21-Dec-2022

ବଲାଙ୍ଗୀର(ମଳୟ ମିଶ୍ରଙ୍କ ରିପୋର୍ଟ) ଗତ  ବର୍ଷାଧିକକାଳ ଧରି ରାଜ୍ୟବ୍ୟାପି ଚର୍ଚ୍ଚାରେ ରହିଆସିଥିବା ମମିତା ମେହେର ହତ୍ୟା ମାମଲାର ମୁଖ୍ୟଅଭିଯୁକ୍ତ ଗୋବିନ୍ଦ ସାହୁର ଆତ୍ମହତ୍ୟା ପରେ ଏକ ଦୀର୍ଘ ବିବାଦୀୟ ଚାଞ୍ଚଲ୍ୟକର ଅପରାଧ ଓ ରାଜନୈତିକ ହଟଚମଟର ମୁଖ୍ୟତଃ ଅବସାନ ଘଟିଛି  । ଆରମ୍ଭରୁ ବିଭିନ୍ନ ଅସ୍ବାଭାବିକ ଘଟଣାଜନିତ କାରଣରୁ ସନ୍ଦେହ ଉପୁଜାଉଥିବା ଏହି ମାମଲାଟି ଶେଷରେ ଏଭଳି ନାଟକୀୟ ଭାବେ ଶେଷ ହୋଇଯିବ ବୋଲି କେହି ଭାବି ନଥିଲେ ।  ଏଥିପାଇଁ ଶାସକଦଳ ଓ ସରକାର ଅଡୁଆରେ ପଡିଯାଇଥିଲେ ଓ ବିରୋଧୀଦଳମାନଙ୍କ ପାଇଁ ବି ଅଭିଯୋଗର ଖୋରାକ୍ ଜୁଟିଥିଲା । ତେବେ ଶେଷପର୍ଯ୍ୟାୟରେ ମଧ୍ୟ ଉଭୟ ବିରୋଧୀଦଳ ଓ ଗୋବିନ୍ଦର ପରିବାର ପକ୍ଷରୁ ଅଭିଯୋଗର ସ୍ବର ଜାରୀ ରହିଥିଲେ ହେଁ , ବସ୍ତୁତଃ ଏସବୁରେ ଆଉ ସେତେଟା ଦମ୍ ନାଇଁ  !
ତାଙ୍କ ପରିବାର ବା ପତ୍ନୀ ଓ ବିରୋଧୀ ବିଜେପି ବା କଂଗ୍ରେସଦଳ ପକ୍ଷରୁ ଏହା ଏକ ସୁପରିକଳ୍ପିତ ହତ୍ୟାକାଣ୍ଡ ଓ ଏଥିରେ ଜେଲ୍ କର୍ତ୍ତୃପକ୍ଷ , ପୁଲିସ୍ ଓ ସରକାରୀଦଳ ସମ୍ପୃକ୍ତ ଇତ୍ୟାଦି ସନ୍ଦେହମୂଳକ ଅଭିଯୋଗ , ଏତଲା ବା ତଦନ୍ତଦାବି ଓ ବୟାନବାଜି କରାଯାଉଥିବା ପ୍ରକାଶ ପାଇଛି । ଶେଷବେଳେ

ଗୋବିନ୍ଦର ପତ୍ନୀଙ୍କଠାରୁ ସେ ନିର୍ଦ୍ଦୋଷ ଓ ତାଙ୍କୁ ହତ୍ୟାକରି ନଥିବା ବିଷୟକ ଖବର ପ୍ରକାଶ ପାଇଛି । ଏପରିକି ମମିତାଙ୍କ ଡିଏନଏ  ପରୀକ୍ଷାରିପୋର୍ଟରେ ଏହା ମମିତାଙ୍କର ଦେହାବଶେଷ ନୁହେଁ ବୋଲି ଖବର ମଧ୍ୟ ପ୍ରକାଶ ପାଇଛି । 

ତେବେ ପ୍ରକାଶିତ ଖବର ଅନୁଯାୟୀ , ତାଙ୍କ ପରିବାରର କହିବାନୁସାରେ  ଗୋବିନ୍ଦର ମୃତଦେହର କଣ୍ଟାବାଞ୍ଜି ଡାକ୍ତରଖାନାରେ ପଞ୍ଚନାମା ସମୟରେ ପକେଟରୁ ଦୁଇପୃଷ୍ଠାର ସୁଇସାଇଡ୍ ନୋଟ୍ ବାହାରିଥିବା ଓ ପରେ ଐହାର ହସ୍ତାକ୍ଷର ପରୀକ୍ଷାପରେ ଯଦି ଏହା ଠିକ୍ ହୋଇଥାଏ , ତା'ହେଲେ ଆଉ ଅନ୍ୟାନ୍ୟ ସନ୍ଦେହର ଅବକାଶ ନାହିଁ । 

ସେ ସୁଇସାଇଡ୍ ନୋଟ୍ ରେ ହିଁ ମୃତକର ସଫେଇ ବା ସ୍ବୀକାରୋକ୍ତି ଥିବ ଅଥବା କିଏ ତାକୁ ହତ୍ୟାକରିବାକୁ ପ୍ରରୋଚିତ କରିଥବେ ସେ ଅନ୍ତିମକାଳରେ ଲେଖିଥିବେ । ଏଣୁ ଏହି ସୁଇସାଇଡ୍ ନୋଟ୍ ହିଁ ସବୁଠାରୁ ଗୁରୁତ୍ୱପୂର୍ଣ୍ଣ ଏବଂ ଏହାର ଯଥାଶୀଘ୍ର ଖୁଲାସା ହେବା ଆବଶ୍ୟକ ।