06-Apr-2026

କୁରସୁଡ (ମନୋଜ କୁମାର ଜୈନ) ଜୈନ ଧର୍ମର ୨୪ତମ ତୀର୍ଥଙ୍କର ଭଗବାନ ମହାବୀରଙ୍କ  ଜନ୍ମ କଲ୍ୟାଣ ମହୋତ୍ସବ ମହା ସମାରୋହରେ କଳାହାଣ୍ଡି ଜିଲ୍ଲାର ଲଡ୍ଡୁଗାଁରେ ଅନୁଷ୍ଠିତ ହୋଇଛି।  ଏକ ଭବ୍ଯ ଶୋଭାଯାତ୍ରା ବହାରିଥିବା ବେଳେ ଶିଶୁ ମାନେ ଭଗବାନ ମହାବୀର ସ୍ୱାମୀ, ଚନ୍ଦନବାଳା ଆଦିଙ୍କ ବେଶରେ ସୁସଜ୍ଜିତ ହୋଇ ସହର ପରିକ୍ରମଣ କରିଥିଲେ । ବହୁ ସଂଖ୍ୟକ ଶ୍ରାବକ-ଶ୍ରାବିକା ଯୋଗଦେଇ ପୁଣ୍ୟ ଲାଭ କରିଥିବା ବେଳେ ଏହାକୁ ଦେଖିବା ପାଇଁ ଭକ୍ତମାନଙ୍କ ଭିଡ଼ ଲାଗିଥିବା ସହ ସମସ୍ତ ଭାବବିହ୍ୱଳ ହୋଇ ଯାଇଥିଲେ । ଜୈନ ସ୍ବେତାମ୍ବର ତେରାପନ୍ଥ ଧର୍ମର ସଂଘ ଆଚାର୍ଯ୍ଯ ମହାଶ୍ରମଣଜୀଙ୍କ ଶିକ୍ଷ୍ୟ ମୁନିଶ୍ରୀ ହିମାଂଶୁ କୁମାର ଜୀ ଓ ମୁନିଶ୍ରୀ ହେମନ୍ତ କୁମାର ଜୀଙ୍କ ଉପସ୍ଥିତରେ ଜୈନ ଧର୍ମର ନମସ୍କାର ମହାମନ୍ତ୍ର ଉଚ୍ଚାରଣ କରାଯିବା ସହ ଭବ୍ଯ ଧାର୍ମିକ କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା ।  ମୁନିଶ୍ରୀ ଭଗବାନ ମହାବୀରଙ୍କ ଜୀବନ ଦର୍ଶନ, ଅହିଂସା, ସତ୍ୟ, ଅପରିଗ୍ରହ ଓ କରୁଣା ବିଷୟରେ ଉପଦେଶ ଦେଇ ସମସ୍ତଙ୍କୁ ଏହି ମୂଲ୍ୟବୋଧ ଅନୁସରଣ କରିବାକୁ ପ୍ରେରିତ କରିଥିଲେ। ସମାରୋହରେ ସ୍ୱାଗତ ଭାଷଣ ଲଡୁଗାଁର ଦୁର୍ଗା ପ୍ରସାଦ ଅଗ୍ରୱାଲଙ୍କ ଦ୍ୱାରା ପ୍ରଦାନ କରାଯାଇଥିଲା। କାର୍ଯ୍ୟକ୍ରମ ସମୟରେ ବିଭିନ୍ନ ଧାର୍ମିକ କାର୍ଯ୍ୟକଳାପ ଓ ଭକ୍ତିମୟ କାର୍ଯ୍ୟସୂଚୀ ଆୟୋଜିତ ହୋଇଥିଲା, ଯାହାରେ ସମଗ୍ର ପରିବେଶ ଭକ୍ତିମୟ ହୋଇଯାଇଥିଲା। ଏହି ଅବସରରେ ଭବାନୀପାଟଣା, କେସିଙ୍ଗା,ସିନାପାଳି, ବଲାଙ୍ଗିର, କାଣ୍ଟାବାଞ୍ଜି, ଟିଟିଲାଗଡ଼, ବଙ୍ଗୋମୁଣ୍ଡା, ସିନ୍ଧେକେଲା, କୁରସୁଡ, ଚାନ୍ଦୁତାରା, ରାମପୁର, ରାୟଗଡା, ବିଜୟନଗରମ, ପାପଡାହାଣ୍ଡି,  ନବରଙ୍ଗପୁର, ତେନ୍ତୁଳିଖୁଣ୍ଟି, ତୁଷୁରା, ବେଲପଡା  ଆଦି ଅଞ୍ଚଳରୁ ବହୁ ସଂଖ୍ୟକ ଶ୍ରାବକ-ଶ୍ରାବିକାମାନେ ଯୋଗଦେଇଥିଲେ ।  ପୁନମ ଜୈନଙ୍କ ଦ୍ୱାରା ଆଭାର ଜ୍ଞାପନ କରାଯାଇଥିବା ବେଳେ ଏହି କାର୍ଯ୍ୟକ୍ରମକୁ ସଫଳ କରିବାରେ ସହଯୋଗ କରିଥିବା ସମସ୍ତଙ୍କୁ ଧନ୍ୟବାଦ ଜଣାଇଥିଲେ। ଏହି ଅବସରରେ ସମାଜର ଅନେକ ଗଣ୍ୟମାନ୍ୟ ବ୍ୟକ୍ତିବର୍ଗ ଓ ଶ୍ରଦ୍ଧାଳୁମାନେ ଉପସ୍ଥିତ ଥିଲେ। ସମଗ୍ର କାର୍ଯ୍ୟକ୍ରମରେ ଭକ୍ତି ଓ ଆଧ୍ୟାତ୍ମିକତାର ଅନୁଭୂତି ଦେଖିବାକୁ ମିଳିଥିଲା। ଏଠାରେ ସୂଚନାଯୋଗ୍ଯ ଯେ, ଏହି ଗ୍ରାମରେ ଜୈନ ଧର୍ମ ଅନୁରାଗୀ ଏକ ମାତ୍ର ପରିବାର ଜିତମଲ ଜୈନଙ୍କ ଅଟେ। ତାଙ୍କର ଦୁଇ ପୁତ୍ର ଆଲୋକ ଜୈନ ଓ ପୁନମ ଜୈନ ଏହି କାର୍ଯ୍ୟକ୍ରମ ପାଇଁ ବିଶେଷ ଉଦ୍ୟମ କରିଥିବା ବେଳେ ଗ୍ରାମବାସୀ ସହଯୋଗ କରିଥିଲେ।