18-May-2023

ସୁବର୍ଣ୍ଣପୁର(ମନୋରଞ୍ଜନ ତ୍ରିପାଠୀ ):  ସମ୍ପ୍ରତି ପଶ୍ଚିମ ଓଡିଶା ଏବେ ପ୍ରଚଣ୍ଡ ରୌଦ୍ର ତାପ ରେ ଜଳି ପୋଡି ଯାଉଥିବା ବେଳେ ସାବିତ୍ରୀ ଅମାବାସ୍ୟା ପୂଜା ପାଇଁ ସୁବର୍ଣ୍ଣପୁର ସହର ଚଳ ଚଞ୍ଚଳ ହୋଇ ଉଠିଛି l ସେପଟେ ସାବିତ୍ରୀ ମାନଙ୍କ ପୂଜା ଓ ଲୁଗା ସାମଗ୍ରୀ ସଂଗ୍ରହ ପାଇଁ ବିଶେଷ କରି ସାବିତ୍ରୀ ମାନଙ୍କ ଅର୍ଡର ଓ ତାତି ରେ ସତ୍ୟବାନ ମାନେ ବେହାଲ ହୋଇ ପଡିଛନ୍ତି l ୪୭ ଡିଗ୍ରୀ  ଖରା ଓ ଗୁଳୁଗୁଳି ରେ ୧୦୮ ପ୍ରକାର ଫଳ ମୂଳ ସଂଗ୍ରହ ଓ ଲୁଗା ସାମଗ୍ରୀ ସଂଗ୍ରହ ରେ  ଶ୍ରୀ ଗୁଣ୍ଡିଚା ମନ୍ଦିର  ବଡ଼ ବଜାର ଠାରୁ ଗ୍ରୀଡ଼କୋ କଲୋନୀ ମାର୍କେଟ ଯାଏ ପ୍ରଚଣ୍ଡ ଖରାରେ ଦମ୍ପତି ମାନେ ଦୋକାନ ଦୋକାନ ବୁଲି ମୂଳ ଚାଲ କରିବା ବେଳେ ୧୦୮ ଆମ୍ବୁଲାନ୍ସ ଖୋଜା ପଡୁଛି l  ପୁଣି  ମହିଳା ମାନେ ମାଳ ମାଳ ସୁନା ଗହଣା ପିନ୍ଧି ବଜାରରେ ପ୍ରବଳ ଭିଡ଼ ଜମାଉ ଥିବାରୁ ପୋଲିସ ପ୍ରଶାସନ ମଧ୍ୟ ସୁରକ୍ଷା ଚିନ୍ତା ରେ ପଡିଛି l ଖରା ତାତି ନିଆଁକୁ  ସାବିତ୍ରୀଙ୍କ ନିଆଁରେ ଅଗ୍ନିଶମ  ବାହିନୀ ବି ପ୍ରସ୍ତୁତ ରହିଛନ୍ତି l ଫଳ ମୂଳ ବେପାରୀ ମାନେ ଦିବା ରାତ୍ର ପସରା ମେଳାଇ ଦେଇଛନ୍ତି l  ଜାଗା ପାଇଁ  ବେପାରୀଙ୍କ ମାଡ ଗୋଳ l ଏଣେ ବେପାରୀ ଭାଇ ମାନଙ୍କ ପୁଷ ମାସ ପରି ସବୁ ଜିନିଷ ମୂଲ୍ୟ ର ଡାହାଣ ପଟେ ମାତ୍ର ଗୋଟାଏ ଗୋଟାଏ ଶୂନ ବସାଇ ସାବିତ୍ରୀ ବଜାରକୁ ଦଖଲ କରି ନେଇଛନ୍ତି l ଏଣେ ଅଣନିଶ୍ୱାସୀ ସତ୍ୟବାନ ମାନେ ସାବିତ୍ରୀ ମାନଙ୍କ ଇଚ୍ଛା ପୂରଣ କରିବା ପାଇଁ ମୁହଁ ରେ ଚଷମା

ମୁଣ୍ଡରେ ଗାମୁଛା ଭିଡି ଅଂଶୁଘାତକୁ ଖାତିରି ନ କରି କିଣାବିକା ରେ ପୁରାପୁରି ଫୁଲଦମରେ ଲାଗି ପଡିଛନ୍ତି l ଏଠି ପ୍ରଶ୍ନ ଉଠେ ଯେ ସେଇ ପୂରା଼ଣ ଯୁଗର ସାବିତ୍ରୀ ମାନେ କଣ ସତ୍ୟବାନ ମାନଙ୍କୁ ଏତେ ଚାପ ଏତେ କଷ୍ଟ ଦେଇଥିବେ ? ତାଙ୍କରି ନିଷ୍ଠା, ତ୍ୟାଗ, ସତୀତ୍ୱ, ସର୍ବୋପରି ସମର୍ପିତ ମନୋଭାବ ହିଁ ସତ୍ୟବାନଙ୍କୁ ଯମରାଜଙ୍କ ମୁହଁରୁ ଫେରାଇ ଆଣିଥିଲା l ଏଣୁ ବର୍ତ୍ତମାନର ସାବିତ୍ରୀ ମାନେ ସେହି ଆଦର୍ଶରେ ଅନୁପ୍ରାଣିତ ହୋଇ ଚାକଚକ୍ୟ ଓ ଔପଚାରିକତାରୁ ଦୁରେଇ ରହିଲେ ଭାରତର ସେହି ମହାନ ସଂସ୍କୃତି ଉଜ୍ଜୀବିତ ହୋଇ ରହି ପାରିବ ନିଶ୍ଚିତ l ଏବଂ ଏହି ବେପାରୀ ଭାଇ ମାନଙ୍କ ଦୌରାତ୍ମ୍ୟ ମଧ୍ୟ କମିଯିବ l  ପ୍ରତ୍ୟେକ ପରିବାରରେ ଅଶାନ୍ତି ଦୂର ହେବ  ଓ ନାରୀ ମାନଙ୍କ ସେହି ପୂର୍ବ ମର୍ଯ୍ୟାଦା ପ୍ରତିଷ୍ଠା ହେବ ବଜାୟ ରହିବ l