16-Aug-2023

ବରଗଡ:-ବରଗଡ ସ୍ଥିତ ଜର୍ଜ ଉଚ୍ଚ ବିଦ୍ୟାଳୟ ପ୍ରାଙ୍ଗଣରେ ୭୭ତମ ସ୍ୱାଧିନତା ସମାରୋହ ପାଳିତ ହୋଇଯାଇଛି।ସମାରୋହରେ ମାନ୍ୟବର ରାଜସ୍ୱ ଓ ବିପର୍ଯ୍ୟୟ ପରିଚାଳନା ମନ୍ତ୍ରୀ ଓଡ଼ିଶା ସରକାର ଶ୍ରୀମତୀ ପ୍ରମିଳା ମଲ୍ଲିକ ଜାତୀୟ ପତାକା ଉତ୍ତୋଳନ କରି ସମ୍ମିଳିତ ପରେଡରେ ଅଭିବାଦନ ଗ୍ରହଣ କରିଥିଲେ।ଜିଲ୍ଲାପାଳ ଶ୍ରୀମତୀ ମୋନିଷା ବାନାର୍ଜୀ, ଜିଲ୍ଲା ଆରକ୍ଷୀ ଅଧିକ୍ଷକ ଶ୍ରୀ ପି.ଏସ.ମୀନା,ଅତିରିକ୍ତ ଜିଲ୍ଲାପାଳ ଶ୍ରୀମାନ ମିର୍ଦ୍ଧା ଟପ୍ପୋ ଓ ମୁଖ୍ୟ ଉନ୍ନୟନ ଅଧିକାରୀ ତଥା କାର୍ଯ୍ୟନିର୍ବାହୀ ଅଧିକାରୀ ଶ୍ରୀମାନ ଆଦିତ୍ୟ ଗୋୟଲ ଙ୍କ ଉପସ୍ଥିତିରେ,ଫିଲ୍ଡ କମାଣ୍ଡର ଶ୍ରୀମାନ ଶାନ୍ତନୁ କୁମାର ପ୍ରଧାନୀଙ୍କ ନେତୃତ୍ୱରେ ୩୯ଟି ପରେଡ ପ୍ଲାଟୁନ ମାର୍ଚ୍ଚ ଫାଷ୍ଟ କରିବା ସହିତ ଅଭିବାଦନ ପ୍ରଦାନ କରିଥିଲେ।ମୁଖ୍ୟ ଅତିଥି ମନ୍ତ୍ରୀ ଶ୍ରୀମତୀ ମଲ୍ଲିକ ଜାତି ଉଦ୍ଦେଶ୍ୟରେ ଉଦବୋଧନ ଦେଇ କହିଥିଲେ ଯେ,୧୯୪୭ ମସିହା ଅଗଷ୍ଟ ୧୫ ତାରିଖ ଭାରତ ଇତିହାସର ଏକ ଅବିସ୍ମରଣୀୟ ଦିବସ ଓ ଅନେକ ସ୍ୱାଧିନତା ସଂଗ୍ରାମୀ ମାନଙ୍କର ତ୍ୟାଗ ଓ ଉତ୍ସର୍ଗୀକୃତ ଅବଦାନ ଯୋଗୁଁ ଆଜି ଆମେ ବହୁ ଅପେକ୍ଷିତ ସ୍ୱାଧିନତା ହାସଲ କରିଛୁ।ମହାତ୍ମା ଗାନ୍ଧୀ,ସୁବାଷ ଚନ୍ଦ୍ର ବୋଷ,ସର୍ଦ୍ଦାର ବଲ୍ଲଭ ଭାଇ ପଟେଲ, ମୈାଲାନା ଅବଦୁଲ କଲାମ ଆଜାଦ, ଡ.ବାବା ସାହେବ ଆମ୍ବେଦକର, ଓଡ଼ିଶାର ଗୋପବନ୍ଧୁ ଦାସ,ଶହିଦ ଲକ୍ଷ୍ମଣ ନାୟକ ତଥା ବରଗଡ଼ ବୀରମାଟିର ଶହୀଦ ମାଧୋ ସିଂ,ବୀର ସୁରେନ୍ଦ୍ର ସାଏ,ପାର୍ବତୀ ଗିରି ଓ ଅନ୍ୟାନ୍ୟ ସ୍ୱାଧିନ ସଂଗ୍ରାମୀ ମାନଙ୍କ ସ୍ମୃତିଚାରଣ କରିବା ସହିତ ଭକ୍ତିପୂତ ଶ୍ରଦ୍ଧାଞ୍ଜଳୀ ଅର୍ପଣ କରିଥିଲେ।