29-Jul-2023

ରଙ୍ଗତୁଳୀ ନେଇ କାନ୍‌ଭାସ୍‌ରେ ଚିତ୍ର ଆଙ୍କିବା ଓ କିଛି ଭିନ୍ନ କରି ଦେଖାଇବାର ନିଶାରେ ମଶଗୁଲ୍ ଜଣେ ନିଆରା ଚିତ୍ରଶିଳ୍ପୀ । ନିଜ ପରିବାର ର ତିନି ଜଣ ସଦସ୍ୟ କୁ ନେଇ ନୀତି ଓ ପ୍ରୀତିର ମନ୍ତ୍ରରେ ଅଭିମନ୍ତ୍ରିତ ଏକ  ଅନୁଷ୍ଠାନ ।  ଚିତ୍ରକଳା ଓ ହସ୍ତଶିଳ୍ପ ପ୍ରଶିକ୍ଷଣ କ୍ଷେତ୍ରରେ ଏପରି ଏକ ସମର୍ପିତ ଅନୁଷ୍ଠାନ ହେଉଛି ‘ଆର୍ଟ ଅଧ୍ୟୟନ’ । କୌଣସି ବ୍ୟବସାୟିକ ମନୋବୃତ୍ତି ନ ରଖି ଏକ ଘରୋଇ ପରିବେଶ ମଧ୍ୟରେ ବଲାଙ୍ଗୀର ସହର ରାଜେନ୍ଦ୍ର ପଡା(ୱାର୍ଡ ନମ୍ବର ୨୧) ରେ ଦୀର୍ଘ ୪ ବର୍ଷ ହେଲା ନିଜର ଅଧ୍ୟବସାୟ ଜାରି ରଖିଛି ଆର୍ଟ ଅଧ୍ୟୟନ । ସବୁଠାରୁ ବଡ କଥା ହେଲା ଏହି ଅନୁଷ୍ଠାନର ପ୍ରତିଷ୍ଠାତା ବିଶ୍ୱରଂଜନ ଡାକୁଆଙ୍କ ଦିଗ୍‌ଦର୍ଶନ  ତଥା ତାଙ୍କ ଧର୍ମପତ୍ନୀ ରଶ୍ମିତା ଡାକୁଆ, ୧୧ବର୍ଷର ପୁଅ ଅଧ୍ୟୟନ ଡାକୁଆ ଓ ଅନ୍ୟତମ ସହଯୋଗୀ ମଦନ ଯୁଏଡଙ୍କ ସାଧନା ଓ ନିଷ୍ଠା ବଳରେ  ସଫଳତାର ୪ ବର୍ଷ ଅତିକ୍ରମ କରିଛି ଏହି ଅନୁଷ୍ଠାନ । ଚିତ୍ରକଳା ପ୍ରତି ଆଗ୍ରହୀ ପ୍ରତିଭା ମାନଙ୍କ ପାଇଁ ଏହି ନିର୍ଭରଯୋଗ୍ୟ ପ୍ରତିଷ୍ଠାନ ର ଏହି ଅଭିନବ  ଉଦ୍ୟମକୁ ସମସ୍ତେ ପ୍ରଶଂସା କରିଛନ୍ତି ।

ଚିତ୍ରକଳା ଓ ହସ୍ତଶିଳ୍ପ କ୍ଷେତ୍ରରେ ପ୍ରବଳ ଅନୁରାଗୀ ଏହି ୪ ଜଣ ପ୍ରତିଭାଙ୍କ ସାମୁହିକ ପ୍ରଚେଷ୍ଟା ବଳରେ ଏହି ଅନୁଷ୍ଠାନ ଟି ଅଳ୍ପ ସମୟ ମଧ୍ୟରେ ନିଜର ଏକ ସ୍ୱତନ୍ତ୍ର ପରିଚୟ ସୃଷ୍ଟି କରିପାରିଛି । ଏମାନଙ୍କ ଚମତ୍କାର ସୃଜନଶକ୍ତି ବଳରେ ଗୋଟିଏ ନିର୍ଜୀବ ବସ୍ତୁ ବି କଥା କୁହେ । ଆମ ଚାରିପାଖରେ ଥିବା ଅଦରକାରୀ ସାମଗ୍ରୀକୁ ଆଣି ନିଜର ସୃଜନାତ୍ମକ ଶକ୍ତି  ବଳରେ ଏହାକୁ ଏକ ଆକର୍ଷଣୀୟ ସାମଗ୍ରୀର ରୂପ ଦିଅନ୍ତି ଏମାନେ । ଯେପରିକି କାଠଗଣ୍ଡି, ନଦୀ ପାଶ୍ୱର୍ରେ ଥିବା ପଥର, ବଉଁଶ ନଳୀ, ବୋତଲ, ନଡିଆ ଓ ତାଳ ଖୋଳପା, ଆଦି ସାମଗ୍ରୀ ଏମାନଙ୍କ ଯାଦୁଗରୀ ସ୍ପର୍ଶରେ ଜୀବନ୍ତ ରୂପ ନେଇଥାଏ ।

ଏଇ ଦେଖନ୍ତୁ ସୋ କେସ୍ ରେ ଶୋଭା ପାଉଛି ଜଗନ୍ନାଥଙ୍କ ମୂର୍ତ୍ତି, ଗଣେଶ ମୂର୍ତ୍ତି, ଫଟୋ ଫ୍ରେମ୍‌, ବିଭିନ୍ନ ମହାପୁରୁଷଙ୍କ ଚିତ୍ର, ଚୌକି, ଫୁଲ ଗମଲା, ପେପର ୱେଟ,  ଆଦି ଭଳିକି ଭଳି ରଙ୍ଗବେରଙ୍ଗର ସାମଗ୍ରୀ । ଗ୍ରାହକଙ୍କ ଚାହିଦା ମୁତାବକ ସ୍ୱଳ୍ପ ମୂଲ୍ୟରେ ଏହି ସବୁ ସାମଗ୍ରୀକୁ ବିକ୍ରୀ ମଧ୍ୟ କରାଯାଇଥାଏ । ଏକ ପ୍ରକୃତିକ ପରିବେଶ ମଧ୍ୟରେ ତଥା ଅନୁଷ୍ଠାନର କାନ୍ଥ ଓ ଗଛ ଗୁଡିକରେ ଅନେକ ନୀତିବାଣୀ ଓ ସଚେତନ ବାର୍ତ୍ତା ଲେଖା ଯାଇଛି ଯାହା କି ବାତାବରଣକୁ ଆହୁରୀ ଆକର୍ଷଣୀୟ କରିଛି । ଗୋଟିଏ ପରିବାର ର ଜଣେ ଦମ୍ପତ୍ତିଙ୍କ ସହ ୧୧ବର୍ଷର ଜଣେ ଉଦୀୟମାନ ପ୍ରତିଭା ଅଧ୍ୟୟନଙ୍କ ନିଷ୍ଠା ଓ ଆତ୍ମବିଶ୍ୱାର ମୂକସାକ୍ଷୀ ହେଉଛି ଆର୍ଟ ଅଧ୍ୟୟନ । ଏପରି ଏକ ଅନୁଷ୍ଠାନକୁ ସରକାରୀ ପ୍ରୋତ୍ସାହନା ମିଳିପାରିଲେ ଏହାର ପରିସର ଆହୁରି ବ୍ୟାପକ ହୋଇ ପାରନ୍ତା ।