30-Jul-2023

ବରଗଡ଼:-ଆମର ପୂର୍ବତନ ରାଷ୍ଟ୍ରପତି ତଥା ପ୍ରଖ୍ଯାତ ବୈଜ୍ଞାନିକ  ଡକ୍ଟର ଏପିଜେ ଅବଦୁଲ କଲାମଙ୍କ ଅଷ୍ଟମ ଶ୍ରାଦ୍ଧବାର୍ଷିକୀ ଅବସରରେ ବରଗଡ ଜିଲ୍ଲାରୁ ପ୍ରକାଶିତ ପାକ୍ଷିକପତ୍ରିକା କୋଶଲଟାଇମ ଆୟୋଜନ କରିଛି ଏକ ଜିଲ୍ଲାସ୍ତରୀୟ ଚିତ୍ରାଙ୍କନ ପ୍ରତିଯୋଗିତା । ସ୍ବର୍ଗତ ଏପିଜେ ଅବଦୁଲ କଲାମ ଭାରତର ଏକାଦଶତମ ରାଷ୍ଟ୍ରପତି ରୂପେ ୨୦୦୨ରୁ ୨୦୦୭ ମସିହା ପର୍ଯ୍ଯନ୍ତ ପଦମଣ୍ଡନ କରିଥିଲେ । ସେ ମଧ୍ଯ ଥିଲେ ଜଣେ ଉଚ୍ଚକୋଟୀର ବୈଜ୍ଞାନିକ।  ତାଙ୍କରି ତତ୍ତ୍ବାବଧାନରେ ଭାରତ ଅଗ୍ନି,ପୃଥ୍ବୀ ଭଳି କ୍ଷେପଣାସ୍ତ୍ର  ପ୍ରସ୍ତୁତ କରିଥିଲା ।୨୦୧୫ ମସିହା ଜୁଲାଇ ୨୭ ତାରିଖରେ ସିଲଂ ଆଇଆଇଟିର ଛାତ୍ରଛାତ୍ରୀମାନଙ୍କୁ ସମ୍ବୋଧନ କଲା ସମୟରେ ହୃଦଘାତରେ ତାଙ୍କର ମୃତ୍ଯୁ ହୋଇଥିଲା । କଲାମଙ୍କ ତିରୋଧାନ ପରଠୁ ପାକ୍ଷିକପତ୍ରିକା କୋଶଲଟାଇମ କଲାମଙ୍କ ପ୍ରତ୍ଯେକ  ଶ୍ରାଦ୍ଧବାର୍ଷିକୀ ଅବସରରେ ଓଡିଶାର ବିଭିନ୍ନ ଜିଲ୍ଲାରେ ଆୟୋଜନ କରି ଆସୁଛି ଅବଦୁଲ କଲାମ  ପ୍ରବନ୍ଧ ଓ ଚିତ୍ରାଙ୍କନ ପ୍ରତିଯୋଗିତା । ଏହାର ମୁଖ୍ଯ ଉଦ୍ଦେଶ୍ଯ ହେଲା- ପିଲାମାନେ କଲାମଙ୍କ ବିଷୟରେ ଜାଣନ୍ତୁ ଏବଂ ଅନୁପ୍ରାଣିତ ହୁଅନ୍ତୁ । ଏହି କ୍ରମରେ ଚଳିତ ବର୍ଷ  ଦୁର୍ଗମ ମାଲକାନଗିରି ଜିଲ୍ଲାର ବିଭିନ୍ନ  ଓଡିଆ ମାଧ୍ଯମ ବିଦ୍ୟାଳୟରେ ଆୟୋଜିତ ହୋଇଛି ଚିତ୍ରାଙ୍କନ ପ୍ରତିଯୋଗିତା । ତନ୍ମଧ୍ଯରେ କୁଡୁମୁଲୁଗୁମା ହାଇସ୍କୁଲ, ଖଇରପୁଟ ହାଇସ୍କୁଲ,ବଡପଡାର ଡଙ୍ଗଗୁଡା କଲୋନୀ ସ୍କୁଲ, କୋରୁକୋଣ୍ଡା