27-Mar-2025

ବରୀ(ରଞ୍ଜିତ ମହାନ୍ତି):  ଗ୍ରାମ୍ଯ ରାସ୍ତା ଅଲୋକୀକରଣ ପାଇଁ ପଞ୍ଚାୟତସ୍ତରରେ ସରକାରଙ୍କ ତରଫରୁ ଅର୍ଥ ମଞ୍ଜୁର କରାଯାଇ ବିଭିନ୍ନ ଛକ, ବଜାରରେ ଷ୍ଟ୍ରିଟ ଲାଇଟ ଲଗାଯାଇଛି। ମାତ୍ର ବରୀ ବ୍ଲକର ବିଭିନ୍ନ ପଞ୍ଚାୟତର ଗାଁ ଗଣ୍ଡାରେ ଲାଗିଥିବା ଏହି ଷ୍ଟ୍ରିଟ ଲାଇଟ ଜଳୁ ନ ଥିବା ସୂଚନା ମିଳଛି। ଫଳରେ ସଞ୍ଜ ନଇଁଲେ ଚାରିଆଡ଼େ ଅନ୍ଧାର ମାଡ଼ି ଆସୁଥିବା ଦେଖିବାକୁ ମିଳିଛି। ଲୋକେ ଅନ୍ଧାରରେ ଯାତାୟାତ ପାଇଁ ନିରାପଦା ମଣୁନାହାନ୍ତି। ଅନ୍ଧାରର ସୁଯୋଗ ନେଇ ବିଭିନ୍ନ ଛକ, ବଜାରରେ ମଦ୍ୟପମାନେ ଆଡ଼ା ଜମାଉଛନ୍ତି । ରାସ୍ତାରେ ଚୋରି, ଡକାୟତି ମଧ୍ୟରେ ବଢ଼ିବାରେ ଲାଗିଛି। ତେଣୁ ଘଟଣାକୁ ଗୁରୁତ୍ଵ ଦେଇ ବ୍ଲକ ପ୍ରଶାସନ ଅଚଳ ହୋଇ ପଡ଼ିଥିବା ଲାଇଟ୍‌ଗୁଡ଼ିକୁ ସଚଳ କରିବା ଏବଂ ଗଳି କନ୍ଦିରେ ଥିବା ରାସ୍ତାଗୁଡ଼ିକୁ ଆଲୋକୀକରଣ କରିବା କ୍ଷେତ୍ରରେ ପଦକ୍ଷେପ ନେବାକୁ ଦାବି ହୋଇଛି।
ନିୟମ ଅନୁଯାୟୀ, ଗ୍ରାମ୍ୟରାସ୍ତା ଆଲୋକୀକରଣ ନିମନ୍ତେ ଲାଗିଥିବା ଷ୍ଟ୍ରିଟ ଲାଇଟ ଅଚଳ ହେଲେ ପଞ୍ଚାୟତ ତରଫରୁ ବ୍ଲକ ପ୍ରଶାସନକୁ ଅବଗତ କରାଯିବା କଥା। ସେହିପରି ୫ ବର୍ଷ ପାଇଁ ଚୁକ୍ତିବଧ ହୋଇଥିବା ଠିକାଦାର ଏହାର ମରାମତି କରିବା କଥା। ମାତ୍ର ବିଭିନ୍ନ ପଞ୍ଚାୟତରେ ବହୁ ଷ୍ଟ୍ରିଟ ଲାଇଟ ଅଚଳ ହୋଇ ପଡ଼ିଥିଲେ ମଧ୍ୟ ମରାମତି
କରାଯାଉନାହିଁ। କେଉଁ ପଞ୍ଚାୟତର କେଉଁ ଗ୍ରାମରେ ଷ୍ଟ୍ରିଟ ଲାଇଟ ଅଚଳ ରହିଛି ତାହାର ତାଲିକା ସରପଞ୍ଚ ଓ ପିଇଓମାନେ ବ୍ଲକ୍‌ରେ ଦେଉନାହାନ୍ତି। ଫଳରେ ଏହାକୁ ନେଇ ସାଧାରଣରେ ଅସନ୍ତୋଷ ପ୍ରକାଶ ପାଇଛି। ଅନ୍ୟପକ୍ଷରେ ନୂତନ ରାସ୍ତା ଆଲୋକୀକରଣ ଓ ଅଚଳ ହୋଇଥିବା ଷ୍ଟ୍ରିଟଲାଇଟକୁ ସଚଳ କରିବା ପାଇଁ ପଞ୍ଚାୟତସ୍ତରରେ ଅର୍ଥ ମହଜୁତ ଥିଲେ ବି ଏହାକୁ ପଞ୍ଚାୟତ ପ୍ରତିନିଧୂମାନେ ଗୁରୁତ୍ଵ ଦେଉନାହାନ୍ତି। ଏହାକୁ ନେଇ ସାଧାରଣରେ ପ୍ରଶ୍ନବାଚୀ ସୃଷ୍ଟି କରିଛି। ବ୍ଲକ୍ ଅଧୀନ ୨୯ ପଞ୍ଚାୟତର କେଉଁ
ଗ୍ରାମରେ କେତୋ ଷ୍ଟ୍ରିଟ୍ ଲାଇଟ ଲାଗିଛି, ବିଦ୍ୟୁତ୍ ବିଭାଗ ଷ୍ଟ୍ରିଟ ଲାଇଟ ଜଳିବା ବାବଦରେ କେତେ ଅର୍ଥ ଆଦାୟ କରୁଛି ତାହାର ଠିକ ସୂଚନା ବ୍ଲକ ପ୍ରଶାସନ ନିକଟରେ ନାହିଁ ବୋଲି ଜଣାପଡ଼ିଛି। ଏ ସମ୍ପର୍କରେ ବିଡିଓ ଅସିତ କୁମାର ମହାନ୍ତିଙ୍କୁ ପଚାରିବାରେ ସେ କହିଛନ୍ତି, କେଉଁ ପଞ୍ଚାୟତରେ କେତେ ଲାଇଟ ଅଚଳ ରହିଛି ତା'ର ତାଲିକା ଦେବାକୁ ସରପଞ୍ଚମାନଙ୍କୁ ପତ୍ର ଲେଖାଯାଇଛି। ତାଲିକା ଆସିବା ପରେ ଅଚଳ ଥିବା ଲାଇଟଗୁଡ଼ିକ ମରାମତି ପାଇଁ ପଦକ୍ଷେପ ନିଆଯିବ