31-Jan-2024

ସୋନପୁର,(ମଳୟ ମିଶ୍ରଙ୍କ ରିପୋର୍ଟ )  ଗତ ନଭେମ୍ବର ୨୨ ତାରିଖରୁ ଘରୁ ନିଖୋଜ ବୀରମହାରାଜପୁର ଥାନା ହିକୁଡି ଫାଣ୍ଡିର କେଶେଲପୁରା ଗ୍ରାମର ଶିକ୍ଷକ ଲୋକନାଥ ନାଏକ (୩୮)ଙ୍କର ମୃତଦେହ ପରଦିନ ସୋନପୁର ଥାନା ଅନ୍ତର୍ଗତ ବିଜୁସେତୁ ପାଖର ମହାନଦୀର  ଆବଦ୍ଧ ଅଳ୍ପପାଣିରେ ଭାସୁଥିବା ଅବସ୍ଥାରେ ପୁଲିସ୍ ଉଦ୍ଧାର କରିଥିଲା । ଖବର ପାଇ ଘରଲୋକେ ଶବକୁ ଡାକ୍ତରଖାନାରୁ ଆଣି ସେତୁଠାରେ ସୋନପୁର- ବୀରମହାରାଜପୁର ରାସ୍ତାରୋକ କରି ହତ୍ୟା ଅଭିଯୋଗ କରିଥିଲେ ।  ଏ ସମ୍ପର୍କରେ ସୋନପୁର ଥାନାରେ ଏକ ମାମଲା ଋଜୁ କରାଯାଇ ପୁଲିସ୍ ତଦନ୍ତ କରୁଛି ।  ଥାନାର ଏସ୍ ଆଇ ଲମ୍ବୋଦର ଡାଙ୍ଗ ଏହାର ତଦନ୍ତ ଅଧିକାରୀ ଥିଲେ ।ପୋଷ୍ଟମର୍ଟମ୍ ରିପୋର୍ଟ ମିଳିବା ପରେ ମୃତ୍ୟୁର କାରଣ କହିହେବ ବୋଲି ପୁଲିସ୍ କହିଥିଲା ।  

ସୁବର୍ଣ୍ଣପୁର ଜିଲ୍ଲା ମୁଖ୍ୟ ଚିକିତ୍ସାଳୟରେ ତାଙ୍କର ପୋଷ୍ଟମର୍ଟମ୍ କରାଯାଇଥିଲା ଓ  ବହୁବାର ମାଗିବା ପରେ ଉକ୍ତ ପୋଷ୍ଟମର୍ଟମ୍ ରିପୋର୍ଟଟି ଗତ  ୨୩ । ୧୧ ୨୦୨୩ ତାରିଖରେ ଡା. କୃତ୍ତିବାସ ସୁବୁଦ୍ଧିଙ୍କ ଦ୍ବାରା କରାଯାଇଥିବା ଉକ୍ତ ପୋଷ୍ଟମର୍ଟମ୍ ରିପୋର୍ଟଟିରେ ୩୦ । ୧୧ । ୨୦୨୩ ତାରିଖ ଥିବା ଓ ୧୬ । ୧୨ । ୨୦୨୩ ତାରିଖରେ ସିଡିଏମଓଙ୍କ ସ୍ବାକ୍ଷର କରାଯାଇ ମୃତକଙ୍କ ଘରଲୋକଙ୍କୁ ଗତ ଡିସେମ୍ବର ୧୯ ତାରିଖରେ ମିଳିଛି । ତେବେ ଏହି ରିପୋର୍ଟଟିରେ ମୃତ୍ୟୁର କାରଣ ଉଲ୍ଲେଖ କରା ନଯାଇ ଭିସେରା ବା ଅଧିକ ପରୀକ୍ଷଣ ନିମନ୍ତେ ଭୁବନେଶ୍ବରକୁ ପଠାଯିବ ବୋଲି କୁହାଯାଉଥିଲେ ହେଁ ଅଦ୍ୟାବଧି  ' ପଠାଗଲାଣି ', 'ଆଜି ପଠାଯିବ' ଇତ୍ୟାଦି କାଳକ୍ଷେପଣ କରାଯାଇ ଆସୁଥିବା ଓ ଅଦ୍ୟାବଧି ଘଟଣାର ପ୍ରାୟ ତିନିମାସ ବିତିଯାଇଥିଲେ ମଧ୍ୟ ଅଦ୍ୟାବଧି ପଠାଯାଇ ନଥିବା ଜଣାଯାଇଛି l

