25-Apr-2023

ବଲାଙ୍ଗିର(ସନ୍ତୋଷ କୁମାର ଠାକୁର) ତା.୨୫.୦୪ - ଆଜି ବଲାଙ୍ଗିର ୟୁଥ୍ ଏକ୍ସନ କମିଟିର ସଭାପତି ବିନୋଦ କାଲସାଏଙ୍କ ସଭାପତିତ୍ୱରେ ଏକ ପ୍ରତିନିଧି ମଣ୍ଡଳି ବଲାଙ୍ଗିର ରେ କଳା ଶିକ୍ଷକ ନିଯୁକ୍ତି କୁ ସ୍ଥାନୀୟ ଆବେଦନକାରୀଙ୍କୁ ଆଗ୍ରାଧିକାର ଦେଇ ନିଯୁକ୍ତି ଦେବା ପାଇଁ ଜିଲ୍ଲାପାଳଙ୍କ ଉଦେଶ୍ୟରେ ଅତିରିକ୍ତ ଜିଲ୍ଲାପାଳ ଲମ୍ବୋଦର ଧରୁଆଙ୍କୁ ଦାବିପତ୍ର ପ୍ରଦାନ କରିଥିଲେ । ବଲାଙ୍ଗିର ଜିଲ୍ଲାରେ ଅନେକ ଦିନରୁ କଳା ଶିକ୍ଷକ ପଦବୀ ଖାଲି ପଡିଛି । ଅନ୍ୟ ସବୁ ଜିଲ୍ଲାମାନଙ୍କରେ ନିଯୁକ୍ତି ହୋଇସାରିଥିବା ବେଳେ ବଲାଙ୍ଗିର ଜିଲ୍ଲାରେ ଏ ପର୍ଯ୍ୟନ୍ତ ନିଯୁକ୍ତି ହୋଇନାହିଁ । ଗତ ୨୦୧୯ ମସିହାରେ ଜିଲ୍ଲା ପ୍ରଜେକ୍ଟ କାର୍ଯ୍ୟାଳୟ ବଲାଙ୍ଗିର ତରଫରୁ ପତ୍ର ସଂଖ୍ୟା ୩୮୨୬ ତା.୨୭.୧୨.୨୦୧୯ ରେ ବିଜ୍ଞପ୍ତି ପ୍ରକାଶ ପାଇଥିଲା । ଯେଉଁଥିରେ କଳା ଶିକ୍ଷକ ୧୬୯ ପଦବୀ ଓ ଖେଳ ଶିକ୍ଷକ ୨୧ ପଦବି ଥିଲା । ତାହା ସେହି ସମୟରେ ନିଯୁକ୍ତି ହୋଇନଥିଲା । ପରବର୍ତ୍ତି ସମୟରେ ୨୦୨୨ ରେ ପତ୍ର ସଂଖ୍ୟା ୨୦୫୭ ତା.୨୫.୦୮.୨୦୨୨ ରେ କଳା ଶିକ୍ଷକ ୧୨୬ ପଦବି ବାହାରିଥିଲା । ଅନେକ ସମୟରେ ଆଶାୟୀ ପ୍ରାର୍ଥୀଙ୍କ ଅଭିଯୋଗ ହୋଇ ଆସୁଛି ଯେ ନିଯୁକ୍ତିରେ କାହିଁକି ବିଳମ୍ବ ଘଟୁଛି । କେଉଁ କାରଣରୁ ଘଟୁଛି । ଜିଲ୍ଲା ପ୍ରଶାସନ ଜାଣିଶୁଣି ବିଳମ୍ବ କରୁଛି ଏବଂ ଜିଲ୍ଲା ବାହାରର ପ୍ରାର୍ଥୀମାନଙ୍କୁ ଅଗ୍ରାଧିକାର ଦେବାର ମସୁଧା କରୁଛି ଏବଂ ଗୋଟିଏ ପରେ ଗୋଟିଏ ବିଜ୍ଞପ୍ତି ବାହାର କରୁଛି ଯେଉଁଥିରେ ସ୍ଥାନୀୟ ଆଶାୟୀ ପ୍ରାର୍ଥୀ ହତାଶ ହେବାରେ ଲାଗିଛନ୍ତି । ଅନେକ ସମୟରେ ନଜର ରହିଛି ଯେ ସ୍ୱଳ୍ପ ବେତନ ଯୋଗୁଁ କଳା ଶିକ୍ଷକ ବାହାର ଜିଲ୍ଲାରୁ ପ୍ରାର୍ଥୀ ଚାକିରି ପାଇବା ସତ୍ତ୍ୱେ କିଛି ଦିନ କାର୍ଯ୍ୟରେ ଯୋଗ ଦେଲା ପରେ ରହିବା, ଖାଇବା ଅନେକ ସମସ୍ୟା ଯୋଗୁଁ ଚାକିରି ଛାଡି ପଳାଉଛନ୍ତି । ସେହି ସ୍ଥାନ ଗୁଡିକ ଖାଲି ହୋଇ ପଡୁଛି ଏବଂ ଯେଉଁମାନେ ରହୁଛନ୍ତି କମ୍ ଦରମା ହେତୁ ଅନେକ ଦୁର୍ନିତି କରିବା ପାଇଁ ବାଧ୍ୟ ହେଉଛନ୍ତି । ତେଣୁ ବଲାଙ୍ଗିର ଜିଲ୍ଲାର କଳା ସାଂସ୍କୃତି ସଂଘ ଓ ବ୍ଲକ ସାଂସ୍କୃତିକ ସଂଘ ମାନଙ୍କରେ ଜଡିତ ହୋଇ ଯେଉଁମାନଙ୍କର ଅଭିଜ୍ଞତା ଅଛି ଏବଂ ସେମାନେ ବଲାଙ୍ଗିର ଜିଲ୍ଲାର ସେମାନଙ୍କୁ ପ୍ରଥମେ ନିଯୁକ୍ତି ଦେବାକୁ ଦାବି କରାଯାଇଛି । ଏହି କାର୍ଯ୍ୟକ୍ରମରେ ୟୁଥ ଏକ୍ସନ କମିଟିର ଉପସଭାପତି ପିଙ୍କୁ ବନଛୋର, ରବି ଖମାରୀ, ଉପଦେଷ୍ଟା ପ୍ରଶାନ୍ତ ନାୟକ, ସଂଯୋଜକ ରିଲୁ ରଥ, ସଂପାଦକ ସୁମେଶ ଡାଙ୍ଗ ପ୍ରମୁଖ ଉପସ୍ଥିତ ଥିଲେ ।