28-Nov-2020

ସମ୍ବଲପୁର,(ସଞ୍ଜିବ ପାଣିଗ୍ରାହୀ ଙ୍କ ରିପୋର୍ଟ): ସରକାରଙ୍କ ତ୍ରୁଟିପୂର୍ଣ୍ଣ ନୀତି ଯୋଗୁଁ ଚାଷୀ ଅସନ୍ତୋଷ ଦିନ କୁ ଦିନ ବୃଦ୍ଧି ପାଉଛି l ଅଭାବି ଧାନ ବିକ୍ରି ସାଙ୍ଗ କୁ ଟୋକନ ସମସ୍ୟା ଓ ଏକର ପିଛା ଧାନ କିଣାବିକା ପରିମାଣ ଚାଷୀଙ୍କ ପାଇଁ ବିରାଟ ସମସ୍ୟା ସୃଷ୍ଟି କରିଛି l ସରକାରଙ୍କୁ ଏହାର ସମାଧାନ ପାଇଁ ପଶ୍ଚିମ ଓଡ଼ିଶା କୃଷକ ସମନ୍ବୟ ସମିତି ଡ଼ିସେମ୍ବର ୪ ତାରିଖ ପର୍ଯ୍ୟନ୍ତ ସମୟସୀମା ଦେଇଛି। ଉକ୍ତ ସମୟ ମଧ୍ୟରେ ସରକାର ବଳିଷ୍ଠ ପଦକ୍ଷେପ ନ ନେଲେ ଡ଼ିସେମ୍ବର ୫ ତାରିଖରେ ଚାଷୀ ରାଜରାସ୍ତାକୁ ଓହ୍ଲାଇବେ। ପଶ୍ଚିମ ଓଡ଼ିଶାର ସବୁ ଜିଲାର ଚାଷୀ ଧାନ ଗାଡ଼ି ସହ ରାଜରାସ୍ତାରେ ଆନ୍ଦୋଳନ କରିବେ ବୋଲି ଆଜି ଅନୁଷ୍ଠିତ ସାମ୍ବାଦିକ ସମ୍ମିଳନୀରେ ଚାଷୀ ନେତା ଅଶୋକ ପ୍ରଧାନ କହିଛନ୍ତି। ପଶ୍ଚିମ ଓଡ଼ିଶା କୃଷକ ସଂଗଠନ ସମନ୍ବୟ ସମିତିର ଅନ୍ୟତମ ଆବାହକ ଲିଙ୍ଗରାଜ ସରକାରଙ୍କ ଭୁଲ ଖାଦ୍ୟଶସ୍ୟ ସଂଗ୍ରହ ନୀତି ଯୋଗୁଁ ଧାନ କିଣାବିକାରେ ଅଚଳାବସ୍ଥା ସୃଷ୍ଟି ହେବା ସହ ଅଭାବୀ ଧାନ ବିକ୍ରି ଲାଗି ସୁଯୋଗ ସୃଷ୍ଟି ହେଉଛି ବୋଲି କହିଛନ୍ତି। ପଶ୍ଚିମ ଓଡ଼ିଶାର ବରଗଡ଼, ବଲାଙ୍ଗିର, ସୋନପୁର, ନୂଆଁପଡ଼ା, କଳାହାଣ୍ଡି, ସୁନ୍ଦରଗଡ଼, ଝାରସୁଗୁଡ଼ା ଓ ଦେବଗଡ଼ ଆଦି ଜିଲାର ଚାଷୀଙ୍କ ପାଇଁ ଟୋକନ ସମସ୍ୟା ରହିଛି। ଏହି ସବୁ ଜିଲାର ଚାଷୀ ଧାନ ଅମଳ କରିଥିଲା ବେଳେ ସେମାନେ ଏବେ ଧାନ କିଣାବିକା କରିପାରୁ ନାହାନ୍ତି l ଆଜିକାର ଏହି  ସାମ୍ବାଦିକ ସମ୍ମିଳନୀରେ ସମ୍ବଲପୁର ଜିଲା କୃଷକ ସୁରକ୍ଷା ସଂଗଠନର ସଭାପତି ମୂରାରୀ ପ୍ରସାଦ ପୁରୋହିତ, ହରି ଶଙ୍କର ପୁରୋହିତ, ସରୋଜ, ଝାରସୁଗୁଡ଼ା ଜିଲାର ଚାଷୀ ଦିଲ୍ଲୀପ ବଢେଇ ଓ ଶରତ କୁମାର ପଟେଲ, ଦେବଗଡ଼ ଜିଲାର ଚାଷୀ ମକରଧ୍ବଜ ପ୍ରଧାନ ଓ ସୋନପୁର ଜିଲାର ଚାଷୀ ରାଜେନ୍ଦ୍ର କୁମାର ପ୍ରମୁଖ ଉପସ୍ଥିତ ଥିଲେ।