09-Feb-2024

ବୀରମହାରାଜପୁର, (ବିନୋଦ ପାଣ୍ଡେ ) : ଜଳାଭାବ ପରିସ୍ଥିତିରେ ଚାଷ ଜମିକୁ ଜଳଯୋଗାଣ ଉଦ୍ଦେଶ୍ୟରେ ଚେକ୍ ଡ଼୍ୟାମ ନିର୍ମାଣ ପାଇଁ ସରକାରଙ୍କ ପକ୍ଷରୁ ଅନୁଦାନ ଯୋଗାଇ ଦିଆଯାଉଛି। ନିର୍ମାଣ ହେଉଛି ସତ କିନ୍ତୁ ଅନେକ ସ୍ଥାନରେ ନିମ୍ନମାନର କାମ ଅର୍ଦ୍ଧ ନିର୍ମିତ କରି ଟଙ୍କା ହଡପ କରାଯାଉଛି।  ଚାଷ ଜମି ନଥିବା  ସ୍ଥାନ ମାନଙ୍କରେ ନିର୍ମାଣ ହୋଇଥିବା ଦେଖିବାକୁ ମିଳିଛି । ଅନେକ ପ୍ରକଳ୍ପ ରକ୍ଷଣାବେକ୍ଷଣ କିମ୍ବା ତଦାରଖ କରାଯାଉ ନଥିବାରୁ ଚାଷୀଙ୍କ କାମରେ ଉକ୍ତ ପ୍ରକଳ୍ପ ଲାଗିବାରୁ ନାହିଁ। ବୈଷୟିକ କ୍ଷେତ୍ରରେ ମଧ୍ୟ ଅବହେଳା ଯୋଗୁଁ ପ୍ରକଳ୍ପ ଅକାମୀ ହୋଇ ପଡି ରହିଛି। ଏବଂ  ବିଭିନ୍ନ ଆଲରେ ସରକାର ଙ୍କ ଅନୁଦାନ କେତେକ କ୍ଷେତ୍ରରେ ବାଟମାରଣା ହେଉଥିବା ସହ ଚାଷୀ ଉପକୃତ ହୋଇପାରୁନାହିଁ। ଏହାର ଏକ ସଦ୍ୟ ଦୁଷ୍ଟାନ୍ତ ଦେଖିବାକୁ ମିଳିଛି ସୁବର୍ଣ୍ଣପୁର ଜିଲ୍ଲା ବୀରମହାରାଜପୁର ବ୍ଲକ ଖଣ୍ଡହତା ପଞ୍ଚାୟତ ଅନ୍ତର୍ଗତ ସାହଜଲଥା ଗ୍ରାମରେ ।
ଗ୍ରାମର ଚାଷୀଙ୍କ ସୁବିଧା ଦୃଷ୍ଟିରୁ ଉକ୍ତ ଗ୍ରାମ ନିକଟସ୍ଥ ଜଙ୍ଗଲ ନିକଟରେ ଥିବା ନାଳରେ ଉପରେ ଏକ ଚେକ୍  ଡ଼୍ୟାମ ନିର୍ମାଣ ହୋଇଛି। ଉକ୍ତ ସ୍ଥାନରୁ ଚାଷ ଜମିକୁ ପାଣି ମାଡିବା ପାଇଁ କେନାଲ ନିର୍ମାଣ ଲାଗି ଜିଲ୍ଲା କ୍ଷୁଦ୍ର ଜଳ ସେଚନ ବିଭାଗ ପକ୍ଷରୁ ୨୦୨୨-୨୩ ରେ ୧୮ଲକ୍ଷ ୮୩ ହଜାର ୫୬୫ ଟଙ୍କା ବ୍ୟୟବରାଦ ହୋଇଥିଲା। ଯନ୍ତ୍ରୀ ଓ  ଠିକାଦାର ମଧୁଚନ୍ଦ୍ରିକା ରେ  ଲୋକ ଦେଖାନିଆ ଭାବେ ଗାଁ ମୁଣ୍ଡରେ ନିମ୍ନ ମାନର  କେନାଲ କାମ କରି ଟଙ୍କା ଆତ୍ମସାତ କରିଥିବା ଗ୍ରାମବାସୀ ଅଭିଯୋଗ କରିଛନ୍ତି। ତୁରନ୍ତ ଜିଲ୍ଲା ପ୍ରଶାସନ ଏଥିପ୍ରତି ଦୃଷ୍ଟି ଦେବା ସହ ଉଚ୍ଚ ସ୍ତରୀୟ ତଦନ୍ତ ପାଇଁ ଦାବି ହେଉଛି।