03-Oct-2020

ରିଲାଏନ୍ସ ଲାଇଫ ସାଇନ୍ସ କୋଭିଡ ଯାଞ୍ଚ ଲାଗି ଏପରି ଏକ ଆରଟି-ପିସିଆର କିଟ୍‌ ବିକଶିତ କରିଛନ୍ତି ଯାହା ମାତ୍ର ୨ ଘଣ୍ଟାରେ ସଂକ୍ରମଣ ସମ୍ପର୍କିତ ରିପୋର୍ଟ ଦେଇପାରୁଛି। କମ୍ପାନୀ ସମର୍ଥିତ ସୂତ୍ର ଶୁକ୍ରବାର ଏହି ସୂଚନା ମିଳିଛି। ବର୍ତ୍ତମାନ ସମୟରେ ଆରଟି-ପିସିଆର କିଟ୍‌ ମାଧ୍ୟମରେ କରୋନା ଯାଞ୍ଚ ରିପୋର୍ଟ ଲାଗି ଅନୁନ୍ୟ ୨୪ ଘଣ୍ଟା ଅପେକ୍ଷା କରିବାକୁ ପଡୁଛି।  
   ଲାବରୋଟରି ରିଏଲଟାଇମରେ ଭୂତାଣୁର ଡିଏନଏ ଓ ଆରଏନଏରେ କପି ଯାଞ୍ଚ କରନ୍ତି ଓ ସାର୍ସ କୋଭ-୨ରେ ଉପସ୍ଥିତ ନ୍ୟୁକ୍ଲିକ୍‌ ଅମ୍ଲର ଚିହ୍ନଟ କରିଥାଏ। ନ୍ୟୁକ୍ଲିକ୍ ଅମ୍ଲ ପ୍ରତ୍ୟେକ ଜ୍ଞାତ ଜୀବିତ ବସ୍ତୁରେ ମିଳିଥାଏ। ଏହାକୁ ଦୃଷ୍ଟିରେ ରଖି ରିଲାଏନ୍ସ ଲାଇଫ ସାଇନ୍ସ ବୈଜ୍ଞାନିକମାନେ ଦେଶରେ ସାର୍ସ କୋଭ-୨ର ୧ଶହରୁ ଅଧିକ ଜିନୋମ ବିଶ୍ଲେଷଣ କରିବା ପରେ ଏହି ଅତ୍ୟାଧୁନିକ ଆରଟି-ପିସିଆର କିଟ୍ ବିକଶିତ କରିଥିବା କହିଛନ୍ତି।
  ରିଲାଏନ୍ସ ଏହି କିଟ୍‌କୁ ଆରଟି-ଗ୍ରୀନ୍‌ ନାମକରଣ କରିଛନ୍ତି। ଯାହାକୁ ଭାରତୀୟ ଆୟୁର୍ବିଜ୍ଞାନ ଗବେଷଣା ପରିଷଦ (ଆଇସିଏମଆର) ମଧ୍ୟ ଅନୁମୋଦନ କରିଛନ୍ତି। ସୂତ୍ରରୁ ମିଳିଥିବା ସୂଚନା ଅନୁସାରେ ଏହି କିଟ୍ ସାର୍ସ କୋଭ-୨ର ଇ-ଜିନ୍, ଆର-ଜିନ୍ ଓ ଆରଡିଆରପି ଜିନ୍‌ର ଉପସ୍ଥିତିକୁ ମଧ୍ୟ ଧରିପାରେ। ଏଥିରୁ ମାତ୍ର ୨ ଘଣ୍ଟାରେ ଟେଷ୍ଟିଂର ରିପୋର୍ଟ ମିଳିପାରେ ବୋଲି ଆଇସିଏମଆର କହିଛନ୍ତି।