20-Jul-2022

ବଲାଙ୍ଗୀର(ପ୍ରେରଣା ଖବର): ଗତ ୨ଠ୨୧ ମସିହା ଖରିପ ଋତୁରେ ପ୍ରଧାନମନ୍ତ୍ରୀ ଫସଲ ବୀମା ପାଇଁ ଆବେଦନ କରିଥିବା ଚାଷୀ ମାନେ ଏ ପର୍ଯ୍ୟନ୍ତ ବୀମା ଟଙ୍କା ପାଇ ପାରି ନାହାନ୍ତି । ବୀମା କଂପାନୀର ଟାଳଟୁଳ ନୀତି ଓ ଜିଲ୍ଲା ପ୍ରଶାସନର ଚାଷୀ ବିରୋଧୀ ମନୋଭାବ ବିରୁଦ୍ଧରେ ଆଜି ବଲାଙ୍ଗୀର ଜିଲ୍ଲା ଟିଟିଲାଗଡ଼ ଉପଖଣ୍ଡ ମୁରିବାହାଲ ବ୍ଲକ  ତେନ୍ତେଲଖୁଣ୍ଟି, ଲଖନା, ପତ୍ରାପାଲି(କ) ଓ ମୁରିବାହାଲ ପଂଚାୟତର ବହୁ ଚାଷୀ ଜିଲ୍ଲା ମୁଖ୍ୟ କୃଷି ଅଧିକାରୀଙ୍କ ଜରିଆରେ ବଲାଙ୍ଗୀର ଜିଲ୍ଲାପାଳଙ୍କୁ ଏକ ଦାବିପତ୍ର ପ୍ରଦାନ କରିଛନ୍ତି । ୨ଠ୨୧ ମସିହା ଖରିପ ଋତୁରେ ଏହି ପଂଚାୟତ ଗୁଡିକରେ ଆଶାନୁରୂପକ ବର୍ଷ । ହୋଇ ନଥିବା ଯୋଗୁଁ ଚାଷୀ ମାନେ ନାହିଁ ନଥିବା କ୍ଷତିର ସମ୍ମୁଖୀନ ହୋଇଥିଲେ । ତେଣୁ ଆବଶ୍ୟକୀୟ ପ୍ରିମିୟମ ବୁଝାଇ ଏହି ଚାଷୀ ମାନେ ପ୍ରଧାନମନ୍ତ୍ରୀ ଫସଲ ବୀମା ପାଇଁ ଆବଦେନ କରିଥିଲେ । ତେବେ ଗୋଟିଏ ବର୍ଷ ବିତିଯାଇଥିଲେ ସୁଦ୍ଧା କ୍ଷତିଗ୍ରସ୍ତ ଚାଷୀ ମାନେବୀମା କ୍ଷତିପୂରଣ ଟଙ୍କା ପାଇ ପାରି ନାହାନ୍ତି । ଆଜି କଂଟାବାଞ୍ଜିର ବିଜେଡି ନେତା ଅଜୟ ଦାସଙ୍କ ନେତୃତ୍ୱରେ ଶତାଧିକ ଚାଷୀ ବଲାଙ୍ଗୀର ଜିଲ୍ଲା ମୁଖ୍ୟ କୃଷି ଅଧିକାରୀଙ୍କୁ ଭେଟି ଏକ ଦାବିପତ୍ର ପ୍ରଦାନ କରିଛନ୍ତି । ଫସଲ ବୀମା କ୍ଷତିପୂରଣ ଟଙ୍କ ନ ମିଳିଲେ ଚାଷୀ ମାନେ ଆନ୍ଦୋଳନକୁ ଓହ୍ଲାଇବେ ବୋଲି ଚେତାବନୀ ଦେଇଛନ୍ତି ।