12-May-2023

ବାଲାଙ୍ଗୀର(ପ୍ରେରଣା ଖବର)- ଛାତ୍ରଛାତ୍ରୀଙ୍କ ସଂସ୍କୃତ ଅଧ୍ୟୟନ ପାଇଁ ବଲାଙ୍ଗୀରରେ  ୧୯୧୨ ମସିହାରେ ସ୍ଥାପିତ  ହୋଇଥିବା ବିଦ୍ୟାଭୂଷଣ ସଂସ୍କୃତ ମହାବିଦ୍ୟାଳୟ ବର୍ତ୍ତମାନ ଚରମ ଅବ୍ୟବସ୍ଥା ମଧ୍ୟରେ ଗତି କରୁଛି । ଏକଦା ଏଠାରେ ସଂସ୍କୃତରେ ପିଜି ପାଠ୍ୟକ୍ରମର ବ୍ୟବସ୍ଥା ଥିଲା କିନ୍ତୁ ଦୁର୍ଭାଗ୍ୟ ଏବେ ଏଡ୍‌ମିସନ କଲା ପିଲା ବି ଏଠାରୁ ମୁହଁ ମୋଡି ଦେଉଛନ୍ତି । ଷଷ୍ଠ ରୁ ଦଶମ ଶ୍ରେଣୀ ର ଛାତ୍ରଛାତ୍ରୀ ମାନଙ୍କ ପାଇଁ ଉଦ୍ଦିଷ୍ଟ ଏହି ଶିକ୍ଷାନୁୁଷ୍ଠାନରେ ଛାତ୍ରଛାତ୍ରୀ ସଂଖ୍ୟା ହେଲା ମାତ୍ର ୧୬ । ସବୁଠାରୁ ଦୁଃଖର ବିଷୟ ହେଲା ଏହି ୧୬ଜଣ ଶିକ୍ଷାର୍ଥୀଙ୍କୁ ଶିକ୍ଷାଦାନ ପାଇଁ ଏଠାରେ ଅଛନ୍ତି ମାତ୍ର ଜଣେ ଶିକ୍ଷକ । ସୁଦୁର ବେଲଗାଁ ରୁ ଆସୁଥିବା ଆଉଜଣେ ଶିକ୍ଷକ ଏଠାରେ  ଡେପୁଟେସନ୍‌ରେ କାର୍ଯ୍ୟକରୁଛନ୍ତି । ସେ ବି  ସ୍କୁଲକୁ ସପ୍ତାହକ ତନି ଦିନ ଆସନ୍ତି ।  ୨ଠ୨୨ ମସିହାରେ ଏହି ସ୍କୁଲରୁ ୩ଜଣ ଶିକ୍ଷକ ଅବସର ନେବା ପରେ ଏବେ ଏହି ଦେଢ଼ ଜଣ ଶିକ୍ଷକ କାମ ତୁଲାଉଛନ୍ତି ।

ବଡ କଥା ହେଲା ସଂସ୍କୃତ କଲେଜରେ ସଂସ୍କୃତ ପଢ଼ାଇବା ପାଇଁ ଟ୍ରେଣ୍ଡ୍ ଟିଚର୍ ନାହାନ୍ତି । ଗଣିତ, ବିଜ୍ଞାନ ଓ ଇଂରାଜୀ ବିଷୟବସ୍ତୁ ପାଇଁ ମଧ୍ୟ କୌଣସି ଶିକ୍ଷକ ନଥିବା ବେଳେ  ହାଇୟର ସେକେଣ୍ଡେରି ବିଭାଗ ଅଧୀନରେ ଥିବା ଯୁକ୍ତ ୨ ଓ ଯୁକ୍ତ ୩ କଲେଜର ଅବସ୍ଥା ମଧ୍ୟ ତଦୃପ । ଏଠାରେ ସ୍ଥାୟୀ ପ୍ରିନ୍ସିପାଲ ନ ଥିବା ଯୋଗୁଁ ବଲାଙ୍ଗୀର ସରକାରୀ ମହିଳା ମହାବିଦ୍ୟାଳୟର ପ୍ରିନ୍ସିପାଲ ମନୋରଂଜନ ମିଶ୍ର ଏହି ଦାୟିତ୍ୱ ତୁଲାଉଛନ୍ତି । ପିଲା ମାନଙ୍କୁ ପାଠ ପଢ଼ାଇବା ପାଇଁ  ଏଠାରେ ମଧ୍ୟ ରେଗୁଲାର ଟିଚର ବଦଳରେ ଠିକା ଶିକ୍ଷକ କାମ ଚଳାଉଛନ୍ତି ।  ଛାତ୍ରଛାତ୍ରୀ ଓ ଶିକ୍ଷକଙ୍କ ଅଭାବ ଭିତରେ ଦେଖନ୍ତୁ ଆଉ ଏକ ଦୃଶ୍ୟ । ଏଠାରେ ଡିଇଓ ଅଫିସ ଅଧୀନରେ ଥିବା ଗଦା ଗଦା ମୂଲ୍ୟବାନ ବହିପତ୍ର ଏଠାରେ ଖତ ଖାଉଛି । ପିଲାଙ୍କ ପାଠ ପଢ଼ିବା ପାଇଁ ଉଦ୍ଦିଷ୍ଟ ସରକାରୀ ବହିର ଅବସ୍ଥା ଏପରି ।

ଏହି ସବୁ ଦୃଶ୍ୟ ଦେଖିଲେ ସ୍ପଷ୍ଟ ଭାବରେ ଜଣାପଡିବ ଏଠାରେ ପିଲାଙ୍କ ସଂସ୍କୃତ ପାଠପଢ଼ା କେଉଁ ଢ଼ଙ୍ଗରେ ଚାଲିଥିବ ।  ବଲାଙ୍ଗୀର ବିଧାୟକଙ୍କ ପାଣ୍ଠିରୁ ସ୍କୁଲର ବିଲ୍ଡିଙ୍ଗ ନିର୍ମାଣ ହୋଇଛି । କିନ୍ତୁ ଯେଉଁ ଉଦ୍ଦେଶ୍ୟ ନେଇ ସରକାର ଏହି ଶିକ୍ଷାନୁଷ୍ଠାନକୁ ନିର୍ମାଣ କରିଛନ୍ତି ତାର ଉଦ୍ଦେଶ୍ୟ ସାଧିତ ହୋଇପାରୁ ନାହିଁ । ବିଦ୍ୟାଭୂଷଣ ସଂସ୍କୃତ ମହାବିଦ୍ୟାଳୟର ଚରମ ଅବ୍ୟବସ୍ଥା ଏପରି ଲାଗି ରହିଲେ ଆଗାମୀ ଦିନରେ ଏହି ଶତାୟୁ ଶିକ୍ଷାନୁଷ୍ଠାନରେ ତାଲା ଝୁଲିବ, ଏଥିରେ ସନ୍ଦେହ ନାହିଁ । ତେଣୁ ରାଜ୍ୟ ସରକାର ଜିଲ୍ଲାର ଏହି ସର୍ବପୂରାତନ ଶିକ୍ଷାନୁଷ୍ଠାନର ପୁନଃରୁଦ୍ଧାର ପାଇଁ ଏବେ ଠାରୁ ଯତ୍ନବାନ ନହେଲେ ଏହି ଶିକ୍ଷାନୁଷ୍ଠାନ ଘୋର ଅନ୍ଧାକର ମଧ୍ୟରେ ବିଲୀନ ହୋଇଯିବା ସୁନିଶ୍ଚିତ ଅଟେ ।