22-Mar-2025

ବରଗଡ଼:(ନିରଞ୍ଜନ ତ୍ରିପାଠୀ)- ଆଜି ବରଗଡ଼ ଜିଲ୍ଲା ଅତାବିରା ଜଗନ୍ନାଥ ମନ୍ଦିର ସୁବର୍ଣ୍ଣ ଜୟନ୍ତୀ ମହୋତ୍ସବ ଆଜି କଳସ ଯାତ୍ରା ଆରମ୍ଭ ହୋଇଯାଇଛି । ଏଥିପାଇଁ ସୁବର୍ଣ୍ଣ ଜୟନ୍ତୀ କମିଟିର ସଭାପତି ଦୈତାରି ପ୍ରଧାନଙ୍କ ନେତୃତ୍ବରେ ଲାଦରପାଲି ରାମବାବା ମଠ ପୋଖରୀରେ ପୂଜାର୍ଚ୍ଚନା କରାଯାଇ ସେଠାରୁ ପୂର୍ଣ୍ଣ କଳସ ଧରି ଶତାଧିକ ମହିଳାମାନଙ୍କ ଏକ ଶୋଭାଯାତ୍ରା ବାହାରିଥିଲା । ଶୋଭାଯାତ୍ରା ଜାତୀୟ ରାଜପଥ ୫୩ ଉପରେ ହନୁମାନ ମନ୍ଦିର, ଦୂର୍ଗାମନ୍ଦିର, ସମଲେଶ୍ବରୀ ମନ୍ଦିର,ନୃସିଂହ ମନ୍ଦିର ଏବଂ ଜଗନ୍ନାଥ ମନ୍ଦିର ଦେଇ ଯଜ୍ଞମଣ୍ଡପ ପର୍ଯ୍ୟନ୍ତ ଯାଇଥିଲା । ଜଗନ୍ନାଥଙ୍କ ଚିତ୍ର ସହିତ ରେଶମର ସଂପ୍ରଦା, ଲହଣ୍ଡା ର କରମସାନୀ, ଅତାବିରାର ଦୁଲଦୁଲି ବାଜା , ହୀରାକୁଦ ର ଘଣ୍ଟ ବାଦ୍ୟ ଭାଗ ନେଇଥିଲା । ଯଜ୍ଞ ମଣ୍ଡପରେ କଳସ ପହଞ୍ଚିବା ପରେ ପୂଜାକାର୍ଯ୍ୟ ଆରମ୍ଭ ହୋଇଥିଲା । ପ୍ରଥମ ଦିନରେ ଯଜ୍ଞଶାଳା ପୂଜନ ଏବଂ ଯଜ୍ଞ ଆରମ୍ଭ ହୋଇଥିଲା । ଏହା ସହିତ ତ୍ରୀଦିନାତ୍ମକ ନବ କୁଣ୍ଡୀୟ ଗୀତା ଯଜ୍ଞ ଆରମ୍ଭ ହୋଇଛି । ପୂଜାକାର୍ଯ୍ୟ ପଣ୍ଡିତ ଜୟକୁମାର ଦାଶ,ପଣ୍ଡିତ ସଞ୍ଜୟ ଦାଶ ଓ ସହଯୋଗୀ ଏବଂ ସପତ୍ନିକ ୨୭ ଯୋଡ଼ି କର୍ତ୍ତା ଦାୟୀତ୍ବ ତୁଲାଉଛନ୍ତି । ଏହି କଳସଯାତ୍ରା ରେ ମୁସଲିମ ସମ୍ପ୍ରଦାୟ ନିଜର ଭାଇଚାରା ପ୍ରଦର୍ଶନ ପୂର୍ବକ ମହିଳାମାନଙ୍କୁ ଗ୍ଲୁକୋନ ଦେଇଥିଲେ । ଅତାବିରା ରେ ନୁହଁ ବର୍ଷ ବର୍ଷ ଧରି ଏଭଳି ଉଭୟ ସଂପ୍ରଦାୟ ମଧ୍ୟରେ ସଦଭାବ ରହି ଆସିଛି। ଏହି ଭାବନା ପ୍ରତିବର୍ଷ ଦଶହରା ଦୁର୍ଗା ପୂଜା ସମୟରେ ମଧ୍ୟ ଦେଖିବାକୁ ମିଳିଥାଏ । 
ସେହିପରି ରାସ୍ତାରେ ବିଭିନ୍ନ ସମାଜ ଦହି ସରବତ ର ବ୍ୟବସ୍ଥା କରିଥିଲେ । କଳସ ଯାତ୍ରାରେ ଅତାବିରା ର ବିଭିନ୍ନ ସାମାଜିକ, ଧାର୍ମିକ,ମୁସଲିମ ସମ୍ପ୍ରଦାୟ ସମେତ ଆଖପାଖ ଗ୍ରାମର ଲୋକେ ସହଯୋଗ କରିଥିଲେ।  ଭକ୍ତମାନଙ୍କ ପାଇଁ ଅନ୍ନଭୋଗର ବ୍ୟବସ୍ଥା କରାଯାଇଥିଲା । ସାଂସ୍କୃତିକ କାର୍ଯ୍ୟକ୍ରମରେ ସନ୍ଧ୍ୟାରେ ଗୋଶାଳା ଭଜନ ମଣ୍ଡଳୀ କ୍ରୀଷ୍ଣା ଓ ଦଳ ଓ ଲୋକ ମହୋତ୍ସବ ପ୍ରଦର୍ଶିତ ହୋଇଥିଲା । ଏଥିରେ ବୋଧନ ସାଂସ୍କୃତିକ ଅନୁଷ୍ଠାନ, ତୋରା, ଶତୃଘ୍ନ ସୁଲହ ଭରନୀ ସାଂସ୍କୃତିକ ଅନୁଷ୍ଠାନ, ଆଇଁଲା ପାଲି, ବାରପାହାଡ କଳା ପରିଷଦ , କନକବିରା , କୁରେଫୁଲ ସାଂସ୍କୃତିକ ଅନୁଷ୍ଠାନ ଅତାବିରା ଓ ମା ସମଲେଶ୍ଵରୀ ଢ଼ଲିଆଖସା ବରଗଡ଼ ର କଳାକାର ମାନେ ସାଂସ୍କୃତିକ କାର୍ଯ୍ୟକ୍ରମ ପରିବେଷଣ କରିଥିଲେ । ସାଂସ୍କୃତିକ କାର୍ଯ୍ୟକ୍ରମ କୁ ଅର୍ଚ୍ଚନା ବାଗ ସଂଯୋଜନା କରିଥିଲେ।