01-Apr-2023

ବଲାଙ୍ଗୀର,-ପବିତ୍ର ରାମନବମୀ ଦିନ ପ୍ରଭୁଶ୍ରୀରାମଙ୍କ ଜନ୍ମଦିନ ଉପଲକ୍ଷେ ବଲାଙ୍ଗୀରର ବିଭିନ୍ନ ସ୍ଥାନରେ ରାମନବମୀ  ପାଳିତ ହୋଇଯାଇଛି । ଗୁରୁବାର ଦିନ ସଂଧ୍ୟାରେ ଜାଗନ୍ନାଥପଡା ରାମଜୀମନ୍ଦିର କମିଟି ତରଫରୁ ଏକ ବିଶାଳ ଶୋଭାଯାତ୍ରା ସହର ପରିକ୍ରମା କରିଛି । ରାମନବମୀ ଠାରୁ ପୌରାଣିକ ନାଟକ ରାମଲୀଳା ଆରମ୍ଭ ହେବାକୁ ଯାଉଥିବା ବେଳେ ରାମଲୀଳା  କମିଟିର ଗତକାଲିର ଶୋଭାଯାତ୍ରାକୁ ଖୁବ ଆକର୍ଷଣୀୟ କରାଯାଇଥିଲା ରାମସୀତା,ଲକ୍ଷ୍ମଣ ଓ ହନୁମାନ ବେଶରେ ସଜ୍ଜିତ ହୋଇ ଯୁବକମାନେ ବାହାରିଥିଲେ । କମିଟି ତରଫରୁ ପୂଜାର୍ଚ୍ଚନା କରାଯାଇ ଏକ ସୁସଜ୍ଜିତ ରଥରେ ଏମାନଙ୍କୁ ପରିକ୍ରମା କରାଯାଇଥିଲା । ଯୁବକ/ଯୁବତୀମାନେ ଜୟ ଶ୍ରୀରାମ ନାରାଦେଇ ସହରରେ ଆୟୋଜିତ ଶୋଭାଯାତ୍ରାରେ ସାମିଲ ହୋଇଥିଲେ । ଗେରୁଆବସ୍ତ୍ର ପରିଧାନ କରିଥିବା ଭକ୍ତମାନେ ଶୋଭାଯାତ୍ରାରେ ଖୁବ ସୁନ୍ଦର ଦେଖାଯାଉଥିଲେ । ଶୋଭାଯାତ୍ରା ରାମଜୀ ମନ୍ଦିରଠାରୁ ବାହାରି ଦୁର୍ଗାମନ୍ଦିର,ପାଟଣାଛକ,ସରକାରୀ ବସଷ୍ଟାଣ୍ଡ,ଘରୋଇ ବସଷ୍ଟାଣ୍ଡ,ରୁଗୁଡିପଡାଛକ,ପିପିଏକାଡେମୀଛକ,ବିକ୍ରମଛକ,ଦୈନିକବଜା.ସମଲେଶ୍ୱରୀ ମନ୍ଦିର ଦେଇ ପୁଣି ଜଗନ୍ନାଥପଡାର ନାଟ୍ୟମଣ୍ଡପକୁ ପହଞ୍ଚିଥିଲା । ରାମଲୀଳା ପାଇଁ ବ୍ରତଧାରୀମାନେ ଏଥିରେ ସାମିଲ ହୋଇଥିଲେ ।