23-Mar-2025

ବରଗଡ଼:(ନିରଞ୍ଜନ ତ୍ରିପାଠୀ)-ବରଗଡ ଜିଲ୍ଲା ସୋହେଲା ବ୍ଲକ ସ୍ତରୀୟ ଶୈକ୍ଷିକ ବିକାଶ ଭ୍ରମଣ ଅନୁଷ୍ଠିତ ହୋଇ ଯାଇଛି । ସୋହେଲା ବ୍ଳକ ଅନ୍ତର୍ଗତ ଷୋହଳ କ୍ଲଷ୍ଟରରୁ ପ୍ରାଥମିକ ଓ ଉଚ୍ଚ ପ୍ରାଥମିକ ବିଦ୍ୟାଳୟର ତିନି ଜଣ ଛାତ୍ର ଛାତ୍ରୀ ଏହି ଭ୍ରମଣରେ ଯାଇଥିଲେ । ଅମ୍ବାଭୋନାସ୍ଥିତ ପ୍ରସିଦ୍ଧ ଐତିହାସିକ ତଥା ଆଧ୍ୟାତ୍ମିକ ଅଷ୍ଟଶମ୍ଭୁ ଶୈବପୀଠରେ ଛାତ୍ର ଛାତ୍ରୀମାନେ ମନ୍ଦିରର ଇତିହାସ ତଥା ପ୍ରାକୃତିକ ପରିବେଶ ଉପଭୋଗ  କରିଥିଲେ । ମନ୍ଦିରର ପୂଜକ ଧୃବ ଗିରି ଛାତ୍ର ଛାତ୍ରୀଙ୍କୁ ମନ୍ଦିରର ଇତିହାସ ବିଷୟରେ ବୁଝାଇଥିଲେ । ଏହା ସହ ସ୍ଥାନୀୟ ଆଦର୍ଶ ବିଦ୍ୟାଳୟକୁ ଯାଇ ବିଜ୍ଞାନ ଗାର, ପାଠାଗାର ପରିଦର୍ଶନ କରିଥିଲେ । ଏହି ଅନୁଷ୍ଠାନର ଅଧ୍ୟକ୍ଷ ସୁଧାମୟ ତ୍ରିପାଠୀ ସମସ୍ତଙ୍କୁ ସ୍ବାଗତ କରିଥିଲେ ତଥା ଉପସ୍ଥିତ ଶିକ୍ଷକଶିକ୍ଷୟିତ୍ରୀ ମାନେ ଛାତ୍ରଛାତ୍ରୀଙ୍କୁ ମାର୍ଗଦର୍ଶନ କରିଥିଲେ । ଏହାପରେ ସେମାନେ ଜାତୀୟ ହସ୍ତତନ୍ତ ପ୍ରତିଷ୍ଠାନକୁ ଭ୍ରମଣ କରିଥିଲେ । ଏହି ଅନୁଷ୍ଠାନର ବିଭିନ୍ନ ଯନ୍ତ୍ରପାତିକୁ ଛାତ୍ର ଛାତ୍ରୀ ମାନେ ଦେଖିଥିଲେ । ଅନୁଷ୍ଠାନର ବରିଷ୍ଠ ପ୍ରାଧ୍ଯାପକ ଦେବେନ୍ଦ୍ର ଯାଦବଙ୍କ ସହ କର୍ମକର୍ତ୍ତା ଛାତ୍ର ଛାତ୍ରୀଙ୍କୁ ବିଭିନ୍ନ ହସ୍ତତନ୍ତ ଯନ୍ତ୍ର ବିଷୟରେ ବୁଝାଇଥିଲେ । ବୈଜ୍ଞାନିକ ମନୋଭାବର ବିକାଶ ନିମନ୍ତେ ଛାତ୍ର ଛାତ୍ରୀମାନେ ବରଗଡ଼ ଜିଲ୍ଲା ବିଜ୍ଞାନ କେନ୍ଦକୁ ଭ୍ରମଣରେ ଯାଇଥିଲେ । ଏଠାରେ ବିଭିନ୍ନ ବିଜ୍ଞାନ ବିଷୟର ଉପକରଣ , ଥ୍ରି ଡି ସୋ ଦେଖିବା ସହ ବିଜ୍ଞାନ ଉଦ୍ଯାନରେ ବୁଲିଥିଲେ । ଅନୁଷ୍ଠାନ ଦାୟିତ୍ବରେ ଥିବା ଗୋପୀନାଥ ପଧାନ ବିଭିନ୍ନ ବିଷୟରେ ଛାତ୍ର ଛାତ୍ରୀଙ୍କୁ ବୁଝାଇଥିଲେ । ସୋହେଲା ବିଇଓ ଅମୃତା ସାହୁଙ୍କ ପ୍ରତ୍ଯକ୍ଷ ତତ୍ତ୍ବାବଧାନ ତଥା ଏବିଇଓ ମନୋହର ଉଟୀଙ୍କ ସଂଯୋଜନାରେ ଏହି ଶୈକ୍ଷିକ ବିକାଶ ଭ୍ରମଣ ଅନୁଷ୍ଠିତ ହୋଇ ଥିଲା । ଅବସରପ୍ରାପ୍ତ ଏବିଇଓ ଗୋଲାପଚାନ୍ଦ ମିଶ୍ର ଏହି ଭ୍ରମଣରେ ସାମିଲ ହୋଇଥିଲେ । ପ୍ରତ୍ଯେକ କ୍ଲଷ୍ଟରରୁ ଯାଇଥିବା ଜଣେ ଲେଖାଏଁ ମାର୍ଗଦର୍ଶକ ଶିକ୍ଷକ ଶିକ୍ଷୟିତ୍ରୀଙ୍କ ସହ ସିଆରସିସି , ଅଫିସ କର୍ମକର୍ତ୍ତା କାର୍ଯ୍ୟକ୍ରମ ପରିଚାଳନାରେ ସହଯୋଗ କରିଥିଲେ।