06-May-2023

ବଲାଙ୍ଗୀର, ପ୍ରତିବର୍ଷ ପରି ଏ ବର୍ଷ ମଧ୍ୟ ବଲାଙ୍ଗୀର ନାଗରିକ କମିଟି ତରଫରୁ ସ୍ଥାନୀୟ ଟାଉନ୍ ବାଳିକା ଉଚ୍ଚ ବିଦ୍ୟାଳୟର ସମ୍ମିଳନୀ କକ୍ଷ ଠାରେ ବୁଦ୍ଧ ଜୟନ୍ତୀ ପାଳିତ ହୋଇଯାଇଛି । ଏଥିରେ ମୁଖ୍ୟ ଅତିଥି ରୂପେ ପ୍ରଫେସର ଶିବ ପ୍ରସାଦ ନନ୍ଦ ଯୋଗ ଦେଇ ବୁଦ୍ଧଙ୍କ ଅହିଂସା ମାଧ୍ୟମରେ ବିଶ୍ୱରେ ଶାନ୍ତି ପ୍ରତିଷ୍ଠା ହୋଇପାରିବ ବୋଲି ମତବ୍ୟକ୍ତ କରି ଭଗବାନ ବୁଦ୍ଧ ସାମ୍ୟବାଦର ମୂଳସୂତ୍ର ଓ ଭାରତର ମାର୍ଟିର୍ନ ଲୁଥର୍ ବୋଲି ମତବ୍ୟକ୍ତ କରିଥିଲେ । ମୁଖ୍ୟବକ୍ତା ରୂପେ ଯୋଗ ଦେଇ ପ୍ରଫେସର ମଧୁସୂଦନ ପତି ସବୁ ସମୟ ଓ ପରିସ୍ଥିତିରେ ବୁଦ୍ଧଙ୍କ ବାଣୀ ବେଶ ପ୍ରାସଙ୍ଗିକ ବୋଲି

ମତବ୍ୟକ୍ତ କରି ବୁଦ୍ଧଙ୍କର ସଂଘ ଗଣତାନ୍ତ୍ରିକ ଉପାୟରେ ପରିଚାଳିତ ହେଉଥିଲା ବୋଲି କହିଥିଲେ । ନାଗରିକ କମିଟିର ସଭାପତି  ବେଲାର ସିଂ ଭୋଇ ଙ୍କ ସଭାପତିତ୍ୱରେ ସଂପାଦକ ମନୋରଂଜନ ସାହୁ କମିଟିର ଲକ୍ଷ୍ୟ ଓ ଉଦ୍ଦେଶ୍ୟ ମଧ୍ୟରୁ ବୁଦ୍ଧ ଜୟନ୍ତୀ ପାଳନ ଅନ୍ୟତମ ବୋଲି କହି ସଭାକୁ ପରିଚାଳନା କରିଥିଲେ । 
  ଏହି ଅବସରରେ ଏ ଅଂଚଳର ଉଦୀୟମାନ ପ୍ରତିଭା ବାନ୍ଧଶିଳ୍ପୀ ପଦ୍ମଶ୍ରୀ କୈଳାଶ ମେହେର ଓ ବାଲୁକା ଶିଳ୍ପୀ ଓମ୍‌ପ୍ରକାଶ ସାହୁଙ୍କୁ ସମ୍ମାନିତ କରାଯାଇଥିଲା ।

ସରୋଜ ଚୋପଦାର ଓ ଅଶୋକ କୁମାର ସାହୁଙ୍କୁ ନୂତନ ସଭ୍ୟ ରୂପେ ଗ୍ରହଣ କରାଯାଇ ସ୍ୱାଗତ କରାଯାଇଥିଲା । କମିଟିର ବରିଷ୍ଠ ସଭ୍ୟ ଗୋପଭୂଷଣ ନାଥ ଅତିଥି ମାନଙ୍କୁ ସ୍ୱାଗତ କରିଥିବା ବେଳେ ଦିବାକର ହୋତା ଧନ୍ୟବାଦ ଦେଇଥିଲେ । କମିଟିର ପୂର୍ବତନ ସଭାପତି ଡ. ଲକ୍ଷ୍ମୀକାନ୍ତ ମହାପାତ୍ର ଉପସ୍ଥିତ ଥିବା ବେଳେ ନିତ୍ୟାନନ୍ଦ ମିଶ୍ର, ଚକ୍ରପାଣି ଦାଶ, ପୀତବାସ ପଣ୍ଡା, ମନୋରଂଜନ ପୁରୋହିତ,ମାଲିଆ ଗୌଡ, ଦୁର୍ଗାପ୍ରସନ୍ନ ଛୁରିଆ, ଶ୍ରୀକାନ୍ତ ଶର୍ମା ପ୍ରମୁଖ ପରିଚାଳନାରେ ସହଯୋଗ କରିଥିଲେ ।