22-Jul-2026

ସମ୍ବଲପୁର:(ସଂଜୀବ ପାଣିଗ୍ରାହୀ )

ସ୍ୱତନ୍ତ୍ର ସଘନ ସଂଶୋଧନ (Special Intensive Revision-SIR) କାର୍ଯ୍ୟର ଅଗ୍ରଗତିର ସମୀକ୍ଷା ପାଇଁ ନିର୍ବାଚନୀ ତାଲିକା ପର୍ଯ୍ୟବେକ୍ଷକ ତଥା ଓଡ଼ିଶା ଭାଷା, ସାହିତ୍ୟ ଓ ସଂସ୍କୃତି ବିଭାଗର ସଚିବ ଡଃ ବିଜୟ କେତନ ଉପାଧ୍ୟାୟ(ଭା.ପ୍ର.ସେ) ଆଜି ସମ୍ବଲପୁର ଜିଲ୍ଲାର ବିଭିନ୍ନ ମତଦାନ କେନ୍ଦ୍ର ପରିଦର୍ଶନ କରିଥିଲେ।

ପରିଦର୍ଶନ ସମୟରେ ସେ ବୁଥ୍ ସ୍ତରୀୟ ଅଧିକାରୀ (BLO)ମାନଙ୍କ ସହ ଆଲୋଚନା କରି କ୍ଷେତ୍ରସ୍ତରରେ କାର୍ଯ୍ୟାନ୍ୱୟନର ଅଗ୍ରଗତି ସମୀକ୍ଷା କରିଥିଲେ। କ୍ଷେତ୍ରସ୍ତରରେ ସମ୍ମୁଖୀନ ହେଉଥିବା ସମସ୍ୟା, ଜନସାଧାରଣଙ୍କ ସହଯୋଗ ଓ ପ୍ରତିକ୍ରିୟା, BLO ଆପ୍‌ର କାର୍ଯ୍ୟକ୍ଷମତା, ଅନଲାଇନ୍ ଏବଂ ମାନୁଆଲ୍ ତଥ୍ୟ ସନ୍ନିବେଶ ପ୍ରକ୍ରିୟାର ସୁବିଧା, ଏବଂ ଖସଡ଼ା ଭୋଟର ତାଲିକା ପ୍ରକାଶ ଆଦି ସମ୍ପର୍କରେ ଆଲୋଚନ କରିଥିଲେ।

ବୁଥ୍ ସ୍ତରୀୟ ଅଧିକାରୀମାନଙ୍କଠାରୁ ମିଳିଥିବା ସକାରାତ୍ମକ ମତାମତ ଓ କାର୍ଯ୍ୟ ପ୍ରତି ସେମାନଙ୍କର ନିଷ୍ଠା, ଦକ୍ଷତା ଏବଂ ବୃତ୍ତିଗତ କାର୍ଯ୍ୟଶୈଳୀରେ ଡଃ ଉପାଧ୍ୟାୟ ସନ୍ତୋଷ ବ୍ୟକ୍ତ କରିଥିଲେ। ନିର୍ଭୁଲ, ସ୍ୱଚ୍ଛ ଏବଂ ଅନ୍ତର୍ଭୁକ୍ତିମୂଳକ ନିର୍ବାଚନୀ ତାଲିକା ପ୍ରସ୍ତୁତିରେ BLOମାନଙ୍କ ଭୂମିକା ପ୍ରଶଂସନୀୟ ବୋଲି ସେ ମତ ପ୍ରକାଶ କରିଥିଲେ।

ସେ ନିର୍ବାଚନ ଆୟୋଗଙ୍କ ନିର୍ଦ୍ଦେଶାବଳୀର କଡ଼ାକଡ଼ି ପାଳନ ସହ ସମସ୍ତ କାର୍ଯ୍ୟକୁ ସମୟୋପଯୋଗୀ, ସଠିକ୍ ଓ ସ୍ୱଚ୍ଛ ଭାବେ ସମ୍ପନ୍ନ କରିବାକୁ BLOମାନଙ୍କୁ ପରାମର୍ଶ ଦେଇଥିଲେ।