07-May-2023

ବିନିକା(ହିମାଂଶୁ ଶେଖର ପୁଟେଲ) ମଧ୍ୟାହ୍ନ ପ୍ରାୟ ୧ଟା ସମୟରେ ବିନିକା ସହର ଠାରୁ ସୋନପୁର ପଟକୁ ମାତ୍ର କେଇ ମିଟର ଗଲାପରେ ସ୍କୁଟିରେ BB ଯାଉଥିବା ସ୍ୱାମୀ/ସ୍ତ୍ରୀଙ୍କ ପିଛା କରି ମହିଳାଙ୍କ ବେକରୁ ଆଖି ପିଛୁଲାକେ ଦୁଇଗୋଟି ସୁନା ଚେନ ମାଳି ଲୁଟି ନେଇ ଫେରାର ଥିବା ଦୁଇଜଣ ଦୂର୍ବୁତ୍ତଙ୍କୁ ପୋଲିସ ଗିରଫ କରି ଆଜି କୋଟ ଚାଲାଣ କରିଥିବା ଜଣାପଡିଛି ।ସେହି ଦୁଇଜଣ ଦୁର୍ବୃତ୍ତ ହେଉଛନ୍ତି ସୁବର୍ଣ୍ଣପୁର ଜିଲ୍ଲା ସଦର ଥାନା ନାଗପାଲି ଗ୍ରାମର ନରେନ୍ଦ୍ର ଭାରତୀ ଓ ରଞ୍ଜନ ମେଘନୀ ।ଘଟଣାଟି ଚଳିତ ମାସ ୩ ତାରିଖର । ସମ୍ବଲପୁର ଜିଲ୍ଲା ଧମା ଥାନା ଅଧୀନ ସାହସପୁର ଗ୍ରାମର ତ୍ରିଲୋଚନ ପଣ୍ଡା ଓ ତାଙ୍କ ସହଧର୍ମିଣୀ ରେଣୁକା ପଣ୍ଡା ବିନିକା ଏନଏସି ଅଧିନସ୍ଥ ଡଭଲା ଠାରେ ଭୋଜି ଖାଇ ଦିନ ପ୍ରାୟ ୧୨.୪୫ ମିନିଟ ସମୟରେ ସ୍କୁଟିରେ ନିଜର ସମ୍ପର୍କୀୟ ଫୁଳମୁଠୀ ଗ୍ରାମକୁ ଯାଉଥିଲେ । ବିନିକା-ସୋନପୁର ମୁଖ୍ୟ ରାସ୍ତା ସହର ଠାରୁ କେଇ ମିଟର ସୋନାଳିକା ସୋ ରୁମ ପାରି ହେବାପରେ ପୂର୍ବରୁ ବାଇକରେ ପିଛା କରି ଆସୁଥିବା ଦୁର୍ବୃତ୍ତ ମାନେ ଆଖି ପିଛୁଳାକେ ମହିଳାଙ୍କ ବେକରୁ ସୁନା ଚେନ ଲୁଟ କରି ଦୃତ ଗତିରେ ଆଗକୁ ଚାଲିଯାଇଥିଲେ ।ଫଳରେ ଉଭୟ ସ୍ବାମୀ ସ୍ତ୍ରୀ ଭୟଭୀତ ହୋଇପଡ଼ିଥିଲେ ।ରାସ୍ତାରେ ଯିବା ଆସିବା କରୁଥିବା ଲୋକେ ଘଟଣା ଜାଣି ଦୁର୍ବୃତ୍ତ ମାନଙ୍କ ପିଛା କରିଥିଲେ ହେଁ ସେମାନେ ଧରା ପଡିନଥିଲେ । ଏନେଇ ରେଣୁକା ୪ତାରିଖରେ ବିନିକା ଥାନାରେ ଅଭିଯୋଗ କରିବା ପରେ ପୋଲିସ ତରଫରୁ ମାମଲା ରୁଜ୍ଜୁ ହୋଇ ତଦନ୍ତ ଆରମ୍ଭ ହୋଇଥିଲା । ସହର ମୁଖ୍ୟରାସ୍ତାର ବିଭିନ୍ନ ସ୍ଥାନରେ ଲାଗିଥିବା ସିସି ଟିଭି