18-Mar-2025

ଆଗଲପୁର, (ପ୍ରେରଣା ଖବର) ଆଜି ଆଗଲପୁର ପଞ୍ଚାୟତ ସମିତି କାର୍ଯ୍ୟାଳୟରେ ଯୁଗ୍ମ ଅଭିଯୋଗ ଶୁଣାଣୀ ଶିବିର ଅନୁଷ୍ଠିତ ହୋଇଥିଲା l ବଲାଙ୍ଗୀର ଜିଲ୍ଲାର ଜିଲ୍ଲାପାଳ ଓ ଜିଲ୍ଲା ଆରକ୍ଷୀ ଅଧିକ୍ଷକ ଯୋଗ ଦେଇଥିଲେ l ଏହାସହ ଜିଲ୍ଲା ସ୍ତରୀୟ ସମସ୍ତ ବିଭାଗର ଅଧିକାରୀ ସହ ଆଗଲପୁର ଗୋଷ୍ଠୀ ଉନ୍ନୟନ ଅଧିକାରୀ ଶ୍ରୀ ମହାପାତ୍ର କୁଲଦୀପ ମହାନ୍ତି ମଧ୍ୟ ଶିବିର ରେ ଉପସ୍ଥିତ ଥିଲେ l ଆଜିର ଯୁଗ୍ମ ଅଭିଯୋଗ ଶୁଣାଣୀ ଶିବିର ରେ ବିଭିନ୍ନ ସମସ୍ୟା ଉପରେ ସର୍ବ ମୋଟ 47 ଟି ଅଭିଯୋଗ ପଞ୍ଜୀକୃତ ହୋଇଥିବା ଜଣା ପଡ଼ିଛି l ବିଶେଷ କରି ପାନୀୟ ଜଳ ଯୋଗାଣ କୁ ନେଇ ଡୁଡ଼ୁକା ଗ୍ରାମରୁ ଅନେକ ମହିଳା ଓ ପୁରୁଷ ଆସି ଅଭିଯୋଗ କରିଥିଲେ ଓ ତାଙ୍କ ଭିତରେ ତୀବ୍ର ଅସନ୍ତୋଷ ଦେଖିବାକୁ ମିଳିଥିଲା। ଗତ ୨ ବର୍ଷ ପାଖାପାଖି ହେଲାଣି ଗ୍ରାମରେ ପାନୀୟ ଜଳ ଯୋଗାଣ ଚାଲୁ ଅଛି। ହେଲେ ଆଜି ପର୍ଯ୍ୟନ୍ତ କିଛି ଲୋକ ପାନୀୟ ଜଳ ପାଇବାରୁ ବଞ୍ଚିତ ଅଛନ୍ତି।

ପାଣି ପାଇବା ତ ଦୂର କଥା ଅନେକ ଜାଗାକୁ ପାଣି ପାଇପ୍ ମଧ୍ୟ ଏ ଯାଏ ଦିଆ ଯାଇ ନାହିଁ। ଏ ବିଷୟରେ ସରପଞ୍ଚ ଠୁ ନେଇ ବିଭାଗୀୟ ଯନ୍ତ୍ରୀ ଙ୍କୁ ବାରମ୍ବାର ଅଭିଯୋଗ କରିଥିଲେ ସୁଦ୍ଧା ଲୋକେ ପାଣି ପାଇବାରୁ ବଞ୍ଚିତ ଅଛନ୍ତି। ଅଭିଯୋଗ ଶୁଣାଣୀ ଶିବିର ସରିବା ପରେ ମହିଳା ମାନେ ବାହାରେ ବିଭାଗୀୟ ଯନ୍ତ୍ରୀ ଓ ଜିଲ୍ଲା ରୁ ଆସିଥିବା ଅଧିକାରୀ ଙ୍କୁ ଘେରି ଥିଲେ। ତାଙ୍କୁ ଘେରିବା ସହିତ ତୀବ୍ର ଅସନ୍ତୋଷ ପ୍ରକାଶ କରି ଯନ୍ତ୍ରୀ ଓ ଅଧିକାରୀଙ୍କୁ ସମସ୍ୟାର ସମାଧାନ ପାଇଁ ଆଉ କେତେଦିନ ଲାଗିବ ବୋଲି ପ୍ରଶ୍ନ କରିଥିଲେ। ଡୁଡୁକା ପଞ୍ଚାୟତ ର ସରପଞ୍ଚ ଓ ସମିତି ସଭ୍ୟ ମଧ୍ୟ ଉପସ୍ଥିତ ଥିଲେ। ବିଭାଗୀୟ ଅଧିକାରୀ ଏ ବିଷୟରେ ତୁରନ୍ତ ପଦକ୍ଷେପ ନିଆଯିବ ବୋଲି ମହିଳା ମାନଙ୍କୁ ପ୍ରତିଶ୍ରୁତି ଦେଇଥିଲେ। ପାନୀୟ ଜଳ ଯୋଗାଣ କୁ ନେଇ ଅନେକ ପଞ୍ଚାୟତ ରେ ସମସ୍ୟା ଥିବା ଖବର ଆମ ପାଖକୁ ଆସିଛି l ପ୍ରଶାସନ ଏ ଦିଗରେ ଧ୍ୟାନ ଦେବାକୁ ଲୋକେ ଦାବୀ କରିଛନ୍ତି l