24-Jan-2023

ବରଗଡ଼(ନିରଞ୍ଜନ ତ୍ରିପାଠୀ): ବିକାଶ ଲ’ ସ୍କୁଲ୍‌ରେ ନେତାଜୀ ସୁବାଷ ଚନ୍ଦ୍ର ବୋଷ ଓ ବୀର ସୁରେନ୍ଦ୍ର ସାଏଙ୍କ ଜୟନ୍ତୀ ଉପଲକ୍ଷେ ‘ଜାତୀୟ ପରାକ୍ରମ ଦିବସ’ ପାଳିତ ହୋଇଯାଇଛି । କାର୍ଯ୍ୟକ୍ରମ ପ୍ରାରମ୍ଭରେ ଏହି ଦୁଇ ମହାନ ସ୍ୱାଧୀନତା ସଂଗ୍ରାମୀଙ୍କ ଫଟୋଚିତ୍ରରେ ମାଲ୍ୟାର୍ପଣ କରି ଦୀପ ପ୍ରଜ୍ଜ୍ୱଳନ କରାଯାଇଥିଲା । ଲ’ ସ୍କୁଲ୍‌ର ଅଧ୍ୟକ୍ଷ ପ୍ରଫେସର୍ ଡ.ବିକ୍ରମ କୁମାର ଦାସଙ୍କ ଅଧ୍ୟକ୍ଷତାରେ ଅନୁଷ୍ଠିତ ଏହି କାର୍ଯ୍ୟକ୍ରମକୁ ଲ’ ସ୍କୁଲ୍‌ର ଶେଷ ବର୍ଷର ଛାତ୍ରଛାତ୍ରୀମାନେ ପରିଚାଳନା କରିଥିଲେ । ଅଧ୍ୟକ୍ଷ ଦାସ ନିଜର ପ୍ରାରମ୍ଭିକ ବକ୍ତବ୍ୟରେ ଏହି ଦୁଇ ବୀରପୁତ୍ର ଭାରତବାସୀଙ୍କର ସ୍ୱାଧୀନତା ପାଇଁ କିପରି ମହାନ ତ୍ୟାଗ କରିଥେଲେ, ସେ ଉପରେ ଆଲୋକପାତ କରିଥିଲେ । ଏହି ଅବସରରେ ଲ’ ଶେଷ ବର୍ଷର ଛାତ୍ରୀ ଉପାସନା ମିଶ୍ର ଏହି ଦୁଇ ବୀର ପୁରୁଷଙ୍କର ବୀରତ୍ୱ ଓ ସଂଘର୍ଷର ଗାଥା ବର୍ଣ୍ଣନା କରିଥିଲେ । ଲ’ ତୃତୀୟ ବର୍ଷର ଛାତ୍ର ଶ୍ରୀ ଲିପନ୍ କୁମାର ପୃଷେଠ୍ କବିତା ଓ ଦୁହିଁଙ୍କ ଜୀବନୀରୁ ଦୃଷ୍ଟାନ୍ତ ନେଇ ଏହି ଦୁଇ ମହାନ୍ ସ୍ୱାଧୀନତା ସଂଗ୍ରାମୀଙ୍କ ବୀରତ୍ୱର ଗାଥା ପ୍ରକାଶ କରିଥିଲେ । ଲ’ ଶେଷ ବର୍ଷର ଛାତ୍ର ଦିବ୍ୟ ପ୍ରକାଶ ପାଣିଗ୍ରାହୀ ଆଜିର ଯୁବପୀଢ଼ି ସ୍ୱାଧୀନତା ସଂଗ୍ରାମୀ ନେତାଜୀ ସୁବାଷ ଚନ୍ଦ୍ର ବୋଷ ଓ ବୀର ସୁରେନ୍ଦ୍ର ସାଏଙ୍କ ପରି ଦେଶପ୍ରେମ ଓ ତ୍ୟାଗ ମାଧ୍ୟମରେ ନିଜକୁ ଦେଶସେବାରେ ନିୟୋଜିତ କରିବାକୁ ଆହ୍ୱାନ ଦେଇଥିଲେ । ଏହି କାର୍ଯ୍ୟକ୍ରମକୁ ଲ’ ସ୍କୁଲ୍‌ର ଶେଷ ବର୍ଷର ଛାତ୍ରୀ ତାହିରା ବାନୋ ପରିଚାଳନା କରିଥିଲେ ଓ ଶେଷ ବର୍ଷର ଛାତ୍ରୀ ତୃପ୍ତୀ ଶର୍ମା ଧନ୍ୟବାଦ ଅର୍ପଣ କରିଥିଲେ । କାର୍ଯ୍ୟକ୍ରମ ପରିଚାଳନାରେ ଲ’ ସ୍କୁଲ୍‌ର ଅଧ୍ୟାପକ ଶିବାନନ୍ଦ ସାହୁ, ଜୈମିନୀ କୁମାର ସାହୁ, ଅଭିନବ ସ୍ୱାଇଁ, ଅଭିନନ୍ଦନ ଖୁଣ୍ଟିଆ, ଅଧ୍ୟାପିକା ସ୍ୱାଗତିକା ସାହୁ, ସାଗରିକା ବିଶ୍ୱାଳ ଓ ଖୁସିରାମ ସାହୁ ସହଯୋଗ କରିଥିଲେ । ବିକାଶ ଗ୍ରୁପ୍‌ର ଚେୟାର୍‌ମେନ୍ ଶ୍ରୀ ଡି.ମୂରଲୀ କ୍ରୀଷ୍ଣା, ଏକ୍‌ଜିକ୍ୟୁଟିଭ୍ ଡାଇରେକ୍ଟର ଶ୍ରୀ ଡି.ନାଗେଶ୍ୱର ରାଓ ଓ ଡାଇରେକ୍ଟର ଡ.ସମରେନ୍ଦ୍ର ନାଥ ପଣ୍ଡା ଏହି ଦୁଇ ମହାନ ସ୍ୱାଧୀନତା ସଂଗ୍ରାମୀଙ୍କର ବୀରତ୍ୱର ଗାଥା କୋଟି କୋଟି ଭାରତୀୟଙ୍କ ହୃଦୟରେ ଚିରସ୍ମରଣୀୟ ହୋଇ ରହିଥିବ ବୋଲି ନିଜର ଅଭିବ୍ୟକ୍ତି ପ୍ରକାଶ କରିଥିଲେ ।