19-Aug-2021

ତିର୍ତ୍ତୋଲ-(ନୃସିଂହ ବାରିକ) : ପାଇପକୁ ଅଟକ ରଖି ଧାରଣାରେ ବସିଲେ ପାରାଦ୍ବୀପ ଅଞ୍ଚଳର  ଶତାଧିକ ମହିଳା । ପାରାଦ୍ବୀପ ପୌରପରିଷଦ ଓ ଜନସ୍ବାସ୍ଥ୍ୟ ବିଭାଗ ପକ୍ଷରୁ ସହରର ବସ୍ତି ଅଞ୍ଚଳ ଗୁଡିକୁ ଜଳ ଯୋଗାଣ ପାଇଁ ବନ୍ଦୋବସ୍ତ କରା ଯାଉଥିବା ବେଳେ ଏହାକୁ ନେଇ ଦେଖାଦେଇଛି ବିବାଦ। ପାରାଦୀପ ପୌର ପାଳିକାର ୩ନଂ ଓ୍ବାର୍ଡରେ ମହାବୀର ନଗରକୁ ପାନୀୟଜଳ ଯୋଗାଣକୁ ନେଇ ସ୍ଥାନୀୟ ଲୋକେ ପୌର ପାଳିକାରେ ଆବେଦନ କରିବା ପରେ ଜନ ସ୍ବାସ୍ଥ୍ୟ ବିଭାଗ ପକ୍ଷରୁ ପାଇପ୍ ବିଛା କାମ ଆରମ୍ଭ ହୋଇଥିଲା। ମାତ୍ର ଏହି  ଅଞ୍ଚଳ ପଞ୍ଚାୟତରେ ଥିବା କଥା କହି ପାଇପ୍ ଗୁଡିକୁ ପୁନର୍ବାର ଫେରାଇ ନେଉଥିବା ସମୟରେ ସ୍ଥାନୀୟ ଲୋକେ ଉତ୍ୟକ୍ତ ହେବା ସହ ସେଠାରେ ପଡିଥିବା ପାଇପ୍ ଗୁଡିକୁ ଅଟକ ରଖି ଧାରଣାରେ ବସି ରହିଥିଲେ। ସେମାନଙ୍କର ଅଭିଯୋଗ ଯେ ଦୀର୍ଘ ୩୦ବର୍ଷରୁ ଉର୍ଦ୍ଧ୍ବ ସମୟ ଧରି ଏଠାରେ ଶହେରୁ ଉର୍ଦ୍ଧ୍ବ ପରିବାର ରହି ଆସୁଥିବା ବେଳେ ପାରାଦୀପ ପୌର ପରିଷଦରେ ସେମାନେ ଭୋଟ ଦେଇ ଆସୁଛନ୍ତି। ତେବେ ପୌର ପାଳିକା ପକ୍ଷରୁ ସମସ୍ତ ରାସ୍ତା, ବିଜୁଳି ଓ ନଳକୂପ ଯୋଗାଇ ଦିଆ ଯାଇଥିବା ବେଳେ ଏବେ ଜଳଯୋଗାଣକୁ ନେଇ ଏହି ବସ୍ତି ପଞ୍ଚାୟତରେ ଯାଉଥିବା କଥା କହି ପାଇପ୍ ଗୁଡିକୁ ଉଠାଇ ନେଇ ଯାଉଥିବାରୁ ପାଇପ୍ ଗୁଡିକୁ ଅଟକ ରଖିବା ସହିତ ଯେପର୍ଯ୍ୟନ୍ତ ଜଳଯୋଗାଣ ନହୋଇଛି ବା ଉପରିସ୍ଥ ଅଧିକାରୀ ନ ପହଞ୍ଚି ଛନ୍ତି ସେ ପର୍ଯ୍ୟନ୍ତ ପାଇପ ଗୁଡିକୁ ଅଟକ ରଖିବେ ବୋଲି କହିଛନ୍ତି ବସ୍ତି ବାସିନ୍ଦା। ରିପୋର୍ଟ-ନୃସିଂହ ଚରଣ ବାରିକ