07-May-2023

ବଲାଙ୍ଗୀର(ପ୍ରେରଣା ଖବର)ବଲାଙ୍ଗୀର ଜିଲ୍ଲାରେ ପ୍ରାୟ ୮ଟି ନଦନଦୀ ରହିଛି । ଏହିନଦୀରେ ବିପୁଳ ପରିମାଣର ବାଲି ଉଠୁଛି । ଜିଲ୍ଲାର ବିଭିନ୍ନ ତହସିଲ ଅଞ୍ଚଳରେ ବାଲିଘାଟ ଗୁଡିକ ଲିଜ୍‌ରେ ଦିଆଯାଇଛି । କିନ୍ତୁ ଲିଜ୍‌ଧାରୀମାନେ ଯେତେ ପରିମାଣରେ ରାଜସ୍ୱ ଦେଉଛନ୍ତି ତାଠୁ ଢେରଗୁଣ ବାଲି ଉଠାଇ ଚୋରାଚାଲାଣ କରୁଥିବା ଅଭିଯୋଗ ହେଉଛି । ଏପରକି ଯେଉଁ ଘାଟ ଲିଜରେ ନେଇଛନ୍ତି କେବଳ ସେଠୁନୁହେଁ ନଦୀର ଅନ୍ୟସ୍ଥାନରୁ ମଧ୍ୟ ବାଲି ଉଠାଉଯାଉଛି । ଲିଜଧାରୀମାନେ ରାଜସ୍ୱ ବିଭାଗରୁ ବାଲିଘାଟ ଲିଜରେ ନେଇ ପରେ ତାକୁ ଏକ ନିର୍ଦ୍ଦିଷ୍ଟ ଗୋଷ୍ଠୀ ହାତରେ ଟେକି ଦେଇଛନ୍ତି । ସେହି ବାଲିମାଫିଆମାନେ ନଦୀଭିତରୁ ଜେସିବି ଲଗାଇ ହାଇୱା ଯୋଗେ ବାଲିଚାଲାଣ କରୁଛନ୍ତି । ଲିଜ୍ ବେଳେ ହୋଇଥିବା ଚୁକ୍ତିରେ ଲିଜ୍‌ଧାରୀମାନେ କେଉଁ ଅଞ୍ଚଳରୁ କେତେ ବାଲି ଉଠାଇବେ ତଥା କେତେ ପର୍ଯ୍ୟନ୍ତ ବାଲିଉଠିବ ତାହା ସହଷ୍ପଷ୍ଟ ଉଲ୍ଲେଖ ରହିଥାଏ । କିନ୍ତୁ ଏମାନେ ଜେସିବି ଲଗାଇ ହାଇୱାରେ ବେଆଇନ ଭାବରେ ବାଲି ଚୋରାଚାଲାଣ କରୁଛନ୍ତି । ଅଲ୍ପପରିମାଣର ରୋୟାଲ୍ଟି ଦେଇ କୋଟି କୋଟି ଟଙ୍କାର ବାଲି ଚୋରାଚାଲାଣ କରୁଛନ୍ତି । ଏପରିକି ବଲାଙ୍ଗୀର ନଦୀମାନଙ୍କର ବାଲି ଆନ୍ଧ୍ରପ୍ରଦେଶର ବିଶାଖାପଟ୍ଟନମ(ୱାଲଟିୟର) ପର୍ଯ୍ୟନ୍ତ ଚୋରାଚାଲାଣ କରାଯାଉଛି । ଖୋଦ ରାଜସ୍ୱବିଭାଗର ଜ୍ଞାତସାରରେ ଏହି କାରବାର ଚାଲିଥିବା ଅଭିଯୋଗ ହୁଏ । ବଲାଙ୍ଗୀର ଜିଲ୍ଲାର ସୁକତେଲ ନଦୀରେ ବେଶିପରିମାଣରେ ଉନ୍ନତମାନର ବାଲି ମିଳିଥାଏ । ଏହାକୁ ବିଲଡିଂ,ବ୍ରୀଜ,ଘର ନିର୍ମାଣରେ ବ୍ୟବହାର ହୋଇଥାଏ । ରାଜ୍ୟର ଅନେକଗୁଡିଏ ନଦୀରେ ବାଲି ସରିଆସୁଥିବାରୁ ଏବେ ବଲାଙ୍ଗୀର ଜିଲ୍ଲା ମେନ୍ ଟାର୍ଗେଟରେ ରହିଛି ।

