02-Feb-2024

ସୁବର୍ଣ୍ଣପୁର (ମନୋରଞ୍ଜନ ତ୍ରିପାଠୀ )
ସୁବର୍ଣ୍ଣପୁର ଜିଲ୍ଲାପାଳ ଶ୍ରୀମତୀ  ଅନ୍ୟା ଦାଶ ଙ୍କ ଅଧ୍ୟକ୍ଷତାରେ ଆଜି ଆସନ୍ତା  ସାଧାରଣ  ନିର୍ବାଚନର ବ୍ୟବସ୍ଥିତ  ତଥା ଅବାଧ, ନିରପେକ୍ଷ, ଶାନ୍ତି ଶୃଙ୍ଖଳା ର ସୁପରିଚାଳନା ପାଇଁ  ପ୍ରସ୍ତୁତି ବୈଠକ ଅନୁଷ୍ଠିତ ହୋଇଯାଇଛି  l ଜିଲ୍ଲାପାଳଙ୍କ  ସମ୍ମିଳନୀ କକ୍ଷରେ ଆୟୋଜିତ ଏହି  ବୈଠକରେ  ଅତିରିକ୍ତ ଜିଲ୍ଲାପାଳ ଅଞ୍ଜଳିନା ପ୍ରଧାନ, ଜିଲ୍ଲା ମୁଖ୍ୟ ଉନ୍ନୟନ ଅଧିକାରୀ  ଅଶ୍ଵିନି ମେହେର, ଉପଜିଲ୍ଲାପାଳ ସୋନପୁର ସୂରଜ କୁମାର ପଟ୍ଟନାୟକ , ଉପଜିଲ୍ଲାପାଳ ବୀରମହାରାଜପୁର ଲଲାଟେନ୍ଦୁ  ସି,  ଉପ ଆରକ୍ଷୀ ଅଧୀକ୍ଷକ ହେମନ୍ତ  କୁମାର  ପାଢ଼ୀ, ଅବକାରୀ ଅଧୀକ୍ଷକ  ସୁମତୀ  ତ୍ରିପାଠୀ ,ସମସ୍ତ ବିଡିଓ, ତହସିଲଦାର , ଡେପୁଟି କଲେକ୍ଟର ନିର୍ବାଚନ ବିଭାଗ ଯଶସ୍ୱନି ପୋଥାଳ ଏବଂ ନିର୍ବାଚନ ସହିତ ସମ୍ପୃକ୍ତ ସମସ୍ତ ଜିଲ୍ଲା ସ୍ତରୀୟ ଅଧିକାରୀ ପ୍ରମୁଖ  ଯୋଗ ଦେଇଥିଲେ I ପ୍ରାରମ୍ଭ ରେ ଜିଲ୍ଲାପାଳ  ସମସ୍ତଙ୍କୁ  ସ୍ଵାଗତ କରି ଜିଲ୍ଲାରେ ଆଗାମୀ ସାଧାରଣ ନିର୍ବାଚନ କିଭଳି ଭାବରେ ଶାନ୍ତିପୂର୍ଣ୍ଣ ଏବଂ ବ୍ୟବସ୍ଥିତ ଢଙ୍ଗରେ  ହୋଇପାରିବ ସେଥିପାଇଁ  ସମସ୍ତଙ୍କ ସହଯୋଗ  କାମନା  କରିଥିଲେ I  ଏହାପରେ  ନିର୍ବାଚନ ସମ୍ଵନ୍ଧିୟ  ସମସ୍ତ ପ୍ରସ୍ତୁତି ର ବ୍ଲକ୍ ୱାରି ସମୀକ୍ଷା କରିଥିଲେ I ପ୍ରତିଟି ବୁଥ ରେ ଅସମ୍ପୂର୍ଣ୍ଣ  କୋଠା  ର ନିର୍ମାଣ ଶେଷ  କରିବା, ବିଦ୍ୟୁତ ସଂଯୋଗ, ଶୌଚାଳୟ ,  ରାମ୍ପ ନିର୍ମାଣ , ପିଇବା ପାଣି  ସୁବିଧା କରିବା ଉପରେ ଜିଲ୍ଲାପାଳ  ଗୁରୁତ୍ୱ ଦେଇଥିଲେ I ଜିଲ୍ଲା ରେ ଥିବା ସମସ୍ତ 586 ଟି ବୁଥ ପାଇଁ ନିର୍ବାଚନ ଅଧିକାରୀ ମନୋନୀତ  କରି ସେମାନଙ୍କୁ ଆବଶ୍ୟକ ତାଲିମ୍ ଦେବା, ସେକ୍ଟର ଅଫିସର  ମାନଙ୍କୁ ନିଯୁକ୍ତି  ତଥା ତାଲିମ ଦେବା ପାଇଁ ଆବଶ୍ୟକ ପଦକ୍ଷେପ ନେବା ଉପରେ ଆଲୋଚନା ହୋଇଥିଲା  l ଫେବ୍ରୁଆରି ମାସ ଶେଷ  ସୁଦ୍ଧା ଜିଲ୍ଲାର ସମସ୍ତ ଉନ୍ନୟନ କାର୍ଯ୍ୟ ଯୁଦ୍ଧକାଳୀନ ଭିତ୍ତିରେ ସମାପ୍ତ କରିବା ପାଇଁ ଜିଲ୍ଲପାଳ ବିଡିଓ ଏବଂ ତହସିଲଦାର ମାନଙ୍କୁ ନିର୍ଦ୍ଦେଶ ଦେଇଥିଲେ l ନିର୍ବାଚନ ପର୍ୟ୍ୟନ୍ତ ପ୍ରତି ସପ୍ତାହରେ ଦୁଇଥର ପ୍ରସ୍ତୁତି  ସମୀକ୍ଷା ବୈଠକ କରିବା ପାଇଁ ଜିଲ୍ଲାପାଳ ନିର୍ଦ୍ଦେଶ ଦେଇଥିଲେ l