24-May-2023

ବଲାଙ୍ଗୀର(ପ୍ରେରଣା ଖବର)- ବଲାଙ୍ଗୀର ଜିଲ୍ଲାର ଦେଓଗାଁଠାରେ ୧୯୬୭ ମସିହାରୁ ଏକ ସରକାରୀ ମେଷଫାର୍ମ ରହିଛି । ଗତ ୧୦ବର୍ଷ ହେଲା ଏହା ଠିକରେ ପରିଚାଳିତ ହେଉନାହିଁ । ତେଣୁ ଏହାର ଉନ୍ନତିକରଣ କରାଯାଇ ପୁନଃରୁଦ୍ଧାର କରାଇବାକୁ ଆଜି ଦେଓଗାଁର ଏକ ପ୍ରତିନିଧିଦଳ ଭୁବନେଶ୍ୱରଠାରେ ରାଜ୍ୟ କୃଷି ଓ ପ୍ରାଣୀସମ୍ପଦ ବିଭାଗର ମନ୍ତ୍ରୀ ରଣେନ୍ଦ୍ରପ୍ରତାପ ସ୍ୱାଇଁଙ୍କୁ ଭେଟି ଆଲୋଚନା କରିଛନ୍ତି । ଏହି ମେଷଫାର୍ମକୁ ଉନ୍ନତି କରାଇଲେ ଏହା ଅଞ୍ଚଳର ଯୁବକଙ୍କୁ ନୂତନ ନିଯୁକ୍ତି ଦେବାରେ ସହାୟକ ହେବା ସହିତ ଅଞ୍ଚଳର ଅର୍ଥନୈତିକ ବିକାଶ ହେବ ବୋଲି ଦାବି କରାଯାଇଛି । ଦେଓଗାଁ ବ୍ଲକର ପୂର୍ବତନ ଅଧ୍ୟକ୍ଷ ଲକ୍ଷ୍ମଣକୁମାର ମେହେର, ବ୍ଲକ ସରପଞ୍ଚ ସଂଘର ସଭାପତି ଘୁଣ୍ଡୁଗୋପାଲ ମିଶ୍ର ଓ ବ୍ଲକ ଯୁବବିଜେଡି ସଭାପତି ଶୈଳେନ୍ଦ୍ର ସାହୁ ମନ୍ତ୍ରୀଙ୍କ ବାସଭବନରେ ଭେଟି ଏହି ବିଷୟ ସହିତ ଜିଲ୍ଲାର କୃଷିବିକାଶ ସମ୍ପର୍କିତ ଆଲୋଚନା କରିଛନ୍ତି । ଆଲୋଚନା ପରେ ମନ୍ତ୍ରୀ ଶ୍ରୀ ସ୍ୱାଇଁ ପ୍ରାଣୀସଂମ୍ପଦ ବିଭାଗର ପ୍ରମୁଖଶାସନ ସଚିବ ଏସ.କେ.ବଶିଷ୍ଠ ବଲାଙ୍ଗୀର ଜିଲ୍ଲାପାଳଙ୍କଠାରୁ ସବିଶେଷ ରିପୋର୍ଟ ମଗାଇବା ପାଇଁ ନିର୍ଦ୍ଦେଶ କରିଛନ୍ତି । ଜିଲ୍ଲାପାଳଙ୍କ ରିପୋର୍ଟ ପରେ ମେଷଫାର୍ମର ପୁନଃରୁଦ୍ଧାର କରାଯିବାକୁ ପଦକ୍ଷେପ ନେବେ ବୋଲି ମନ୍ତ୍ରୀ ଶ୍ରୀ ସ୍ୱାଇଁ ପ୍ରତିଶୃତି ଦେଇଥିବା ଲକ୍ଷଣକୁମାର ମେହେର କହିଛନ୍ତି । ପ୍ରକାଶ୍ୟ ଯେ,ଦେଓଗାଁରେ ୧୯୬୭ ମସିହାରୁ ଏକ ସରକାରୀ ମେଷଫାର୍ମ ରହିଛି । ଏଠାରେ ପୂର୍ବରୁ ମେଷ ପ୍ରଜନନ ସହିତ ମେଷଲୋମ ସଂଗ୍ରହ କରାଯାଇ ବିକ୍ରି କରାଯାଉଥିଲା । ଅନେକ ଯୁବକ ଏଠାରେ ନିଯୁକ୍ତି ପାଇଥିଲେ । କିନ୍ତୁ ବହୁବର୍ଷ କର୍ମଚାରୀ ଅଭାବ ସହିତ ସରକାରୀ ଅନୁଦାନ ଆସୁନଥିବାରୁ ଅବ୍ୟବସ୍ଥା ଭିତରେ ପଡିରହିଛି । ପ୍ରାୟ ୫୦ ଏକର ଜମିରେ ଏହା ରହିଛି । ତେଣୁ ଏହାର ସଠିକ ଉପଯୋଗ କଲେ ଅଞ୍ଚଳର ବିକାଶ ହୋଇପାରିବ ବୋଲି ଏହି ପ୍ରତିନିଧିଦଳ ମନ୍ତ୍ରୀଙ୍କ ପାଖରେ ଯୁକ୍ତି ରଖିଛନ୍ତି ।