15-Dec-2021

ବିନିକା(ହିମାଂଶୁ ଶେଖର ପୁଟେଲ) ଧାନମଣ୍ଡି ଖୋଲିବାର ପ୍ରାୟ ୧୦ଦିନ ବିତିଗଲା ହେଲେ ପଞ୍ଜିକୃତ କେତେକ ଚାଷୀଙ୍କ ଟୋକନ ଆସି ନଥିବାରୁ ଧାନ ବିକ୍ରି କରିବାରେ ଚାଷୀ ବର୍ତମାନ ନାହିଁ ନ ଥିବା ସମସ୍ୟାର ସମ୍ମୁଖୀନ ହେଉଛି । ପଞ୍ଜିକୃତ ସମସ୍ତ ଚାଷୀଙ୍କ ଟୋକନ ନିର୍ଦ୍ଧାରିତ ସମୟ ପୂର୍ବରୁ ପହଞ୍ଚିଲେ ଚାଷୀ ତାର କଷ୍ଟରୁ ମୁକୁଳିବା ସହ ଧାନ ବିକ୍ରି କରିପାରିବ ଏବଂ ଧାର ଉଧାର ପରିଶୋଧ କରିପାରିବ ବୋଲି ଆଶା କରାଯାଉଛି ।

ତେଣୁ ପଞ୍ଜିକୃତ ଚାଷୀଙ୍କୁ ଶୀଘ୍ର ଟୋକନ ବ୍ୟବସ୍ଥା କରିବାକୁ ଆଜି ଗଣେଶ ଆଞ୍ଚଳିକ କୃଷକ ସଂଘ ବିନିକା ତରଫରୁ ସ୍ଥାନୀୟ ତହସିଲଦାରଙ୍କୁ ଏକ ଦାବିପତ୍ର ପ୍ରଦାନ କରାଯାଇଛି । ସେମାନେ ଦାବିପତ୍ରରେ ଉଲ୍ଲେଖ କରିଛନ୍ତି ଯେ ଚଳିତ ଖରିଫ ଋତୁରେ ଧାନ ବିକ୍ରୟ ପାଇଁ ଗତ ଜୁଲାଇ ରୁ ଅଗଷ୍ଟ ମାସ ମଧ୍ୟରେ ଚାଷୀମାନେ ସମସ୍ତ ପ୍ରମାଣପତ୍ର ଦେଇ ପଞ୍ଜିକୃତ କରିଥିଲେ । କିନ୍ତୁ ମଣ୍ଡି ଖୋଲିଥିଲେ ହେଁ କେତେକ ଚାଷୀଙ୍କ ଟୋକନ ଆସି ନଥିବାରୁ ସେମାନେ ଧାନ ବିକିବା ନେଇ ସମସ୍ୟା ର ସମ୍ଭୁଖୀନ ହୋଇଛନ୍ତି ।ଅନ୍ୟ ପକ୍ଷରେ ବିଗତ ବର୍ଷ ମାନଙ୍କ ଭଳି କୌଣସି ଚାଷୀ ଟୋକନ ଜନିତ ସମସ୍ୟା ଯୋଗୁଁ ଧାନ ବିକିବାରୁ ବଞ୍ଚିତ ହୋଇ ପରିବାର ତଥା ନିଜେ ଚାପଗ୍ରସ୍ତ ହୋଇ ଅପ୍ରତିକର ପରିସ୍ଥିତି ସୃଷ୍ଟି ହୁଏ    କିମ୍ବା ସଂଘ ପକ୍ଷରୁ ଆଇନ ଶୃଙ୍ଖଳା ପରିସ୍ଥିତି କୁ ନିଜ ହାତକୁ ନେବାକୁ ବାଧ୍ୟ ହୁଏ ତେବେ ସେହି ସମୟରେ ଜିଲ୍ଲା ପ୍ରଶାସନ ସଂପୂର୍ଣ୍ଣ ଦାୟୀ ରହିବେ ବୋଲି ସଂଘ ଚେତାବନୀ ଦେଇଛି । ବେଲ ଥାଉଁ ଥାଉଁ ଉକ୍ତ ଶୀର୍ଷ କାତର ସମସ୍ୟାକୁ କୁ ତୁରନ୍ତ ସମାଧାନ କରିବା ଦିଗରେ ଚାଷୀ ସଂଗଠନ ସଭାପତି ଅଜିତ ପଣ୍ଡା ଙ୍କ ନେତୃତ୍ୱରେ ଚାଷୀ ପ୍ରକାଶ ପଣ୍ଡା,ରମେଶ ଦାଶ,ଦେବାଶିଷ ଦାଶ,ଶୁକଦେବ ଥନାପତି,ସୁରେଶ କୁମାର ନାଏକ, ହିରାଲାଲ ପଣ୍ଡା,ସୁରେନ୍ଦ୍ର ଥନାପତି ପ୍ରମୁଖଙ୍କ ସମେତ ବହୁ ଚାଷୀ ତହସିଲଦାର ଙ୍କୁ ଦାବିପତ୍ର ପ୍ରଦାନ କରିଛନ୍ତି ।