21-May-2023

ବଙ୍ଗୋମୁଣ୍ଡା/ସିନ୍ଧେକେଲା (ଅନୀଲ କୁମାର ତ୍ରିପାଠୀ): ଏବେ ମୋ ସରକାରକୁ ନେଇ ସବୁଠି ଚର୍ଚ୍ଚା। ରାଜ୍ଯ ସରକାରଙ୍କ ସ୍କାନରରେ ଥାନା ଆଉ ଡାକ୍ତରଖାନା । ୫ ଟି ଯୋଜନାରେ ସଚିବ ଓ ଅଧିକାରୀମାନେ ବିଭିନ୍ନ ସ୍ଥାନର ହସ୍ପିଟାଲ ବୁଲି ତଦାରଖ କରୁଛନ୍ତି। ଟିକିଏ ଭୁଲଭଟକା ହେଲେ ତୁରନ୍ତ କାର୍ଯ୍ୟାନୁଷ୍ଠାନ। କିନ୍ତୁ ବଲାଙ୍ଗୀର ଜିଲ୍ଲାର ସମଗ୍ର ବଙ୍ଗୋମୁଣ୍ଡା ବ୍ଲକର ହାଲଚାଲ ଦେଖିଲେ ଜଣାପଡେ ସ୍ବାସ୍ଥ୍ୟ ବିଭାଗର ଅସ୍ବାସ୍ଥ୍ୟକର କାହାଣୀ।

ବଙ୍ଗୋମୁଣ୍ଡା ବ୍ଲକର ୨୬ ଗୋଟି ପଞ୍ଚାୟତ ତଥା ବଲାଙ୍ଗୀର, କଳାହାଣ୍ଡି ଓ ନୁଆପଡା ଜିଲ୍ଲାର ସୀମାନ୍ତ ଅଞ୍ଚଳର ମୁଖ୍ଯ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର ସିନ୍ଧେକେଲାରେ ରହିଛି। ତଥା ସିନ୍ଧେକେଲା ମୁଖ୍ଯ ରାସ୍ତା ଦେଇ ୪୨ ନମ୍ବର ରାଜ୍ଯ ରାଜପଥ ଥିବାବେଳେ ସିନ୍ଧେକେଲାରୁ ଅନତି ଦୁରରେ ଭବାନୀପାଟଣା - ରାୟପୁର ୧୬ ନମ୍ବର ବ୍ୟସ୍ତବହୁଳ ରାଜ୍ଯ ରାଜପଥ ଯାଇଛି। ଫଳରେ ଏହି ହସ୍ପିଟାଲ ହିଁ କୌଣସି ଜରୁରୀକାଳୀନ ପରିସ୍ଥିତି ତଥା ସୁଃଖଦୁଃଖର ଭରସା ପାଲଟିଛି । କିନ୍ତୁ ସିନ୍ଧେକେଲା ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ଏବେ ଡାକ୍ତର ଅଭାବ। ତେଣୁ ଗାଁ ଗହଳିରେ ଏବେ କ୍ବାକ୍ ଓ  ଗୁଣିଆଙ୍କ ଦବଦବା। ଆଗରୁ ଏବଂ ଏବେବି ସିନ୍ଧେକେଲା ଅଞ୍ଚଳର ଅନେକ ଗାଁ ରେ ଝଡ଼ାଫୁଙ୍କା ର ଚିକିତ୍ସା ହୁଏ। ଆଗରୁ ଆମେ ଦେଖିସାରିଛୁ ଗୁଣି ଗାରେଡିର ଅନେକ ଚିତ୍ର ସାମ୍ନାକୁ ଆସିଛି। ନିକଟରେ ଖୋଦ ଜିଲ୍ଲା ସଦର ମହକୁମାର ଭୀମ ଭୋଇ ମେଡିକାଲ କଲେଜରେ ସାପ କାମୁଡିଥିବା ଜଣେ ମୃତ ବ୍ଯକ୍ତିଙ୍କୁ ବଞ୍ଚାଇବାକୁ ଗୁଣିଆ ଆସି ବ୍ଯବଛେଦ ଗୃହରେ ଝଡ଼ାଫୁଙ୍କା କରିଥିଲା। ସେହି ସମୟରେ ସେହି ଘଟଣା ରାଜ୍ୟରେ ଚର୍ଚ୍ଚାର ବିଷୟ ପାଲଟିଥିଲା। 