ଶିବାନନ୍ଦ ହାଇସ୍କୁଲ  ଆଦି ସ୍କୁଲରେ କୋଶଲଟାଇମର ସମ୍ପାଦକ ସଞ୍ଜୀବ କୁମାର ମହାପାତ୍ରଙ୍କ ପ୍ରତ୍ଯକ୍ଷ ତତ୍ତ୍ବାବଧାନରେ କଲାମଙ୍କ ସ୍ମୃତିସଭା  ଏବଂ ଚିତ୍ରାଙ୍କନ ପ୍ରତିଯୋଗିତା ଅନୁଷ୍ଠିତ ହୋଇଥିଲା । ଏଥିରେ ଖଇରପୁଟ ଥାନାଧିକାରୀ ଚନ୍ଦ୍ରକାନ୍ତ ତାଣ୍ଡି ମୁଖ୍ଯ ଅତିଥି ରୂପେ ଯୋଗଦେଇ ଛାତ୍ରଛାତ୍ରୀଙ୍କୁ ଉଦବୋଧିତ କରିଥିଲେ । ବିଶିଷ୍ଟ ସମାଜସେବୀ ପ୍ରଦୀପ କୁମାର ପ୍ରଧାନ ଧନ୍ଯବାଦ ଅର୍ପଣ କରିଥିଲେ । ଅନ୍ଯ ସମସ୍ତ ସ୍କୁଲରେ ମାଲକାନଗିରି ଜିଲ୍ଲା

ଶିକ୍ଷାଧିକାରୀ ମାନସ କୁମାର ଜେନାଙ୍କ ତତ୍ତ୍ବାବଧାନରେ ଏହି ପ୍ରତିଯୋଗିତା ଅନୁଷ୍ଠିତ ହୋଇଛି । ବିଶିଷ୍ଟ ଚିତ୍ରଶିଳ୍ପୀ କେ. ଦେଶିରାଜୁ ଅଚାରୀ (ରାଜା ଆର୍ଟସ୍)ବିଚାରକ ରୂପେ ସଂଗୃହୀତ ଚିତ୍ରସବୁର ମୂଲ୍ଯାଙ୍କନ କରିଛନ୍ତି । ଏଥିରେ କୋରୁକୋଣ୍ଡା ବ୍ଲକର  ପିତାକଟା ନେତାଜୀ ହାଇସ୍କୁଲର  ମଦନା ମାଢି ପ୍ରଥମ ସ୍ଥାନ,  କାଳିମେଳା  ସରକାରୀ ଉଚ୍ଚ ବିଦ୍ୟାଳୟର ସୋନାଲି ବିଶ୍ବାସ ଦ୍ବିତୀୟ ସ୍ଥାନ ଏବଂ କୋରୁକୋଣ୍ଡା ସରକାରୀ ଉଚ୍ଚ ମାଧ୍ୟମିକ ବିଦ୍ୟାଳୟର ବଳଭଦ୍ର ପୂଜାରୀ ତୃତୀୟ ସ୍ଥାନ ଅଧିକାର କରିଛନ୍ତି । ସେମାନଙ୍କୁ ଜିଲ୍ଲା ଶିକ୍ଷାଧିକାରୀଙ୍କ ତତ୍ତ୍ବାବଧାନରେ ପୁରସ୍କୃତ କରାଯାଇଛି ।  ମାଓବାଦୀଙ୍କଠାରୁ ଲୋକଙ୍କୁ ସୁରକ୍ଷା ଦେବା ପାଇଁ ଚିତ୍ରକୋଣ୍ଡାଠାରେ ମୁତୟନ ହୋଇଥିବା ସୀମା ସୁରକ୍ଷା ବାହିନୀର ସୈନିକ ଭାଇମାନେ ମଧ୍ଯ କଲାମଙ୍କୁ ତାଙ୍କ ଶ୍ରାଦ୍ଧବାର୍ଷିକୀ ଅବସରରେ ସଲାମ ଦେଇ  ସମ୍ମାନ ଜ୍ଞାପନ କରିଥିଲେ ।