24-Oct-2026

ବରଗଡ଼(ତୁଳସୀ ଚରଣ ଦାଶ): ମହାପ୍ରଭୁ ଶ୍ରୀଜଗନ୍ନାଥଙ୍କ ମହିମା, ମହାନ ପରମ୍ପରା ଓ ସମୃଦ୍ଧ ଆଧ୍ୟାତ୍ମିକ ସଂସ୍କୃତିର ପ୍ରଚାର ପ୍ରସାର ଉଦ୍ଦେଶ୍ୟରେ ବରଗଡ଼ର ଗୌରୀଶଙ୍କର ମନ୍ଦିର ପରିସରରେ ଆୟୋଜିତ ତିନିଦିନିଆ '୨୪ ଦିବ୍ୟ ବେଶ ସମ୍ଭାର' ପ୍ରଦର୍ଶନୀ ଭକ୍ତିମୟ ପରିବେଶରେ ଉଦଯାପିତ ହୋଇଯାଇଛି। ଏହି ଅନନ୍ୟ ଆଧ୍ୟାତ୍ମିକ ଆୟୋଜନରେ ମହାପ୍ରଭୁଙ୍କ ବିଭିନ୍ନ ଦିବ୍ୟ ବେଶ ଦର୍ଶନ କରି ଶ୍ରଦ୍ଧାଳୁମାନେ ଭାବବିହ୍ୱଳ ହୋଇଥିଲେ।

ଶ୍ରୀଜଗନ୍ନାଥଙ୍କ ମହିମାକୁ ଜନମାନସରେ ପହଞ୍ଚାଇବା ସହ ତାଙ୍କର ପ୍ରାଚୀନ ପରମ୍ପରା ଓ ଆଧ୍ୟାତ୍ମିକ ଐତିହ୍ୟକୁ ଉଜ୍ଜୀବିତ କରିବା ଲକ୍ଷ୍ୟରେ ବରଗଡ଼ ଆଦିତ୍ୟ ଓ ଆନନ୍ଦ ବାହିନୀ ତଥା ଶ୍ରୀଜଗନ୍ନାଥ ସଂସ୍କୃତି ପ୍ରଚାର ସଂସ୍ଥା,  ଇଣ୍ଡିଆ ପକ୍ଷରୁ ଏହି ପ୍ରଦର୍ଶନୀ ଆୟୋଜିତ ହୋଇଥିଲା। ପ୍ରଥମ ଦିନରେ ଅଧ୍ୟାପକ ଦେଉଳ ପୁରୋହିତ ମୁଖ୍ୟ ଅତିଥି ଏବଂ ପଣ୍ଡିତ ରମେଶ ଚନ୍ଦ୍ର ଦାଶ ମୁଖ୍ୟବକ୍ତା ଭାବେ ଯୋଗଦେଇଥିଲେ। ବିଶିଷ୍ଟ ପ୍ରବକ୍ତା ଦେବେନ୍ଦ୍ର ଦାଶଙ୍କ ସମେତ ଆଦିତ୍ୟ ବାହିନୀ ଓ ଆନନ୍ଦ ବାହିନୀର କର୍ମକର୍ତ୍ତାମାନେ ମଧ୍ୟ ଉପସ୍ଥିତ ଥିଲେ।    
    ଏହି କାର୍ଯ୍ୟକ୍ରମର ସଂଯୋଜକ ସତ୍ୟନାରାୟଣ ପଣ୍ଡା, ସହ ସଂଯୋଜକ ଡ. ନାରାୟଣ ମହାପାତ୍ର ଏବଂ ଆଦିତ୍ୟ ଓ ଆନନ୍ଦ ବାହିନୀ ର କର୍ମକର୍ତ୍ତାଙ୍କ ଉପସ୍ଥିତିରେ କାର୍ଯ୍ୟକ୍ରମର ଶୁଭାରମ୍ଭ ହୋଇଥିଲା।
ଏହି ଆୟୋଜନର ଅନ୍ୟତମ ଆକର୍ଷଣ ଥିଲା ଶ୍ରୀକ୍ଷେତ୍ର ପୁରୀରୁ ଆସିଥିବା ତୁଳସୀ ଓ ଆଜ୍ଞାମାଳ। ବରଗଡ଼ବାସୀ ଭକ୍ତି ଓ ଶ୍ରଦ୍ଧାର ସହ ଏହାକୁ ସ୍ୱାଗତ କରି ମୁଖ୍ୟ ମଣ୍ଡପରେ ସ୍ଥାପନ କରିଥିଲେ। ଏହି ପବିତ୍ର ମୁହୂର୍ତ୍ତ ସମଗ୍ର ପରିବେଶକୁ ଭକ୍ତିରସରେ ଭରିଦେଇଥିଲା।