ବରଗଡ କୃଷି, ପର୍ଯ୍ୟଟନ,ସଂସ୍କୃତି ଆଦି ବିଶ୍ୱ ଦରବାରରେ ଜିଲ୍ଲାର ଏକ ସ୍ୱତନ୍ତ୍ର ପରିଚୟ ସୃଷ୍ଟି କରିଛି।ଉନ୍ନତମାନର ରାଜସ୍ୱ ସେବାପାଇଁ ଓଡ଼ିଶାର ୧୯ଟି ଜିଲ୍ଲା ମଧ୍ୟରେ ବରଗଡ ଜିଲ୍ଲା ମଧ୍ୟ ମହାମହିମ ରାଷ୍ଟ୍ରପତିଙ୍କ ଠାରୁ ଭୂମି ସମ୍ମାନରେ ସମ୍ମାନୀତ ହେବା ଜିଲ୍ଲା ପ୍ରଶାସନ ପାଇଁ ଏକ ଗୈାରବ ମୟ ଉପଲବ୍ଧି।ସେଥିପାଇଁ ଶ୍ରୀମତୀ ମଲ୍ଲିକ ଜିଲ୍ଲା ପ୍ରଶାସନକୁ ଧନ୍ୟବାଦ ଜଣାଇଥିଲେ।ଓଡ଼ିଶା ବିକାଶ କ୍ଷେତ୍ରରେ ଆଗକୁ ବଢିବା ପାଇଁ ଯୁବ ସମାଜର କାର୍ଯ୍ୟଦକ୍ଷତା ଓ ନିଷ୍ଠାପର ଉଦ୍ୟମ ଆବଶ୍ୟକ ବୋଲି ମତବ୍ୟକ୍ତ କରିଥିଲେ।ଏହି ଅବସରରେ ସ୍ୱାଧିନତା ଦିବସ ଉପଲକ୍ଷେ ଆୟୋଜିତ ବିଭିନ୍ନ ପ୍ରତିଯୋଗୀତାର ଛାତ୍ରଛାତ୍ରୀ ମାନଙ୍କୁ ମୁଖ୍ୟ ଅତିଥିଙ୍କ ଦ୍ୱାରା ପୁରସ୍କାର ବିତରଣ କରାଯାଇଥିଲା।ଜାତୀୟ ଓ ଅନ୍ତର୍ଜାତୀୟ ସ୍ତରରେ ଉଲ୍ଲେଖନୀୟ ଅବଦାନ ପାଇଁ ତଥା ୨୦୨୩ ବାର୍ଷିକ ପରୀକ୍ଷାରେ ସର୍ବୋଚ୍ଚ ନମ୍ବର ରଖିଥିବା ଛାତ୍ରଛାତ୍ରୀ ଓ କ୍ରୀଡାବିତ ମାନଙ୍କୁ ଏହି ଅବସରରେ ସମ୍ବର୍ଦ୍ଧିତ କରାଯାଇଥିଲା।ସରସ୍ୱତୀ ଶିଶୁ ବିଦ୍ୟାମନ୍ଦିରର ଛାତ୍ରୀମାନେ ଜାତୀୟ ସଙ୍ଗୀତ ଗାନ କରିଥିବା ବେଳେ,ବାପୁଜୀ ସ୍ୱତନ୍ତ୍ର ବିଦ୍ୟାଳୟର ଛାତ୍ରୀମାନେ ସାଙ୍କେତିକ ଭାଷାରେ ଜାତୀୟ ସଙ୍ଗୀତ ପରିବେଷଣ କରିଥିଲେ।ଏପରିପ୍ରେକ୍ଷୀରେ ବିଭିନ୍ନ ବିଦ୍ୟାଳୟର ଛାତ୍ରଛାତ୍ରୀଙ୍କ ଦ୍ୱାରା ୮ଟି ସାଂସ୍କୃତିକ ଦଳ ସାଂସ୍କୃତିକ କାର୍ଯ୍ୟକ୍ରମ ପରିବେଷଣ କରିଥିବା ବେଳେ ସାନ୍ ଡ୍ୟାନ୍ସ ଏକାଡେମୀ,ସିମେଣ୍ଟ ନଗର,ଇଂରାଜୀ ମାଧ୍ୟମ ବିଦ୍ୟାଳୟ ଓ ସେମରକ ପ୍ରାଇମେରୀ ସ୍କୁଲ ଯଥାକ୍ରମେ ପ୍ରଥମ,ଦ୍ୱିତୀୟ ଓ ତୃତୀୟ ସ୍ଥାନ ଅଧିକାର କରି ମୁଖ୍ୟ ଅତିଥିଙ୍କ ଦ୍ୱାରା ପୁରସ୍କୃତ ହୋଇଥିଲେ।ଆୟୋଜିତ ପରେଡ ପ୍ରତିଯୋଗୀତାରେ ଜୁନିଅର  ନାଭାଲ ୱିଙ୍ଗସ

