24-Apr-2023

ସମ୍ବଲପୁର(ସଂଜୀବ ପାଣିଗ୍ରାହୀ/
ପବିତ୍ର ଅକ୍ଷୟ ତୃତୀୟା ଦିନ ଆଜି ପ୍ରଚଳିତ ପରମ୍ପରା ଅନୁସାରେ ସମ୍ବଲପୁର ପ୍ରସିଦ୍ଧ ଶୀତଳଷଷ୍ଠୀ ଯାତ୍ରାର ଆଦ୍ୟପର୍ବ ‘ଥାଳଉଠା'  କାର୍ଯ୍ୟକ୍ରମ ଅନୁଷ୍ଠିତ ହେବାକୁ ଥିବା ବେଳେ ଆୟୋଜନ କମିଟିଗୁଡ଼ିକ ପକ୍ଷରୁ ବ୍ୟାପକ ପ୍ରସ୍ତୁତି ଚାଲିଛି I ଅନ୍ୟ ବର୍ଷ ‘ଥାଳଉଠା'  କାର୍ଯ୍ୟକ୍ରମ ସନ୍ଧ୍ୟାରୁ ଆରମ୍ଭ ହୋଇ ସରିବା ବେଳକୁ ରାତି ପ୍ରାୟ ସାଢ଼େ ୯ଟା ହୋଇଯାଇଥାଏ। ତେବେ, ଚଳିତ ବର୍ଷ ଏଥିରେ ସାମାନ୍ୟ ବ୍ୟତିକ୍ରମ ଦେଖିବାକୁ ମିଳିବ I ସହରରେ ଜାରି କର୍ଫ୍ୟୁ କୋହଳ ସମୟ ସକାଳ ୫ଟାରୁ ରାତି ୮ଟା ପର୍ଯ୍ୟନ୍ତ ରହିଥିବାରୁ ଏହି ଅବଧି ମଧ୍ୟରେ ହିଁ ଏହି ପବିତ୍ର କାର୍ଯ୍ୟକ୍ରମ ସଂପନ୍ନ କରିବାକୁ ଆୟୋଜନ କମିଟିଗୁଡ଼ିକ ସ୍ଥିର କରିଥିବା ଜଣାପଡ଼ିଛି I ଆଜି ରବିବାର ନନ୍ଦପଡ଼ାର ବଂବରାଡ଼ ବାଲୁଙ୍କେଶ୍ବର ବାବାଙ୍କ ମନ୍ଦିରରୁ ଥାଳ ଉଠିବ I ଅପରାହ୍ନ ୩ଟାରୁ ୪ଟା ମଧ୍ୟରେ ଥାଳଉଠା କାର୍ଯ୍ୟକ୍ରମ ସଂପନ୍ନ ହେବ ବୋଲି ଆୟୋଜକ ଶୀତଳଷଷ୍ଠୀ ଯାତ୍ରା କମିଟି ଓ ଚିତ୍ରୋତ୍ପଳା ଯୁବକ ସଂଘ ପକ୍ଷରୁ ସୂଚନା ଦିଆଯାଇଛି I ସେହିପରି ଝାଡ଼ୁଆପଡ଼ାର ଲୋକନାଥ ବାବାଙ୍କ ମନ୍ଦିରରେ ଅପରାହ୍ନ ୪ଟାରେ ଥାଳ ଉଠିବ I ମୁଦିପଡ଼ାର ଜାଗେଶ୍ବର ବାବାଙ୍କ ମନ୍ଦିରରେ ସନ୍ଧ୍ୟା ୭ଟାରେ ଏହି ପବିତ୍ର କାର୍ଯ୍ୟକ୍ରମ ସଂପନ୍ନ ହେବ ବୋଲି ସୂଚନା ଦିଆଯାଇଛି। ସେହିପରି ବାଲିବନ୍ଧାର ସୋମନାଥ ବାବାଙ୍କ ମନ୍ଦିରରେ ଅପରାହ୍ନ ୫ଟା, ଠାକୁରପଡ଼ାର ଗୁପ୍ତେଶ୍ବର ବାବା ମନ୍ଦିରରେ ସାଢ଼େ ୫ଟା ଏବଂ ବଡ଼ବଜାରର ଶୀତ‌ଳେଶ୍ବର ବାବାଙ୍କ ମନ୍ଦିରରେ ୬ଟାରୁ ୭ଟା ମଧ୍ୟରେ ଥାଳ ଉଠିବ ବୋଲି ସୂଚନା ଦିଆଯାଇଛି I ବୁଢ଼ାରଜାର ପାହାଡ଼େଶ୍ବର ବାବାଙ୍କ ମନ୍ଦିରରେ ମଧ୍ୟାହ୍ନ ସାଢ଼େ ୧୨ଟା ଥାଳ ଉଠିବ । ଉଲ୍ଲେଖଯୋଗ୍ୟ ଯେ, ଆସନ୍ତା ମେ ୨୦ ତାରିଖରେ ଶୀତଳଷଷ୍ଠୀ ଯାତ୍ରା ଅବସରରେ ନନ୍ଦପଡ଼ାର ପତରପେଣ୍ଡି, ୨୧ ତାରିଖ ଦିନ ନୃସିଂହ ନିଉତା ଓ ୨୩ ତାରିଖ ଦିନ ସାକ୍ଷୀଗୋପୀନାଥଙ୍କ ଆଗମନ, ୨୪ ତାରିଖରେ ବାଲୁଙ୍କେଶ୍ୱର ବାବା ଓ ଜଗତଜନନୀ ମାତା ପାର୍ବତୀ ଙ୍କ ବିବାହ, ୨୫ ତାରିଖରେ ଶୀତଳଷଷ୍ଠି ରାତ୍ର ଶୋଭାଯାତ୍ରା, ୨୬ ତାରିଖ ନଗର ପରିକ୍ରମା ଓ ମନ୍ଦିର ପ୍ରବେଶ କାର୍ଯ୍ୟକ୍ରମ ସଂପନ୍ନ ହେବ I