26-Oct-2025

ବଲାଙ୍ଗୀର (ପ୍ରେରଣା ଖବର): ସଂପ୍ରତି ନୂଆଁପଡା ଉପ ନିର୍ବାଚନ ଓଡିଶା ରାଜନୀତିରେ ହଟଚମଟ ସୃଷ୍ଟି କରିଛି । ନୂଆଁପଡା ଏବେ ରାଜ୍ୟର ରାଜନୈତିକ ରାଜଧାନୀ ଭଳି ପ୍ରତୀୟମାନ ହେଉଛି। ଗୋଟିଏ ପଟରେ ଆଦିବାସୀ ଭୋଟ ଓ ବିଗତ ବିଧାନସଭା ନିର୍ବାଚନର ରାଜନୈତିକ ପରିସଂଖ୍ୟାନକୁ ନେଇ କଂଗ୍ରେସ ଦଳ ବାହାସ୍ପୋଟ ମାରୁଥିବା ବେଳେ ଦିବଂଗତ ବିଧାୟକଙ୍କ ପାଳିତ ପୁତ୍ରଙ୍କୁ ପ୍ରାର୍ଥୀ କରି ଓ ଶାସନ କଳ, ଶାସନ ତନ୍ତ୍ର ଓ ପେକେଜ ଘୋଷଣାକୁ ଭିତି କରି ବିଜେପି ଦଳ ଜତିବାର ଦମ୍ଭ ଦେଖାଉଛି। ବିଳମ୍ବରେ ହେଉ ବରଂ ଅତାବିରା ର ପୂର୍ବତନ ବିଧାୟିକା ଓ ମନ୍ତ୍ରୀ ବାଗ୍ମୀ ସ୍ନେହାଙ୍ଗିନୀ ଛୁରିଆ ପ୍ରାର୍ଥୀପତ୍ର ଦାଖଲ କଲା ପରେ ବିଜେଡିର ସାଂଗଠନିକ ଭିତି କୁ ପୁନର୍ଗଠନ କରି ଓ ବିରୋଧୀ ଦଳ ନେତା ମାନ୍ୟବର ନବୀନ ପଟ୍ଟନାୟକଙ୍କ ବଂଚିଥିବା ବ୍ୟକ୍ତିତ୍ୱକୁ ଭିତ୍ତି କରି ବିଜେଡି ମଧ୍ୟ ଜିତିବାର ହୁଂକାର ଦେଇଛି। ପ୍ରାର୍ଥ ହିସାବରେ ବିଜେପି ପ୍ରାର୍ଥୀ ନବାଗତ ଓ ସଂପୂର୍ଣ୍ଣ ରୂପେ ତାଙ୍କର ବିଜେପିକରଣ ହୋଇନାହିଁ, କଂଗ୍ରେସ ପ୍ରାର୍ଥୀ ଉକ୍ତ ନିର୍ବାଚନ ମଣ୍ଡଳୀ ରେ ୪/୫ ଥର ହାରି ସାରିଛନ୍ତି ତଥା ବିଜେଡି ପ୍ରାର୍ଥୀନୀ ଅଭିଜ୍ଞ ଓ ଉଚ୍ଚ ଶିକ୍ଷିତା ହୋଇଥିଲେ ମଧ୍ୟ ଉକ୍ତ ନିର୍ବାଚନ ମଣ୍ଡଳୀ ପାଇଁ ନୂଆଁ ପ୍ରାର୍ଥୀ ତେଣୁ ଲଢେଇ ରୋଚକ ହେଉଛି । କିଛି ସ୍ୱାଧୀନ ପ୍ରାର୍ଥୀ ମଧ୍ୟ ଅଛନ୍ତି ଓ ସେମାନେ ମଧ୍ୟ କିଛି ଭୋଟ ପାଇପାରନ୍ତି । କିନ୍ତୁ ଆଲୋଚ୍ୟ ର ବିଷୟ ହେଲା ଯେ ଆଦିବାସୀ ଭୋଟ ଏଥରକ ଆଉ ଏକତରଫା ଭାବରେ ପଡିବ ନାହିଁ ବୋଲି ସର୍ଭେଅକଳନ କରୁଛନ୍ତି ।