ଏନ୍.ସି.ସି,ସଂସ୍କାର ଇଣ୍ଡରନେସନାଲ ସ୍କୁଲ,ଜୁନିଅର ୱିଙ୍ଗସ ଏନ୍.ସି.ସି,ବିକାଶ ଆବାସିକ ବିଦ୍ୟାଳୟ,ସ୍କାଉଟ,ଗାଇଡ ଓ ରେଡକ୍ରସ, ସରକାରୀ ବାଳିକା ଉଚ୍ଚ ବିଦ୍ୟାଳୟ, ଗାଇଡ, ସରକାରୀ ବାଳିକା ଉଚ୍ଚ ବିଦ୍ୟାଳୟ,ସିଭିଲିଏନ ଗ୍ରୁପରେ ସିଭିଲିଏନ,ପିକେଏସିଇ,ସିଭିଲିଏନ ଏନଏସଏସ, ପଞ୍ଚାୟତ ମହାବିଦ୍ୟାଳୟ ପ୍ରଥମ ଓ ଦ୍ୱିତୀୟ ସ୍ଥାନ ଅଧିକାର କରି ପୁରସ୍କୃତ ହୋଇଥିଲେ।ଏହି ଅବସରରେ ମୁଖ୍ୟ ଅତିଥି ଟାଉନ ହଲ ଠାରେ ମଧୁବାବୁ ପେନସନ ଯୋଜନାର ହିତାଧିକାରୀ ମାନଙ୍କୁ ଭତ୍ତା ବଣ୍ଟନ କରିବା ସହିତ ଜିଲ୍ଲା ମୁଖ୍ୟ ଚିକିତ୍ସାଳୟ ବରଗଡ ଠାରେ ରୋଗୀ ମାନଙ୍କୁ ତଥା ଜିଲ୍ଲା କାରାଗାର ଅନ୍ତେବାସୀ ମାନଙ୍କୁ ଫଳ ଓ ମିଷ୍ଟାନ୍ନ ବଣ୍ଟନ କରିଥିଲେ।ସକାଳେ ମୁଖ୍ୟ ଅତିଥି ଶ୍ରୀମତୀ ମଲ୍ଲିକ ଗାନ୍ଧୀ ଛକ ସ୍ଥିତ ମହାତ୍ମା ଗାନ୍ଧୀଙ୍କ ପ୍ରତିମୂର୍ତ୍ତୀ ସମେତ ସ୍ୱଭାବ କବି ଗଙ୍ଗାଧର ମେହେର,ଭାରତରତ୍ନ ଡା. ବି.ଆର.ଆମ୍ବେଦରକର ଓ ସଂଗ୍ରାମୀ ବୀର ସୁରେନ୍ଦ୍ର ସାଏଙ୍କ ପ୍ରତିମୂର୍ତ୍ତୀରେ ପୁଷ୍ପମାଲ୍ୟ ଦେଇ ଶ୍ରଦ୍ଧାଞ୍ଜଳୀ ଅର୍ପଣ କରିଥିଲେ।ଉତ୍ସବରେ ବରଗଡ ଜିଲ୍ଲାପାଳ ଶ୍ରୀମତୀ ମୋନିଷା ବାନାର୍ଜୀ,ବିଧାୟକ ଦେବେଶ ଆଚାର୍ଯ୍ୟ,ଆରକ୍ଷୀ ଅଧିକ୍ଷକ ପି.ଏସ.ମୀନା ଙ୍କ ସମେତ ଅନ୍ୟାନ୍ୟ ଜିଲ୍ଲାସ୍ତରୀୟ ଅଧିକାରୀ, ଗଣ୍ୟମାନ୍ୟ ବ୍ୟକ୍ତି, ଛାତ୍ରଛାତ୍ରୀ, ଅଭିଭାବକ ଓ ବିଭିନ୍ନ କ୍ଷେତ୍ରରେ ପୁରସ୍କାର ପ୍ରାପ୍ତ ବ୍ୟକ୍ତି ବିଶେଷ ଉପସ୍ଥିତ ଥିଲେ।ଜିଲ୍ଲା ସୂଚନା ଓ ଲୋକ ସମ୍ପର୍କ ଅଧିକାରୀ ଶ୍ରୀମତୀ କଲ୍ୟାଣୀ ଦାଶ ଓ କାର୍ଯ୍ୟାଳୟର ସମସ୍ତ କର୍ମଚାରୀ କାର୍ଯ୍ୟକ୍ରମର ସୁପରିଚାଳନା କରିଥିଲେ।