଅପେକ୍ଷା ଆମର ସମାଜ ଆତ୍ମହତ୍ୟାର ବଡ ସମାଧାନ ବୋଲି ସେ କହିଥିଲେ । ବରିଷ୍ଠ ସାମ୍ବାଦିକ ଶ୍ରୀ ଯୋଷୀ ତାଙ୍କ ବକ୍ତବ୍ୟରେ ଭାରତୀୟ ସଂସ୍କୃତିରେ ସବୁଥିର ସମାଧାନ ରହିଛି । ଭାରତୀୟତା ଓ ଭାରତର ପୁରାଣଶାସ୍ତ୍ରକୁ ଜାଣିଲେ ଅନେକ ସଂଘର୍ଷ ସଫଳତାର କାହାଣୀ ରହିଛି । ପୁରାଣର ଶ୍ରୀରାମ ଓ କର୍ଣ୍ଣଙ୍କ ଭଲି ଜୀବନଶୈଳୀର ଉଦାହରଣ ଦେଇ ଏହା ଆମକୁ ଶହଶହ ବର୍ଷଧରି ଶିକ୍ଷାଦେଇ ଆସିଛି ବୋଲି କହିଥିଲେ । ଅନ୍ୟତମ ବକ୍ତା ଅଙ୍କିତା ପରିଚ୍ଛା ବିଭିନ୍ନପ୍ରକାର ମାନସିକରୋଗ ଓ ଏହା ଯୋଗୁଁ ବଢୁଥିବା ଆତ୍ମହତ୍ୟାକୁ କେମିତି  ରୋକାଯାଇ ପରିବ ସେ ସମ୍ପର୍କରେ ପାୱାର ପ୍ରୋଜେକ୍ଟ ମାଧ୍ୟମରେ ସୂଚନା ଦେଇଥିଲେ । ଶେଷରେ ବିଭିନ୍ନ ଶିକ୍ଷାନୁଷ୍ଠାନରୁ ଆସିଥିବା ଛାତ୍ରଛାତ୍ରୀମାନେ ଅତିଥିମାନଙ୍କୁ ପ୍ରଶ୍ନପଚାରି ଆଲୋଚନା କରିଥିଲେ । ମାହେଶ୍ୱରୀ ସଂଗଠନର ନିର୍ଦ୍ଦେଶକ ଅଙ୍କୁଶ ପାଣ୍ଡିଆ ସ୍ୱାଗତ ଭାଷଣ ଦେବା ସହିତ ଶେଷରେ ଧନ୍ୟବାଦ ଅର୍ପଣ କରିଥିଲେ । ଏହି କାର୍ଯ୍ୟକ୍ରମରେ ବଲାଙ୍ଗୀର ସହରର ବିଭିନ୍ନ ଶିକ୍ଷାନୁଷ୍ଠାନର ଛାତ୍ରଛାତ୍ରୀ,ସହରର ବିଶିଷ୍ଟ ବ୍ୟକ୍ତି,ସାମ୍ବାଦିକମାନେ ଯୋଗଦେଇଥିଲେ ।