07-May-2023

ବୀରମହାରାଜପୁର, (ବିନୋଦ ପାଣ୍ଡେ) : ସୁବର୍ଣ୍ଣପୁର ଜିଲ୍ଲାର ବୀରମହାରାଜପୁର ବନାଞ୍ଚଳ ଅଧିନସ୍ଥ ସୁବଳୟା ରେଞ୍ଜର ଚନ୍ଦିଲି ସଂରକ୍ଷିତ ଜଙ୍ଗଲରେ ଜଳାଭାବ ପରିସ୍ଥିତି ସୃଷ୍ଟି ହୋଇଛି। ଫଳରେ ଉକ୍ତ ଜଙ୍ଗଲରେ ଥିବା ବନ୍ୟପ୍ରାଣୀ ପାଣି ପାଇଁ ଡହଳ ବିକଳ ହୋଇ ପଡ଼ୁଛନ୍ତି। ଏହି ସଂରକ୍ଷିତ ଜଙ୍ଗଲର ଚତୁଃପାର୍ଶ୍ଵରେ ୭ ଗୋଟି ଛଟ ବଡ ଜଳାଶୟ ନିର୍ମାଣ ହୋଇଛି।‌ ହେଲେ ଉକ୍ତ ଜଳାଶୟ ରେ  ପିମ୍ପୁଡ଼ି ପିଇବା ପାଇଁ ପାଣି ଟୋପାଏ ନାହିଁ। ବର୍ତ୍ତମାନ ଜଙ୍ଗଲରେ ବିଚରଣ କରୁଥିବା ପ୍ରାଣୀଙ୍କ ପରିସ୍ଥିତି ଅସମ୍ଭାଳ ହୋଇ ପଡ଼ିଛି। ଗ୍ରାମ୍ୟ ଜଙ୍ଗଲ ଓ ସଂରକ୍ଷିତ ଜଙ୍ଗଲ ସବୁ ଆଡ଼େ ଜଳ ସଙ୍କଟ ଯୋଗୁଁ ବନ୍ୟପ୍ରାଣୀ ଜନବସତି ମୁହାଁ ହେଉଛନ୍ତି। ଫଳରେ ଅନେକ ସମୟରେ ଶିକାରୀ ହାବୁଡ଼ରେ ପଡୁଥିବା ଦେଖିବାକୁ ମିଳିଛି। ରାଜ୍ୟ ସରକାରଙ୍କ ରାଜସ୍ବ ରୁ ପ୍ରତିବର୍ଷ ଜଙ୍ଗଲରେ ବନ୍ୟପ୍ରାଣୀ ମାନଙ୍କ ପାଇଁ  ପୋଖରୀ ଖନନ ବାବଦରେ ଲକ୍ଷାଧିକ ଟଙ୍କା ଖର୍ଚ୍ଚ କରାଯାଉଛି। ହେଲେ ଜୀବଜନ୍ତୁ ଙ୍କ କାର୍ଯ୍ୟରେ ଲାଗିପାରୁ ନାହିଁ। ଉକ୍ତ ଜଙ୍ଗଲର ବନ୍ୟପ୍ରାଣୀ ମାନେ ନିକଟସ୍ଥ ଗାଁ ପୋଖରୀ କୁ ପିଇବା ପାଣି ପାଇଁ ଆସି ଅସାମାଜିକ ବ୍ୟକ୍ତିଙ୍କ ହାବୁଡ଼ରେ ପଡ଼ି ମୃତ୍ୟୁ ବରଣ କରୁଥିବା ଅଭିଯୋଗ ହେଉଛି। ଏନେଇ ବନ ବିଭାଗ ଅଧିକାରୀ ଅଭିନାଷ ବେରିହା ଙ୍କୁ ଯୋଗାଯୋଗ କରାଯାଇଥିଲେ ମଧ୍ୟ ସମ୍ଭବ ହୋଇପାରି ନଥିଲା।