25-Mar-2025

ବରଗଡ଼:(ନିରଞ୍ଜନ ତ୍ରିପାଠୀ)-ଭଲ ପୁସ୍ତକଟିଏ ଜୀବନରେ ଖୁସି ଆଣି ଦେଇଥାଏ। ଜୀବନର ମୋଡ଼ ବଦଳାଇ ବ୍ୟକ୍ତିକୁ ସଠିକ ମାର୍ଗରେ ପରିଚାଳିତ କରିଥାଏ। ପୁସ୍ତକ ପଠନର ଅଭ୍ୟାସ ଛାତ୍ରଛାତ୍ରୀ ମାନଙ୍କ ଏକାଗ୍ରତା ବଢ଼ାଇବା ସହିତ ସୃଜନଶକ୍ତି ବୃଦ୍ଧି ଦିଗରେ ସହାୟକ ହୋଇଥାଏ ବୋଲି ଶିଶୁଶ୍ରୀ ଭ୍ରାମ୍ୟମାଣ ପାଠାଗାର ତରଫରୁ ଆୟୋଜିତ ପିଲାଙ୍କ ପାଖରେ ପାଠାଗାର କାର୍ଯ୍ୟକ୍ରମରେ ମତ ପ୍ରକାଶ ପାଇଛି। ସ୍ଥାନୀୟ ଏ.ଇ. ଏମ୍ ଇଂରାଜୀ ମାଧ୍ୟମ ବିଦ୍ୟାଳୟ ପରିସର ମଧ୍ୟରେ ସଭାପତି ମନୋରଂଜନ ମେହେରଙ୍କ ଅଧ୍ୟକ୍ଷତାରେ ଅନୁଷ୍ଠିତ ଉକ୍ତ କାର୍ଯ୍ୟକ୍ରମରେ ମୁଖ୍ୟ ଅତିଥି ଭାବେ ଗାନ୍ଧୀ ସ୍ମୃତି ପାଠାଗାରର ସଭାପତି ଅରୁଣ ମହାନ୍ତି, ମୁଖ୍ୟ ବକ୍ତା ଭାବେ ଅବସରପ୍ରାପ୍ତ ପ୍ରଧାନ ଶିକ୍ଷକ ତରଣୀସେନ ବୁଧିଆ ଓ ସମ୍ମାନିତ ଅତିଥି ଭାବେ ବିଦ୍ୟାଳୟର ନିର୍ଦ୍ଦେଶକ ଡ଼ ଯଶବୀର ସିଂ ଯୋଗଦେଇ ଛାତ୍ରଛାତ୍ରୀଙ୍କ ଜୀବନରେ ପୁସ୍ତକର ଉପାଦେୟତା ବିଷୟରେ ବକ୍ତବ୍ୟ ପ୍ରଦାନ କରି ଭଲ ପୁସ୍ତକ ବ୍ୟକ୍ତି ଜୀବନରେ ପ୍ରକୃତ ଆନନ୍ଦ ଆଣିଥାଏ ଓ ଜୀବନର ଗତିପଥ ବଦଳାଇ ଦେଇଥାଏ ବୋଲି କହିଥିଲେ। ଅନ୍ୟ ମାନଙ୍କ ମଧ୍ୟରେ ବିଦ୍ୟାଳୟର ଶିକ୍ଷକ ରଜତ ଦାଶ, ବିବେକ ପ୍ରଧାନ, ଶିକ୍ଷୟିତ୍ରୀ ରିଙ୍କି ନନ୍ଦ, ବେବିଲତା ଭୋଇ, ମମତାଜ ଖାତୁନ ପୁସ୍ତକ ଓ ପତ୍ର ପତ୍ରିକା ପଠନ ଦିଗରେ ଯତ୍ନବାନ ହେବାକୁ ଛାତ୍ରଛାତ୍ରୀ ମାନଙ୍କୁ ପରାମର୍ଶ ଦେଇଥିଲେ। କାର୍ଯ୍ୟକ୍ରମକୁ ସଂଯୋଜନା କରି 'ଶିଶୁଶ୍ରୀ' ର ଆବାହକ ଡକ୍ଟର ରବିନାରାୟଣ ସାହୁ ପ୍ରତି ମାସରେ ଖଣ୍ଡେ ଶିଶୁ ସାହିତ୍ୟ ଆଧାରିତ ପୁସ୍ତକ ବା ପତ୍ରିକା କିଣିବା ସହିତ ସାଙ୍ଗ ସାଥିଙ୍କ ଜନ୍ମ ଦିନରେ ପୁସ୍ତକ ଉପହାର ଦେବାକୁ ପରାମର୍ଶ ଦେଇଥିଲେ। ପ୍ରଦର୍ଶିତ ପୁସ୍ତକ ମଧ୍ୟରୁ ନିର୍ବାଚିତ ପୁସ୍ତକ ପଠନ କରି ବକ୍ତବ୍ୟ ପ୍ରଦାନ କରିଥିବା ଶ୍ରେଷ୍ଠ ଛାତ୍ରଛାତ୍ରୀ ମାନଙ୍କ ମଧ୍ୟରୁ ଶ୍ରୁତି ଜେନ୍, ଆୟୁଷ ମହାରଣା ଓ ସୌମ୍ୟରଞ୍ଜନ ଦାଶ ଙ୍କୁ ପୁରସ୍କୃତ କରାଯାଇଥିଲା। ବରିଷ୍ଠ ସଦସ୍ୟ ଅଧ୍ୟାପକ ଆଲୋକ ରଂଜନ ଦାଶ ଧନ୍ୟବାଦ ଅର୍ପଣ କରିଥିଲେ।