ସାଧାରଣତଃ ଉପନିର୍ବାଚନମାନଙ୍କୁ ଶାସକ ଦଳ ସୁବିଧା ରେ ରହନ୍ତି, କିନ୍ତୁ ଶାସନକୁ ଆସିଲା ପରେ ବିଜେପି ଗତ ୧୫/୧୬ ମାସ ମଧ୍ୟରେ ଯେଭଳି ଭାବରେ ଶାସନ ବିହୀନତାର ଅଭିଯୋଗରେ ଅଭିଯୁକ୍ତ ହେଉଛି, ତା ପାଇଁ ଏହି ନିର୍ବାଚନ ଏସିଡ ଟେଷ୍ଟ ଭଳି ହୋଇଛି। ଶାସନରୁ ଗଲା ପରେ ନବୀନ ପଟ୍ଟନାୟକଙ୍କ ଲୋକପ୍ରୟତା କେତେ ଅଛି ତାହା ଏହି ନିବାଚନରେ ପ୍ରମାଣିତ ହେବ। ଠିକ୍ ସେହିଭଳି କଂଗ୍ରେସ ଦଳକୁ ଲୋକେ ଗ୍ରହଣ କରିବାକୁ କେତେ ଚାହୁଛନ୍ତି ତାହା ମଧ୍ୟ ଏହି ନିର୍ବାଚନ ରେ ସାବିତ ହେବ । କିନ୍ତୁ କଥା ତାହା ନୁହେ । ସବୁ ଦଳ ଓ ସବୁ ପ୍ରାର୍ଥୀ ନିର୍ବାଚନ ପ୍ରଚାରରେ କେବଳ ପ୍ରତିଶୃତି ଦିଆ, ମିଶ୍ରଣ ପର୍ବ ଓ ବାହାସ୍ପୋଟ ମାରିବାରେ ବ୍ୟସ୍ତ ଅଛନ୍ତି । ଲୋକଙ୍କ ମୌଳିକ ସମସ୍ୟା ଓ ପ୍ରଶ୍ନ ଏହି ନିର୍ବାଚନ ରେ ଆଲୋଚିତ ହେଉ ନାହିଁ । ଗତ ୩ ଦଶକ ହେଲା କୋଶଳାଂଚଳରେ ସଂବିଧାନର ଧାରା ୩ ଅନଯାୟୀ ସ୍ୱତନ୍ତ୍ର ରାଜ୍ୟ ଆନ୍ଦୋଳନ ଚାଲିଛି । ଦୁଇ ଦଶକ ଧରି କୋଶଳାଂଚଳରେ ହାଇକୋର୍ଟ ର ସ୍ଥାୟୀ ବେଂଚ ଦାବି

ଆନ୍ଦୋଳନ ଚାଲିଥିଲା । ଚାଷୀ ଆତ୍ମହତ୍ୟା, ଅଭାବୀ ବିକ୍ରି, ଦାଦନ ସମସ୍ୟା, ଟୋକନ ସମସ୍ୟା ଇତ୍ୟାଦି ଯେଉଁ ଅବସ୍ଥାକୁ ସେହି ଅବସ୍ଥାରେ ରହିଛି । ବିଶେଷ କରି ନୂଆଁପଡା ଏକ ଦାଦନ ପ୍ରବଣ ଜଲ୍ଲା । ସେହି ଜିଲ୍ଲାର ଅନେକ ସମସ୍ୟା ରହିଛି । ତେଣୁ ଏହି ପ୍ରସଙ୍ଗ ସବୁ ନିର୍ବାଚନ ରେ ଆଲୋଚିତ ହେବା କଥା । ତାହା ନ କରି କେବଳ କ୍ଷମତା ପାଇଁ ଦଳମାନେ ପାଗଳ ହେବା ବିଡମ୍ବନା ର ବିଷୟ । ବିଭିନ୍ନ ସମୟରେ ନିଜର କିମ୍ବା ନିଜ ପରିବାରର ରାଜନୈତିକ ପତିଆରା ପାଇଁ କିଛି ନେତା କୋସଳ ନାଁ ଧରି ଦେଉଛନ୍ତି । ଗୋଟିଏ ନିର୍ଦ୍ଦିଷ୍ଟ ଦଳର ନେତା ବିଗତ ଦିନରେ କୋସଳ ଆନ୍ଦୋଳନକୁ ବିଭାଜିତ କରିବାକୁ ମଧ୍ୟ ପ୍ରୟାସ କରିଥିଲେ । କିନ୍ତୁ କେହି ହେଲେ କୋସଳ ରାଜ୍ୟ ସପକ୍ଷରେ କିଛି କରୁ ନାହାନ୍ତି କିମ୍ବା ବୈଧାନିକ ପଦକ୍ଷେପ ନେଉନାହାନ୍ତି । ଏଣୁ ନୂଆଁପଡାର ଭୋଟର ଭାଇ ଭଉଣୀମାନେ ଭୋଟ ପୂର୍ବରୁ ରାଜନୈତିକ ଦଳ ଓ ପ୍ରାର୍ଥୀ ମାନଙ୍କୁ କୋସଳ ରାଜ୍ୟ ଦାବୀ ସଂପର୍କ ରେ ସ୍ପଷ୍ଟୀକରଣ ମାଗନ୍ତୁ ବୋଲି କୋସଲବାଦୀ ନେତା ପ୍ରମୋଦ ମିଶ୍ର ଆହ୍ୱାନ ଦେଇଛନ୍ତି ।