23-Dec-2022

ସମ୍ବଲପୁର (ସଂଜୀବ ପାଣିଗ୍ରାହୀ)
ଓଡିଶା ସାଂସ୍କୃତିକ ପକ୍ଷରୁ ଆଜି ସ୍ୱାଧୀନତା ସଂଗ୍ରାମୀ ରେଣ୍ଡୋ ମାଝୀ ଜୟନ୍ତୀ ପାଳିତ ହୋଇଯାଇଛି। ସାଂସ୍କୃତିକ ମହତ୍ଵ ସମାଜର ଉପସଭାପତି ଶିବନାରାୟଣ ପାଣିଗ୍ରାହୀଙ୍କ  ଅଧ୍ୟକ୍ଷତାରେ ଆୟୋଜିତ ହୋଇଥିବା ଏହି ସଭାରେ ମୁଖ୍ୟବକ୍ତା ଭାବରେ ଶିକ୍ଷାବିତ୍ ଅରବିନ୍ଦ ମହାପାତ୍ର ଯୋଗଦେଇ କହିଥିଲେ ଯେ, ରେଣ୍ଡୋ ମାଝୀଙ୍କ  ଇଂରେଜ ଶାସନ ବିରୋଧରେ ସଂଗ୍ରାମ ପ୍ରଥମ ସ୍ୱାଧୀନତା ସଂଗ୍ରାମ ବୋଲି କୁହାଯାଉଥିବା ସିପାହୀ ବିଦ୍ରୋହର ବହୁ ପୂର୍ବରୁ ହୋଇଥିଲା। ସେତେବେଳେ ସାଧନର ବହୁ ଅଭାବ ସତ୍ତ୍ୱେ ଅଂଚଳର କନ୍ଧମାନଙ୍କୁ ସଂଘଠିତ କରି ଇଂରେଜମାନଙ୍କ ବିରୋଧରେ ଲେଢେଇ କରିବାରେ ସମର୍ଥ ହେବା ତାଙ୍କ ବଳିଷ୍ଠ ସାଂଗଠନିକ ଦକ୍ଷତାର ପ୍ରମାଣ ଦିଏ। ତେବେ ତାଙ୍କ ଉପରେ ଯେଭଳି ଗବେଷଣା ହେବାକଥା ଆଜି ପର୍ଯ୍ୟନ୍ତ ହୋଇ ପାରିନାହିଁ। ଅନ୍ୟତମ ବକ୍ତା ଐତିହାସିକ ଦୀପକ ପଣ୍ଡା କହିଲେ ଯେ ଓଡିଶା ଓ ନିକଟ ରାଜ୍ୟର  ଅନେକ ସ୍ଥାନରେ ଜନଜାତି ଗୋଷ୍ଠୀ ଇଂରେଜମାନଙ୍କ ବିରୋଧରେ ମେଳିବାନ୍ଧି ସଂଗ୍ରାମ କରିଛନ୍ତି ତେବେ ଉପଯୁକ୍ତ ପ୍ରମାଣ ଅଭାବରୁ ଇତିହାସ ସେ ଦିଗରେ ଅସ୍ପଷ୍ଟ ହୋଇ ରହିଯାଇଛି। ରେଣ୍ଡୋ ମାଝୀଙ୍କ ସଶସ୍ତ୍ର ସଂଗ୍ରାମ ଉପରେ ମଧ୍ଯ ଗବେଷଣା ଦିଗରେ ଅନୁରୂପ ସମସ୍ୟା ଦେଖିବାକୁ ମିଳେ। ସମ୍ପାଦକ ଡ. ସିଦ୍ଧାର୍ଥ ପଣ୍ଡା ପ୍ରାରମ୍ଭିକ ସୂଚନା ପ୍ରଦାନ କରିଥିବା ବେଳେ କୋଷାଧ୍ୟକ୍ଷ ଦୀନବନ୍ଧୁ ପଣ୍ଡା ଧନ୍ୟବାଦ ଅର୍ପଣ କରିଥିଲେ।