ଫୁଟେଜ ଅଭିଯୋଗକାରୀଙ୍କ ସମ୍ପର୍କ ଓ ପୋଲିସ ତରଫରୁ ଯାଞ୍ଚ କରାଯାଇଥିଲା ସିସିଟିଭି ଫୁଟେଜ ଫଟୋକୁ ଦେଖି  ସେହିଦିନ ଅଭିଯୋଗକାରୀ ସମ୍ପର୍କୀୟ ଚୋର ମାନଙ୍କୁ କୌଣସି ମାଧ୍ୟମରେ ଚିହ୍ନଟ କରି ପୋଲିସ କୁ ଜଣାଇବା ପରେ ପୋଲିସ ୩ଜଣଙ୍କୁ ସନ୍ଦେହରେ ଆଣି ଥାନାରେ ଅଟକ ରଖି ପଚରାଉଚରା କରିଥିଲା ।ପରେ କୌଣସି କାରଣରୁ ଉକ୍ତ ବ୍ୟକ୍ତି ମାନଙ୍କୁ ଛାଡ଼ି ଦେଇଥିଲା ।ଅଭିଯୋଗକାରୀ ଏବଂ ସାଧାରଣ ଜନତାଙ୍କ ତରଫରୁ ପୋଲିସର ଭୂମିକାକୁ ନେଇ ସନ୍ଦେହ ସୃଷ୍ଟି ହେବାସହ ଆନ୍ଦୋଳନ ପାଇଁ ଧମକ ଦେବାପରେ ପୋଲିସ ୫ତାରିଖରେ ଲୁଟ ଘଟଣାରେ ସଂଶ୍ଲିଷ୍ଟ ଦୁଇଜଣ ବ୍ୟକ୍ତିଙ୍କୁ ଗିରଫ କରି ଥାନାକୁ ଆଣିଥିଲା ।ଟିକିନିଖି ଭାବରେ ତଦନ୍ତ କରିବା ପରେ ଉକ୍ତ ଦୁର୍ବୃତ୍ତ ମାନଙ୍କ ଠାରୁ ୩ବାଇକ,ମୋବାଇଲ ଫୋନ,ବିଭିନ୍ନ ପ୍ରକାରର ହତିଆର ଜବତ କରାଯାଇଥିବା ଜଣାପଡ଼ିଛି।ହେଲେ ଲୁଟ ହୋଇଥିବା ୪୦ଗ୍ରାମ ସୁନା ଚେନ ମାଳି(ଯାହାର ମୂଲ୍ୟ ୨ଲକ୍ଷ ୪୦ହଜାର ହେବ)ଦୁର୍ବୃତ୍ତ ମାନେ କେଉଁଠି ରଖିଛନ୍ତି,କାହାକୁ ବିକ୍ରି କରିଛନ୍ତି ତାହା ପୋଲିସ ଉଦ୍ଧାର କରିବାରେ କେତେଦୂର ସଫଳ ହେବ ନା ଘଟଣାଟି ଫସକି ଯିବ  ସେନେଇ ସାଧାରଣରେ ଆଲୋଚନା ହେଉଛି । ରାସ୍ତା ମାନଙ୍କରେ ଲୁଟ,ଡକାୟତି,ରାହାଜାନୀ ଭଳି ଅନେକ ଘଟଣା ଘଟୁଥିବାରୁ ତାହାକୁ ପ୍ରତିହତ କରିବା ଦିଗରେ ସୁରକ୍ଷାର ପ୍ରହରୀ  ଭାବେ କାର୍ଯ୍ୟରତ ପୋଲିସ ଲୋକଙ୍କୁ ସୁରକ୍ଷା ଦେବାରେ ସଫଳ ହେବ ନା ନାହିଁ ତାହା ସମୟ ହିଁ କହିବ ।ତେବେ ଉକ୍ତ ଦୁଇ ଦୁବୁତ୍ତଙ୍କୁ ଆଜି ବିନିକା କୋଟକୁ ଚାଲାଣ କରାଯାଇଥିବା ବେଳେ ସେଠାରେ ବେଲ ନାମଞ୍ଜୁର ହେବାରୁ ଉଭୟଙ୍କୁ ସୋନପୁର ଜେଲ ହାଜତକୁ ପଠାଇ ଦିଆଯାଇଥିବା ଜଣାପଡିଛି ।