12-May-2023

ଡୁଙ୍ଗୁରିପାଲି(ଅରବିନ୍ଦ ମିଶ୍ର)- ସୁବର୍ଣ୍ଣପୁର ଜିଲ୍ଲା ଡୁଙ୍ଗୁରିପାଲି ବ୍ଲକ ରାମପୁର ଥାନା ଅନ୍ତର୍ଗତ କନ୍ଦାଗାଡ ଗ୍ରାମର ରେଳବାଇ ପୋଲିସ କନେଷ୍ଟବଲଙ୍କ ଗତକାଲି ରାତିରେ ଡିଉଟିରେ ଥିବା ବେଳେ ଟ୍ରେନ୍‌ରେ କଟି ମୃତ୍ୟୁ ଘଟିଥିଲା । ଆଜି ମଧ୍ୟାହ୍ନରେ ଶବ ଗାଁରେ ପହଂଚିବା ପରେ ଏକ ଶୋକାକୁଳ ପରିବେଶ ସୃଷ୍ଟି ହୋଇଥିଲା । ସୁଚନା ଅନୁସାରେ କନ୍ଦାଗାଡ ଗ୍ରାମର ବସୁଦେବ ନାଏକଙ୍କ ଚାରିପୁଅ । ଦ୍ୱିତୀୟ ପୁଅ ଗତ ୭/୮ବର୍ଷହେବ ଏକ ଗାଡି ଧକ୍କାରେ ମୃତ୍ୟୁ ହୋଇଥିବା ବେଳେ ସାନପୁଅ ସରୋଜ ନାଏକ(୪୦) ରେଲବାଇ ପୁଲିସରେ ଚାକିରୀ କରୁଥିଲେ ।  ଗତକାଲି ଅପରାହ୍ନ ୪ଟାରୁ ରାତି ୧୨ଟା ପର୍ଯ୍ୟନ୍ତ ତାଙ୍କୁ ଟିଉଟି ରହିଥିଲା । ସେ କ୍ଷେତରାଜପୁର ରେଲ ଷ୍ଟେସନର ୱାସିଂ ଲାଇନରେ ଡ୍ୟିଟିରେ ଥିବା ବେଳେ  ଏହି ଘଟଣା ଘଟିଥିବା ସହକର୍ମୀମାନେ ପ୍ରକାଶ କରିଥିଲେ ।  ସେ ଅନେକ ସମୟ ପର୍ଯ୍ୟନ୍ତ ଦେଖା ନ ଦେବାରୁ ତାଙ୍କୁ ଫୋନ କରାଯାଇଥିଲା । ଫୋନ ନଉଠାଇବାରୁ ଖୋଜାଖୋଜି କରିବା ପରେ ରେଳ ଧାରଣାରେ ଟ୍ରେନରେ କଟି ପଡିଥିବା ଦେଖିବାକୁ ପାଇଥିଲେ ।  ଜିଆରପି  ପୁଲିସ ପହଂଚି ମୃତ ଦେହକୁ ଉଦ୍ଧାର କରିଥିଲେ । ସେଠାରେ ଶବ ବ୍ୟବଚ୍ଛେଦ ପରେ ଆଜି ଗାଁକୁ ମଧ୍ୟାହ୍ନରେ ମୃତ ଦେହ

ପହଂଚିଥିଲା । ଗାଁରେ ଏକ ଶୋକାକୁଳ ପରିବେଶ ସୃଷ୍ଟି ହୋଇଥିଲା । ବୃଦ୍ଧବାପା ବସୁଦେବ ନାଏକ,  ମାଁ ଲତା ନାଏକ,  ସ୍ତ୍ରୀ କବିତା, ସାତବର୍ଷର ଏକମାତ୍ର  ପୁଅ ଇସାନ ଉପସ୍ଥିତ ଥିଲେ । ମୃତ୍ୟୁକୁ କେହି ବିଶ୍ୱାସ କରିପାରୁନଥିଲେ । ସ୍ତ୍ରୀ କବିତା ସ୍ୱାମୀଙ୍କ  ଉପରେ ଲୋଟି ପଡି ଯାଇଥିଲେ । କ୍ଷଣକୁ କ୍ଷଣ ସେ ସଂଜ୍ଞାହୀନ ହୋଇ ପଡୁଥିଲେ । ବାପା କିଛି ବର୍ଷତଳେ ଗୋଟିଏ ପୁଅକୁ ହରାଇଥିବା ବେଳେ ଆଜି ଆଉ ଏକ ଜବାନ ପୁଅକୁ ହରାଇ ବାକ୍‌ଶୂନ୍ୟ ହୋଇ ପଡିଥିଲେ ।  ଗାଁରେ ଏଭଳି ଏକ ଶୋକାକୂଳ ପରିବେଶ ସୃଷ୍ଟି ହୋଇଥିଲା ଯେ ଗାଁ ସାରା ସରୋଜକୁ ଝୁରି ହେଉଥିଲେ । ଗାଁ ଶ୍ମଶାନରେ ତାଙ୍କର ଶବ ସଂସ୍କାର କରାଯାଇଥିଲା । ପୁଅ ଇଶାନ ମୁଖାଗ୍ନି ଦେଇଥିଲେ । ଆରପିଏଫ ପକ୍ଷରୁ ସମ୍ବଲପୁର ଆସିସଷ୍ଟାଣ୍ଟ କମାଡେଂଟ ମୁକେଶ କୁମାର, ଆଇଆଇସି ମୁନ୍ନା ଯାଦବଙ୍କ ସମେତ ବହୁ ରେଲବାଇ ଅଧିକାରୀ ଉପସ୍ଥିତ ରହି ଗାର୍ଡ ଅଫ୍ ଅର୍ନର ଦେଇଥିଲେ । ଶବରେ ଜାତୀୟ ପତାକା ଘୋଡାଇ ସଂପୂର୍ଣ୍ଣ ରାଷ୍ଟ୍ରୀୟ ମର୍ଯ୍ୟାଦା ରେଳବାଇ ଆରପିଏଫ ପକ୍ଷରୁ ପ୍ରଦାନ କରାଯାଇଥିଲା । ଗାଁରେ ଶବକୁ ସର୍ବସାଧାରଣଙ୍କ ଦର୍ଶନ ପାଇଁ କିଛିସମୟ ରଖାଯାଇଥିଲା । ରାମପୁର ଥାନା ସବ୍ ଇନ୍‌ସପେକ୍ଟର ଅବିନାଶ ପଧାନଙ୍କ ସମେତ ପୋଲିସ କର୍ମଚାରୀ ମଧ୍ୟ ଉପସ୍ଥିତ ଥିଲେ ।