31-Dec-2024

ବରଗଡ:(ନିରଞ୍ଜନ ତ୍ରିପାଠୀ)-ସଂଯୁକ୍ତ କୃଷକ ସଂଗଠନର କର୍ମୀ ଏବଂ କୃଷକ ମାନେ ବରଗଡ଼ ଜିଲ୍ଲାପାଳ କାର୍ଯ୍ୟାଳୟ ସମ୍ମୁଖରେ ପଞ୍ଚମ ଦିନ ହେବ ଧାରଣାରେ  ବସିଛନ୍ତି। ସେମାନଙ୍କ ଗୋଟିଏ ଦାବୀ ମଣ୍ଡିରେ ପଡ଼ିଥିବା ଧାନ ବିନା କଟନୀ ଏବଂ ଦଲାଲ ମୁକ୍ତ ଭାବେ କେବେ ହେବ। ଉତ୍ତର ନାହିଁ ଜିଲ୍ଲା ପ୍ରଶାସନ ପାଖରେ। ସେଥିପାଇଁ ଧାରଣା ସ୍ଥଳକୁ କୌଣସି ଅଧିକାରୀ ଆସୁନାହାନ୍ତି। ମିଲର ମାନଙ୍କ ଲବି ସମ୍ମୁଖରେ କାମ ଦେଉନାହିଁ ମଣ୍ଡି ପରିଚାଳନା କମିଟି, ସୁପରଭାଇଜର, ପ୍ରଶାସନିକ ଅଧିକାରୀ, ନେତାମନ୍ତ୍ରୀଙ୍କ ପାୱାର ।ସେଥିପାଇଁ ଆନ୍ଦୋଳନ କାରୀଙ୍କ ସମସ୍ୟାର ସମାଧାନ ହୋଇ ପାରୁନାହିଁ। ଆଜି ମନ୍ଥର ଗତିରେ ଧାନ ଉଠୁ ନ ଥିବା  କୁମ୍ଭାରୀ, ତୁଳଣ୍ଡି, ତେନ୍ତୁଲିଟିକ୍ରା, ଭେଡେନ, କୁବେଡେଗା, ବରା, ଘେଁସ ମଣ୍ଡିର କୃଷକ ମାନେ ଆସି ଆନ୍ଦୋଳନରେ ଝାସ ଦେଇଛନ୍ତି। ସେମାନେ ଧାନ ବିକ୍ରି ନ ସରିବା ପର୍ଯ୍ୟନ୍ତ ଧାରଣା ଜାରି ରଖିବାକୁ ନିଷ୍ପତ୍ତି ନେଇଥିଲେ। ଆସନ୍ତାକାଲି ନୂତନ ବର୍ଷ ଏବଂ କେନାଲ ପାଣି ଛଡ଼ାଯିବ। ଚାଷୀ ନୂତନ ଚାଷ କରିବ ନାଁ ଧାନ ବିକ୍ରି ପାଇଁ ଅପେକ୍ଷା କରିବ ବୋଲି ସଭାରେ ଚର୍ଚ୍ଚା ହେଉଛି। ଚାଷୀଙ୍କୁ ଜାଣିଶୁଣି ହଇରାଣ କରାଯାଉଛି କାରଣ ତାହାର ଉତ୍ପାଦନ ସାମଗ୍ରୀ ଶସ୍ତା ଦରରେ ମଧ୍ୟସ୍ଥି କୁ ଦେଇଦେବ ହେଲେ ଚାଷୀଙ୍କ ସଂଗଠିତ ପ୍ରୟାସ ଜିଲ୍ଲା ପ୍ରଶାସନର ମୁଣ୍ଡବିନ୍ଧାର କାରଣ ପାଲଟିଛି। ଏହି ଧାରଣାକୁ ସୋନପୁର କୃଷକ ସଂଗଠନ ପ୍ରଦ୍ୟୁମ୍ନ ପାଢ଼ୀ, ବିଜୟ ନାୟକ, ଶୁଭମ ସାହୁ ପ୍ରମୁଖ ଧାରଣା ସ୍ଥଳକୁ ଆସି ସମର୍ଥନ ଦେଇଥିବା ବେଳେ ସଂଗଠନ ରମେଶ ମହାପାତ୍ର, ଅରବିନ୍ଦ ପଣ୍ଡା, ସୁରେଶ ନିକେଣ୍ଟି, ପୁରୋହିତ ପୋଡ଼, ନରେଶ ପଧାନ, ବିନୋଦ ପଧାନ, କାଁହୁ ପଧାନ, ହାରାଧନ ସାହୁ, ବିଜୟ ଲହରିୟା, ବିଜୟ ପଧାନ , ସଂଜୀବ ପଧାନ, ପ୍ରକାଶ ପଧାନ, ବିଦ୍ୟାଧର ସାହୁ, ଭାତୁ ଗଡତିଆ, କ୍ଷୀରୋଦ୍ର ମାଝୀ, ଥବିର ସାହୁ ଏବଂ ନିରଞ୍ଜନ ପଧାନ ଧାରଣା ର ନେତୃତ୍ୱରେ ଧିରେଧିରେ ସମୁଦ୍ରର ଜୁଆର ଭଳି ଧାରଣାରେ ଚାଷୀ ମାନେ ଧାରଣାରେ ବସି ଚାଲିଥିବା ଦେଖିବାକୁ ମିଳୁଛି ।