ଉଲ୍ଲେଖନୀୟ ଯେ ଇତିମଧ୍ୟରେ ଉକ୍ତ ମାମଲାର ତଦନ୍ତକାରୀ ଦାୟିତ୍ୱରେ ଥିବା ଏସ୍ ଆଇ ଲମ୍ବୋଦର ଡାଙ୍ଗଙ୍କର ତରଭାକୁ ବଦଳି ହୋଇଯାଇଛି ଓ ସେ ଚାର୍ଜ ଦେଇ ନଥିବା କୁହାଯାଉଛି । ସେହିପରି ସୋନପୁର ଥାନାର ଆଇ ଆଇ ସି ପଦ୍ମାସିନୀ ମେହେରଙ୍କୁ ବିଭିନ୍ନ ଛୁଟି ଓ ଡିଉଟିରୁ ଫୁର୍ ସତ୍ ମିଳୁନାହିଁ ଏବଂ ଘରଲୋକେ ଥାନାକୁ ଦୌଡି ଦୌଡି ନିରାଶ ହୋଇପଡିବାରୁ ଏହାର ଉଚ୍ଚସ୍ତରୀୟ ତଦନ୍ତ ନିମନ୍ତେ  ମୁଖ୍ୟମନ୍ତ୍ରୀଙ୍କ ଅଭିଯୋଗ ପ୍ରକୋଷ୍ଠ , ସମ୍ବଲପୁର ଆଇଜି , ସୁବର୍ଣ୍ଣପୁର ଏସ୍ ପି ଓ ସୋନପୁର ଆଇଆଇସିଙ୍କୁ ରେଜିଷ୍ଟ୍ରୀଡାକରେ ଲିଖିତ ଅଭିଯୋଗ ପଠାଇଥିଲେ ମଧ୍ୟ ତାହାର ଡାକ ରସିଦ୍ ଆସିନାହିଁ ।  ଏପରିକି ' ମୋ ସରକାର ' ବା ୫-ଟି କୁ ଫୋନ୍ କରି ଆଶ୍ବାସନା ପାଇଥିଲେ ହେଁ , କେହି କର୍ଣ୍ଣପାତ ସୁଦ୍ଧା କରି ନାହାଁନ୍ତି  !  ତେଣୁ କିଛିଦିନତଳେ ପ୍ରଶାସନ ପକ୍ଷରୁ ବୀରମହାରାଜପୁର ଜନଶୁଣାଣୀ ସଭାରେ ମୃତଶିକ୍ଷକଙ୍କ ଘରଲୋକେ ପହଞ୍ଚି ଅଭିଯୋଗ କରିବାରୁ ସେଠାରେ ଉପସ୍ଥିତ ଥିବା ଏସ ପି ବିରକ୍ତ ହୋଇ ' ଏଠାକୁ କାହିଁକି ଆସିଛ ? ' ବୋଲି କହି ସୋନପୁର ଏସଡିପିଓଙ୍କ ପାଖକୁ ଯିବାକୁ ପରାମର୍ଶ ଦେଇ ବିଦାକରି ଦେଇଥିଲେ । ଏହାପରେ ସେମାନେ ନୂତନଭାବେ ଯୋଗଦେଇଥିବା ସୋନପୁର ଏସଡିପିଓ ପ୍ରତାପ ଚନ୍ଦ୍ର ତ୍ରିପାଠୀଙ୍କୁ ଯାଇ ଭେଟିବାରୁ ସେ ତଦନ୍ତର ପ୍ରତିଶ୍ରୁତି ଦେବା ସହ ହିକୁଡି ଫାଣ୍ଡିକୁ ଯାଇ ପଚାରାଉଚୁରା କରିଥିଲେ ।  ଏସମ୍ପର୍କରେ ଏହି ପ୍ରତିନିଧି ମଧ୍ୟ କେତେକ ବରିଷ୍ଠ ସାମ୍ବାଦିକଙ୍କ ସହ ଯାଇ ଏସଡିପିଓଙ୍କୁ ଭେଟି ପଚାରିବାରୁ ସେ ଔପଚାରିକ ଭାବରେ ଠିଆ ଠିଆ ଦି'ପଦ କହି  ' ସେଦିନ ମୃତକ ନିଜେ ମଦପିଇ ନଦୀକୁ ଯାଇଥିଲା ' , 'ଏସ୍ ପି ନିଜେ ସାକ୍ଷୀ ଅଛନ୍ତି ' ଓ ' ଅଦ୍ୟାବଧି ମୃତକର ମୋବାଇଲ୍ ଟି ମିଳିପାରି ନଥିଲେ ହେଁ , ହିକୁଡି ଫାଣ୍ଡି ଅଧିକାରୀ ଓ ସାହୁ କନେଷ୍ଟବଳ କେଶଲପୁରା ମୃତଶିକ୍ଷକଙ୍କ ଘରକୁ ଯାଇ ' ମୋବାଇଲ୍ ଟି ଘୋଡାଧାରର ଜଣେ ଝିଅ ପାଖରେ ରହିଛି 'ବୋଲି ଭିନ୍ନମୋଡ ଦେବାର ଅପଚେଷ୍ଟା କରୁଥିବା ଅଭିଯୋଗକୁ ' ସେମାନେ ଯାଇ ନଥିବା ଓ ସେପଟେ ଜୁଆ ଧରିବାକୁ ଯାଇଥିଲେ ' ବୋଲି ସେମାନଙ୍କ ସଫେଇକୁ ବିଶ୍ବାସ କରି ପ୍ରକୃତ ତଦନ୍ତ ପ୍ରତି  ଅନାଗ୍ରହ ପ୍ରକାଶ କରିଥିଲେ ।  ପ୍ରକାଶଯୋଗ୍ୟ ଯେ ଇତିମଧ୍ୟରେ ସୁବର୍ଣ୍ଣପୁର ଏସ୍ ପି ଅମରେଶ ପଣ୍ଡାଙ୍କର ବଦଳି ହୋଇଯାଇଛି ଓ ଜଣେ ଆଇପିଏସ୍ ୟଶ୍ ପ୍ରତାପ  ଶ୍ରୀମାଲ ନୂତନ ଏସ୍ ପି ଭାବରେ