ପ୍ରଦର୍ଶନୀରେ ମୋଟ ୨୪ଟି ଦିବ୍ୟ ରୂପ ସ୍ଥାନ ପାଇଥିଲା। ଏଥିରେ ଶ୍ରୀଜଗନ୍ନାଥଙ୍କ ଚତୁର୍ଦ୍ଧା ମୂର୍ତ୍ତିଙ୍କ ୧୨ଟି ବେଶ, ଜନଜାତି ଶବର ପରମ୍ପରା ସହ ଜଡ଼ିତ ବୃକ୍ଷ ଉପାସନାର ଶ୍ରୀ ନୀଳ ମାଧବଙ୍କ ୧୨ଟି ରୂପ,  ଆଦ୍ୟ ରୂପ ଏବଂ ଅନ୍ୟ ୧୦ଟି ଅଲୌକିକ ଦିବ୍ୟ ବେଶ ପ୍ରଦର୍ଶିତ ହୋଇଥିଲା। ଏହି ଦିବ୍ୟ ରୂପଗୁଡ଼ିକ ମହାପ୍ରଭୁଙ୍କ ମହିମା ଓ ଶ୍ରୀଜଗନ୍ନାଥ ସଂସ୍କୃତିର ବିବିଧତାକୁ ପ୍ରତିଫଳିତ କରିଥିଲା।
ପ୍ରଦର୍ଶନୀ ସମୟରେ ପାରମ୍ପରିକ ଭଜନ, ସଂକୀର୍ତ୍ତନ ଓ ସତ୍‌ସଙ୍ଗ କାର୍ଯ୍ୟକ୍ରମ ଭକ୍ତମାନଙ୍କ ମନରେ ଆଧ୍ୟାତ୍ମିକ ଭାବନା ଜାଗ୍ରତ କରିଥିଲା। ଦ୍ୱିତୀୟ ଦିନରେ ଶୁଭେନ୍ଦୁ ସ୍ୱାଇଁ ଯୋଗଦେଇ ଶ୍ରୀଜଗନ୍ନାଥଙ୍କ ମହିମା ଉପରେ ପ୍ରବଚନ ଦେଇଥିଲେ। ଏହାସହ ବିଭିନ୍ନ ଦିନରେ ଅତିଥିମାନଙ୍କୁ ସମ୍ବର୍ଦ୍ଧିତ କରାଯାଇଥିଲା।
ଉଦଯାପନୀ ଦିବସରେ ପୂର୍ବତନ ବିଧାୟକ ଦେବେଶ ଆଚାର୍ଯ୍ୟ, ବିକାଶ ଗ୍ରୁପ୍‌ର ଅଧ୍ୟକ୍ଷ ଡି. ମୁରଲୀ କ୍ରିଷ୍ଣା, ପୌରପରିଷଦ ଅଧ୍ୟକ୍ଷା କଳ୍ପନା ମାଝୀ, ବିଶିଷ୍ଟ ଡାକ୍ତର ସୁବଳ କର ଏବଂ ଓକିଲ ସଂଘ ସଭାପତି ଭୀଷ୍ମଦେବ ସରାଫଙ୍କ ସମେତ ଅନେକ ଗଣ୍ୟମାନ୍ୟ ବ୍ୟକ୍ତି ଯୋଗଦେଇ ମହାପ୍ରଭୁଙ୍କ ଆଶୀର୍ବାଦ କାମନା କରିଥିଲେ।
ଆଦିତ୍ୟ ବାହିନୀ ଓ ଆନନ୍ଦ ବାହିନୀର ସଦସ୍ୟମାନଙ୍କ ନିଷ୍ଠାପର ସହଯୋଗରେ ଏହି ଆଧ୍ୟାତ୍ମିକ କାର୍ଯ୍ୟକ୍ରମ ସଫଳ ହୋଇଥିଲା। ମହାପ୍ରଭୁ ଶ୍ରୀଜଗନ୍ନାଥଙ୍କ ଦିବ୍ୟ ବେଶ ଦର୍ଶନ ମାଧ୍ୟମରେ ଭକ୍ତମାନେ ଓଡ଼ିଆ ଜାତିର ଆରାଧ୍ୟ ଦେବତାଙ୍କ ମହିମା, ପରମ୍ପରା ଓ ଆଧ୍ୟାତ୍ମିକ ଐତିହ୍ୟ ସହ ଯୋଡ଼ି ହେବାର ସୁଯୋଗ ପାଇଥିଲେ।
         ---------×××----------