27-Mar-2025

ବିନିକା(ହିମାଂଶୁ ଶେଖର ପୁଟେଲ): ଜଣେ ବାଟୋଇଙ୍କ ଠାରୁ ମୋବାଇଲ ଲୁଟ କରିବା ଅଭିଯୋଗ ନେଇ ଥାନାର ଦ୍ବାରସ୍ଥ ହୋଇଥିବା ବେଳେ ମୋବାଇଲ ହଜି ଯାଇଛି ବୋଲି ଜବରଦସ୍ତ ଏଫ ଆଇ ଆର ରୁଜ୍ଜୁ କଲା ବିନିକା ପୋଲିସ ।ସୂଚନା ଯୋଗ୍ୟ ଯେ ସୁବର୍ଣ୍ଣପୁର ଜିଲ୍ଲା ବିନିକା ବ୍ଲକ ଶଙ୍କରା ଗ୍ରାମର ରମାକାନ୍ତ ପାଣିଗ୍ରାହୀ କୌଣସି କାମରେ ବିନିକା ଆସୁଥିବା ବେଳେ ଚରଦା ଗାଁ ମୁଣ୍ଡ ବନ୍ଧ ରାସ୍ତାରେ ଅଟକି ଫୋନରେ କଥା ହେଉଥିବା ବେଳେ ୨ଜଣ ଦୁର୍ବୃତ୍ତ ମଟର ସାଇକଲରେ ଆସି ତାଙ୍କ ଠାରୁ ମୋବାଇଲ ଛଡାଇ ନେଇ ପଳାଇ ଯାଇଥିଲେ ।ପରେ ରମାକାନ୍ତ ଏହି ଘଟଣା ନେଇ ବିନିକା ଥାନାର ଦ୍ୱାରସ୍ଥ ହୋଇଥିଲେ।ସେଠାରେ ଥିବା ଏ ଏସ ଆଇ ଅନିଲ ବେହେରା ଏଫ ଆଇ ଆର ଲେଖିବାକୁ କହିଥିଲେ ।ରମାକାନ୍ତ ଘଟଣା ବାବଦରେ ସମ୍ପୂର୍ଣ୍ଣ ବିବରଣୀରେ ମୋବାଇଲ ଛଡ଼ାଇ ନେଇଥିବା ଲେଖି ଥିବା ଦେଖି ପୋଲିସ ବାବୁ ଭଡକି ଯାଇଥିଲେ ଏବଂ ଏଫ ଆଇ ଆର ଲେଖା ବଦଳାଇ ମୋବାଇଲ ହଜି ଯାଇଛି ଲେଖ ବୋଲି ଜୋର ଜବରଦସ୍ତ କରିଥିଲେ ।ରମାକାନ୍ତ ପୋଲିସର ନାଲି ଆଖି ଭୟରେ ଏଫ ଆଇ ଆର ବଦଳାଇବାକୁ ବାଧ୍ୟ ହୋଇଥିଲେ ।ପରେ ଏ ଏସ ଆଇ ବେହେରା ମୋବାଇଲକୁ ଟ୍ରାକ କରିବୁ ଏବଂ ଚୋରକୁ ଧରିବୁ ବୋଲି କହିଥିଲେ । ମୋବାଇଲ ଟ୍ରାକ କରିବାରୁ ଆଖ ପାଖ ଅଞ୍ଚଳରେ ମୋବାଇଲ ଥିବା ଅନୁମାନ କରାଯାଇଥିଲା ।ଘଟଣା ୨୫ଦିନ ବିତି ଯାଇଥିବା ପରେ ମଧ୍ୟ

ପୋଲିସ ଘଟଣାସ୍ଥଳ ଏବଂ ମୋବାଇଲ ଟ୍ରାକ ସ୍ଥାନକୁ ବର୍ତ୍ତମାନ ପର୍ଯ୍ୟନ୍ତ ଯାଇନଥିବା ଜଣାପଡିଛି । ଏ ଏସ ଆଇ ବେହେରାଙ୍କୁ ରମାକାନ୍ତ ପଚାରିବାରୁ ଅନ୍ୟ କାମରେ ବ୍ୟସ୍ତତା ଥିବାରୁ ଯାଇ ପାରୁନାହିଁ ବୋଲି ପ୍ରତି ଉତ୍ତର ଦେଇ ଚାଲିଛନ୍ତି ।ଏପରି ଅନେକ ଘଟଣା ବିଗତ ଦିନରେ ବିତି ଯାଇଛି । ଲୁଟପାଟକୁ ହଜି ଯାଇଥିବା ଦର୍ଶାଯାଇ ଅନେକ ଏଫ ଆଇ ଆର ବଦଳାଯାଇଥିବା ଏଥିରୁ ଅନୁମାନ କରାଯାଏ ।ଲୋକଙ୍କ ସୁରକ୍ଷା ପାଇଁ ପୋଲିସ ଥିବା ବେଳେ ପୋଲିସ କିନ୍ତୁ ଲୋକଙ୍କୁ ହଇରାଣ ହରକତ କରି ନିଜ ଦାୟିତ୍ଵ ରୁ ଓହରି ଯାଉଛି। ଏହା ଏକ ଜ୍ୱଳନ୍ତ ଉଦାହରଣ ସାଜିଥିବା ବେଳେ ଏହି ଘଟଣା ଦାୟିତ୍ୱରେ ଥିବା ଅଧିକାରୀ ଙ୍କ ଅପାରଗତା କୁ ନେଇ ସାଧାରଣରେ ପ୍ରଶ୍ନବାଚୀ ସୃଷ୍ଟି କରିଛି।ତେବେ ଲୋକଙ୍କୁ ନ୍ୟାୟ ଦେଇ ପାରୁ ନଥିବା ଦାୟିତ୍ଵହୀନ ଅଧିକାରୀଙ୍କ ବିରୋଧରେ ପୋଲିସ ବିଭାଗର ଉଚ୍ଚ କର୍ତ୍ତୃପକ୍ଷ ଦୃଢ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ବିଭିନ୍ନ ମହଲରେ ଦାବୀ ହେଉଛି ।