ଯୋଗଦେଇଛନ୍ତି । ଶେଷରେ ଗତ  ୩୦ ତାରିଖରେ ଉଲୁଣ୍ଡାଠାରେ ଅନୁଷ୍ଠିତ ଜନଶୁଣାଣୀ ସଭାରେ ମଧ୍ୟ ଘରଲୋକଙ୍କ ପକ୍ଷରୁ ଏହାର ତଦନ୍ତରେ ଅବହେଳା ସମ୍ପର୍କରେ ଅଭିଯୋଗ କରିଥିଲେ ଓ ସେଠାରେ ଉପସ୍ଥିତ ଏଡିଏମ୍ , ସିଡିଏମଓ ଏ ସମ୍ପର୍କରେ ଡାକ୍ତରଖାନାର କର୍ତ୍ତୃପକ୍ଷଙ୍କୁ ପଚାରିବା ପରେ ସୋନପୁର ଆଇ ଆଇଜିଙ୍କୁ ଯାଇ ଭେଟିବାକୁ ପରାମର୍ଶ ଦେଇଥିବା ପ୍ରକାଶ ।

ସବୁଠାରୁ ଗୁରୁତର କଥା ଏହା ଯେ ମୃତ ଶିକ୍ଷକଙ୍କ ସହ ତାଙ୍କ ପତ୍ନୀଙ୍କର ଦୀର୍ଘଦିନ ଧରି ପାରିବାରିକ ବିବାଦ ଚାଲି ଆସୁଥିବା ସହିତ ନିଖୋଜ୍ ଦିନ ସନ୍ଧ୍ୟାରେ ହିକୁଡି ଫାଣ୍ଡିର ଜଣେ ହୋମ୍ ଗାର୍ଡ ଓ ଜଣେ କନେଷ୍ଟବଳ ତାଙ୍କୁ ସମାଧାନ ନିମନ୍ତେ ଡକାଇଥିବା ଅଭିଯୋଗ ହୋଇଆସୁଛି । ଏଥିସହ ଶବବ୍ୟବଚ୍ଛେଦ କରିଥିବା ଡାକ୍ତରଙ୍କ କହିବାନୁଯାୟୀ , ମୃତକର ପ୍ଳୀହାରେ ଭିତରମାଡର ଚିହ୍ନ ରହିଛି । ଏଣୁ ଭିସେରା ରିପୋର୍ଟ ଆସିଲେ , ସବୁ ସ୍ପଷ୍ଟ ହୋଇପାରିବ । କିନ୍ତୁ ପୋଷ୍ଟମର୍ଟମ୍ ରିପୋର୍ଟ ପରି ଭିସେରା ପଠାଯିବାରେ ଅହେତୁକ କାଳକ୍ଷେପଣର କାରଣ କ'ଣ ବୋଲି ଘରଲୋକଙ୍କ ସହ ଅଞ୍ଚଳର ଜନସାଧାରଣ ପ୍ରଶ୍ନ ଉଠାଇଛନ୍ତି । ସୋନପୁରରେ ହୋମ୍ ଗାର୍ଡଙ୍କ ଭୂମିକା ଆଗରୁ ବିବଦମାନ ରହିଆସିଥିଲା ବେଳେ ବିଦାୟୀ ଏସପିଙ୍କର ଜଣେ ହୋମ୍ ଗାର୍ଡଙ୍କ ପ୍ରତି ଏବଂ କେତେକ ହୋମ୍ ଗାର୍ଡ ଓ କେତେକ କନେଷ୍ଟବଳଙ୍କ ବଦଳିକୁ ନେଇ ଅଭିଯୋଗ ପ୍ରକାଶ ଯୋଗୁଁ ଲୋକେ ପୁଲିସ୍ ପ୍ରତି ଆସ୍ଥାହରାଇଛନ୍ତି । ଜିଲ୍ଲାକୁ ଏବେ ଆସିଥିବା ନୂଆ ଜିଲ୍ଲାପାଳ ଓ ନୂଆ ଏସ୍ ପି ଏହି ବହୁଚର୍ଚ୍ଚିତ ନରହତ୍ୟା ଅଭିଯୋଗ ମାମଲାଟିର ପ୍ରକୃତ ନିରପେକ୍ଷ ତଦନ୍ତ ପ୍ରତି ଦୃଷ୍ଟି ଦେବେ କି  ?