ଏବେ ସିନ୍ଧେକେଲା ହସ୍ପିଟାଲରେ ଡାକ୍ତର ଅଭାବ।  ଜଣେ ମାତ୍ର ନିୟମିତ ଏମବିବିଏସ ଡାକ୍ତରରେ ହସ୍ପିଟାଲ ଚାଲିଛି ଗର୍ଭବତୀ ମହିଳା, ଶିଶୁ ରୋଗୀ, ଅସ୍ଥିଶଲ୍ୟ, ମେଡିସିନ କୌଣସି ବି ରୋଗୀ ପାଇଁ ପୁରା ବଙ୍ଗୋମୁଣ୍ଡା ବ୍ଲକରେ ହସ୍ପିଟାଲ ପହଞ୍ଚିଲେ ଡାକ୍ତର ହିଁ ନାହାନ୍ତି।  ବଙ୍ଗୋମୁଣ୍ଡା ବ୍ଲକର ମୁଖ୍ଯ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର ସିନ୍ଧେକେଲାରେ ଥିବା ବେଳେ ସିନ୍ଧେକେଲା ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର ଅଧିନରେ ବଙ୍ଗୋମୁଣ୍ଡା, ଭାଲୁମୁଣ୍ଡା, ଚୁଳିଫୁଙ୍କା, ବେଲପଡା, ଜାମଖୁଣ୍ଟାକୁ ନେଇ ୫ ଟି ପିଏଚସି ଥିବାବେଲେ ୧୬ ଟି ସବସେଣ୍ଟର ରହିଛି ତା ମଧ୍ୟରୁ ୧୦ ଗୋଟି ସବସେଣ୍ଟରକୁ ଏଚଡବ୍ଲୁସି ଘୋଷଣା କରାଯାଇ ସେହି ସେଣ୍ଟର ମାନଙ୍କରେ ସିଏଚଓ ପୋଷ୍ଟିଂ ହୋଇଛନ୍ତି ସେମାନେ ଆଉଟଡୋରରେ ରୋଗୀ ଦେଖୁଛନ୍ତି। କିନ୍ତୁ ଏ ସବୁଥିରେ ଡାକ୍ତର ଓ ଷ୍ଟାଫ କହିବାକୁ ଗଲେ ଜାମଖୁଣ୍ଟା ପିଏଚସି ର ଏମବିବିଏସ ଡାକ୍ତର ଜୟନ୍ତ ବାଗ ଟ୍ରେନିଂ ଯାଇଛନ୍ତି ଆୟୁଷ ଡାକ୍ତର ପୋଷ୍ଟିଂ ହୋଇନାହିଁ। ଭାଲୁମୁଣ୍ଡାରେ ଏମବିବିଏସ ଡାକ୍ତର କେ.କେ ଖୁଆସ ଅଛନ୍ତି ଆୟୁସ ଡାକ୍ତର ପୋଷ୍ଟିଂ ହୋଇନାହିଁ। ବଙ୍ଗୋମୁଣ୍ଡା ଓ ଚୁଳିଫୁଙ୍କାରେ ଉଭୟ ଏମବିବିଏସ ଓ ଆୟୁଷ ଡାକ୍ତର ଅଛନ୍ତି। ବେଳପଡାରେ ଆୟୁଷ ଡାକ୍ତର ବିଶ୍ବମ୍ବର ମେହେର ଥିବାବେଳେ ଏମବିବିଏସ ଡାକ୍ତର ନାହାନ୍ତି।

ନିୟମ ଅନୁଯାୟୀ ସିନ୍ଧେକେଲା ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରରେ ୯ ଜଣ ଡାକ୍ତର ରହିବା କଥା । ସିନ୍ଧେକେଲା ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରରେ ଡାକ୍ତର ଅଭାବ ଥାଇ ମଧ୍ଯ ପ୍ରତିଦିନ ୧୨୦ ରୁ ୧୫୦ ରୋଗୀ ଚିକିତ୍ସା ପାଇଁ ଆସିଥାନ୍ତି। ବିଗତ ଦିନରେ ସ୍ତ୍ରୀ ଓ ପ୍ରସୂତୀ ବିଶେଷଜ୍ଞ ଡାକ୍ତର ଥିବାବେଳେ ଗୋଟିଏ ବର୍ଷରେ ପ୍ରାୟ ୧ ହଜାର ୮ ଜଣ ମହିଳାଙ୍କ ଡେଲିଭରି ହୋଇପାରିଥିଲା ଏହି ସ୍ବାସ୍ଥ୍ୟକେନ୍ଦ୍ର ରେ। ଏଥିରୁ ସ୍ପଷ୍ଟ ଯେ ସିନ୍ଧେକେଲା ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର ଉପରେ କେତେ ଭରସା ରଖିଛନ୍ତି ଅଞ୍ଚଳର ଲୋକେ। 
ତଥାପି ବର୍ତ୍ତମାନ ସମୟରେ ଏହି ସ୍ବାସ୍ଥ୍ୟକେନ୍ଦ୍ର ଜଣେ ନିୟମିତ ଏମବିବିଏସ ଡାକ୍ତର ଜଣେ ଡେପୁଟେସନରେ ଥିବା ଏମବିବିଏସ୍ ଡାକ୍ତର ଓ ୨ଜଣ କଣ୍ଟ୍ରାକ୍ଚୁଆଲ ଡାକ୍ତରଙ୍କ ଭରସାରେ ଚାଳିଛି। ହେଲେ ସିନ୍ଧେକେଲା ହସ୍ପିଟାଲରେ ଡାକ୍ତର ଅଭାବରୁ ଏବେ ଏହା ଏକ ରେଫରାଲ ସେଣ୍ଟର ହୋଇଛି। ତେଣୁ ନାମକୁମାତ୍ର ସ୍ବାସ୍ଥ୍ୟସେବା ମିଳୁଥିବାରୁ ଜ୍ବର ହେଉକି ଆଉକିଛି ଲୋକେ ଗାଁ ମାନଙ୍କରେ କ୍ବାକ୍ ହେଉକି ଗୁଣିଆକୁ ଡାକୁଛନ୍ତି।