ବଲାଙ୍ଗୀର ଜିଲ୍ଲାର ଖପ୍ରାଖୋଲ,ପାଟଣାଗଡ,ବଲାଙ୍ଗୀର,ପୁଇଁତଳା ତହସିଲ ଅଞ୍ଚଳରେ ପ୍ରାୟ ୧୫ରୁ ଉର୍ଦ୍ଧ୍ୱ ବାଲିଘାଟ ନିଲାମ ହୋଇଛି । ଏହାବାଦ ବାଲିମାଫିଆମାନେ ସ୍ଥାନୀୟ କିଛି ଗ୍ରାମବାସୀଙ୍କୁ ଧରି ସେଠାରୁ ବେଧଡକ ବାଲି ଉଠାଉଛନ୍ତି । ରାଜସ୍ୱବିଭାଗ ଯେତେ ପରିମାଣରେ ରୋୟାଲ୍ଟି ପାଇବା କଥା ସେଥିରୁ ୨୫% ମଧ୍ୟ ପାଉନାହିଁ । ନିୟମ ରହିଛି ଲିଜ୍‌ଧାରୀମାନେ ଯେତେ ବାଲିଉଠାଇବେ ତାହା ରାଜସ୍ୱବିଭାଗ ଦେଇଥିବା ଫର୍ମରେ ଉଲ୍ଲେଖ କରିବେ ଓ ତହସିଲରେ ଜମାଦେବେ । କେଉଁଦିନ କେତେ ବାଲି ଉଠିଲା ତାହାକୁ ରାଜସ୍ୱଅଧିକାରୀ ଯାଞ୍ଚ କରିବେ । ଯଦି ସେଥିରେ ଖିଲାପ ହୋଇଥାଏ ତାହେଲେ ସେହି ଲିଜକୁ ବାତିଲ କରି ଫାଇନ ଆଦାୟ କରିବେ । ନଦୀରୁ ବେଆଇନ ଭାବରେ ବାଲି ଉଠାଇଲେ ତାଉପରେ ତହସିଲଦାର ଏନଫୋର୍ସମେଣ୍ଟ ଟିମ୍ ନେଇ ଚଢାଉ କରି କାର୍ଯ୍ୟାନୁଷ୍ଠାନ ନେବେ । କିନ୍ତୁ ରାଜସ୍ୱବିଭାଗର ଅଧିକାରୀ ନିଜେ ବାଲିମାଫିଆଙ୍କ ସାଙ୍ଗରେ ମିଶିଛନ୍ତି ସେଥିପାଇଁ କୌଣସି କାର୍ଯ୍ୟାନୁଷ୍ଠାନ ହେଉନାହିଁ । ବଲାଙ୍ଗୀର ସହରର ଜଣେ ନିର୍ଦ୍ଦିଷ୍ଟ ବାଲିମାଫିଆ ପ୍ରତ୍ୟହ ୬୦ଟ୍ରିପରୁ ଅଧିକ ବାଲି ବାହାର ରାଜ୍ୟକୁ ଚୋରାଚାଲାଣ କରୁଥିବା ଅଭିଯୋଗ ହେଉଛି । ସ୍ଥାନୀୟ ପୋଲିସ ଓ ପ୍ରଶାସନର ଜ୍ଞାତସାରରେ ଏହା ଚାଲିଥିବାରୁ କୌଣସି କାର୍ଯ୍ୟାନୁଷ୍ଠାନ ହେଉନାହିଁ ।

ସୋନପୁର ଜିଲ୍ଲାର ଖାରୀ,ରମ୍ଭାସିଣ୍ଢୋଲ,କଦଳିପାଲିଠାରୁ ଆରମ୍ଭ କରି ବଲାଙ୍ଗୀର ଜିଲ୍ଲାର ଲୁକାପଡା,ପିପିର୍ଡା,ବିଲେଇସର୍ଡା,ରାକ୍ସୀମୁଣ୍ଡା,ଫାସଡ,ଛତାମଖନା,ଚନ୍ଦନଭାଟି ,କୁଟୁମଡୋଲା ବାଲିଘାଟ ଏକ ନିର୍ଦ୍ଦିଷ୍ଟ ଗୋଷ୍ଠୀଦ୍ୱାରା ପରିଚାଳିତ ହେଉଥିବା ଆଲୋଚନା ହେଉଛି । ତେଣୁ ପ୍ରଶାସନର ଅଧିକାରୀମାନେ ତାଙ୍କ ଭାଗଖାଇ କୌଣସି କାର୍ଯ୍ୟାନୁଷ୍ଠାନ ନେଉନାହାଁନ୍ତି । ଏପରିକି ନଦୀରେ ଥିବା ପୋଲମାନଙ୍କଠାରୁ ୫୦୦ମିଟର ଦୂରତା ପର୍ଯ୍ୟନ୍ତ ବାଲି ଉଠାଯାଇ ପାରିବ ନାହିଁ ବୋଲି ନିୟମ ରହିଛି । ଠିକ ସେହିପରି ଗ୍ରାମାଞ୍ଚଳକୁ ପାନୀୟଜଳ ଯୋଗାଣ ପାଇଁ ନିର୍ମାଣ କରାଯାଇଥିବା ଥିବା ଇନଟେକୱେଲ ପାଖରୁ ମଧ୍ୟ ବାଲି ଉଠାଯାଇପାରିବ ନାହିଁ । କିନ୍ତୁ ଏହି ନୀୟମକୁ ଖୋଲାଖୋଲି ଉଲଂଘନ କରାଯାଉଛି । ସେଥିପାଇଁ ସୁକତେଲ ନଦୀରେ ଭୂତଳ-ଜଳସ୍ରୌତ କମିଯାଉଛି । ତେଣୁ ରାଜ୍ୟସରକାର ତୁରନ୍ତ ଏଦିଗରେ ପଦକ୍ଷେପେ ନେବାର ଆବଶ୍ୟକତା ରହିଛି ବୋଲି ଜନସାଧାରଣରେ ଦାବି ହେଉଛି । ଏନେଇ ବଲାଙ୍ଗୀର ଅତିରିକ୍ତ ଜିଲ୍ଲାପାଳ (ରାଜସ୍ୱ) ମହେନ୍ଦ୍ର ମହାପାତ୍ରଙ୍କୁ ପଚାରିବାରୁ ତହସିଲଦାରମାନେ ବିଭିନ୍ନ ସମୟରେ ଏନଫୋର୍ସମେଣ୍ଟ କରୁଛନ୍ତି । ଯଦି କୌଣସି ଅଞ୍ଚଳରେ ବେଆଇନଭାବରେ ବାଲି ଉଠୁଥିଲେ ଆମେ କାର୍ଯ୍ୟାନୁଷ୍ଠାନ ନେବୁ ବୋଲି କହିଛନ୍ତି ।