28-Oct-2022

ବିନିକା(ହିମାଂଶୁ ଶେଖର ପୁଟେଲ) ବିନିକା ଅଞ୍ଚଳର ପ୍ରସିଦ୍ଧ ଶୈବପୀଠ ଚରଦା ସ୍ଥିତ ବାବା କପିଳେଶ୍ୱର ମନ୍ଦିରରୁ ୨ଥର ଚୋରୀ ହୋଇଥିଲେ ହେଁ ଚୋରୀ ସାମଗ୍ରୀ ଉଦ୍ଧାର ତ ଦୂରର କଥା ଚୋର ମାନଙ୍କୁ ମଧ୍ୟ ପୋଲିସ ଧରିବାରେ ବିଫଳ ହୋଇଛି ବୋଲି ଅଞ୍ଚଳବାସୀଙ୍କ ତରଫରୁ ଅଭିଯୋଗ ହୋଇଛି ।ଯାହା ଫଳରେ କି ସୁରକ୍ଷା କର୍ତ୍ତା ଭାବେ ପରିଚିତ ପୋଲିସର କାର୍ଯ୍ୟକଳାପକୁ ନେଇ ମନ୍ଦିରର ସେବାୟତ,ଟ୍ରଷ୍ଟବୋର୍ଡ କମିଟି କର୍ମକର୍ତ୍ତାଙ୍କ ସହ ଅଞ୍ଚଳବାସୀ ନିନ୍ଦା କରିବା ସହ ପୋଲିସ ଉପରୁ ଭରସା ବିଶ୍ୱାସ ତୁଟି ଯାଉଛି ବୋଲି ସାଧାରଣରେ ଆଲୋଚନା ହେଉଛି ।ସୂଚନା ଯୋଗ୍ୟ ଯେ କିଛିଦିନ ତଳେ ଅର୍ଥାତ ୨୨ତାରିଖ ବିଳମ୍ବିତ ରାତିରେ କେତେକ ମୁଖାପିନ୍ଧା ଦୁର୍ବୃତ୍ତ ମନ୍ଦିର ପଛପଟୁ ପ୍ରବେଶ କରି ସିଂହଦ୍ଵାର,ବାବା କପିଳେଶ୍ୱର ପୀଠ ଓ ଇଷ୍ଟଦେବୀ ମା ଚରଦେଇ ମନ୍ଦିର ସମ୍ଭୁଖରେ ଥିବା ଦାନବାକ୍ସକୁ ଚତୁରତାର ସହିତ ତାଡି ସେଥିରେ ଥିବା ଭକ୍ତଙ୍କ ଦାନ ଟଙ୍କା ନେଇ ଯାଇଥିଲେ ।ସକାଳେ ଅନୁସନ୍ଧାନକାରୀ କୁକୁର ସହ ପୋଲିସ ଷ୍ଟାଫ ପହଞ୍ଚି ତଦନ୍ତ କରିଥିଲେ ହେଁ କୌଣସି ସୁରାକ ପାଇ ନଥିଲେ ।ତା ଆରଦିନ ୨୪ତାରିଖ ସକାଳେ ମନ୍ଦିର ଠାରୁ କିଛି ଦୂରରେ ଥିବା ଶନି ପାହାଡ଼ରୁ ଗୋଟିଏ ଦାନବାକ୍ସ ପୋଲିସ ଉଦ୍ଧାର କରିଥିଲା ଏବଂ ଦୁଇ ଜଣଙ୍କୁ ସନ୍ଦେହରେ ଆଣି ଥାନାରେ ଅଟକ ରଖି ପଚରାଉଚୁରା କରିବା ପରେ ଗତକାଲି ଉଭୟଙ୍କୁ ଛାଡ଼ି ଦେଇଛି । ପୋଲିସର ତଦନ୍ତ ବାଟବଣା ସଦୃଶ ଆଶଙ୍କା କରି ଆଜି କପିଳେଶ୍ୱର ଆଞ୍ଚଳିକ ଟ୍ରଷ୍ଟବୋର୍ଡ କମିଟିର କର୍ମକର୍ତ୍ତା, ମନ୍ଦିର ସେବାୟତ,ଅଞ୍ଚଳର ଶତାଧିକ ଜନସାଧାରଣ ବିନିକା ଥାନାକୁ ଆସି ଚୋରୀ ଘଟଣାର ବିଧିବଦ୍ଧ ତଦନ୍ତ ପୂର୍ବକ ଚୋରୀ ସାମଗ୍ରୀ ଉଦ୍ଧାର ଓ ଏଥିରେ ସଂଶ୍ଲିଷ୍ଟ ଚୋର ମାନଙ୍କୁ ତୁରନ୍ତ ଗିରଫ କରି ଘଟଣାର ପର୍ଦ୍ଦାଫାଶ କରିବାକୁ ଦାବିପତ୍ର ପ୍ରଦାନ କରିଛନ୍ତି ।ଏହାର ଅବିକଳ ନକଲ କପି ରାଜ୍ୟ ପୋଲିସ ମହାନିର୍ଦ୍ଦେଶକ ଭୁବନେଶ୍ୱରଙ୍କ ନିକଟକୁ ମଧ୍ୟ ପଠାଯାଇଛି ।ଦାବିପତ୍ରରେ ସେମାନେ ଉଲ୍ଲେଖ କରିଛନ୍ତି ଯେ ଚଳିତ ମାସ ୨୨ତାରିଖରେ ଚୋରୀ ଏବଂ ବିଗତ ୨୦୧୧ମସିହାରେ ମନ୍ଦିରରୁ ଲକ୍ଷାଧିକ ଟଙ୍କାର ସୁନା,ରୂପା ଅଳଙ୍କାର,ଦାନବାକ୍ସ ସହ ଗୁରୁତ୍ତ୍ୱପୂର୍ଣ କାଗଜ ପତ୍ର ବର୍ତମାନ ପର୍ଯ୍ୟନ୍ତ ପୋଲିସ ଉଦ୍ଧାର କରିବାରେ ବିଫଳ ହୋଇଛି । ଅଞ୍ଚଳର ଭାବାବେଗ ସହ ଜଡ଼ିତ ଏହି ଐତିହାସିକ ମନ୍ଦିରରୁ ବାରମ୍ବାର ଚୋରୀ ଓ ଚୋର ମାନେ ଧରା ନାପଡିବା କି ଚୋରୀ ସାମଗ୍ରୀ ଉଦ୍ଧାର ନହେବା ଘଟଣା ଶ୍ରଦ୍ଧାଳୁ ଭକ୍ତ,ସେବାୟତ ମହଲରେ ତୀବ୍ର ଅସନ୍ତୋଷ ପ୍ରକାଶ ପାଇଛି । ଦାବିପତ୍ର ଗ୍ରହଣ ପରେ ଥାନା ଭାରପ୍ରାପ୍ତ ଅଧିକାରୀ ପବିତ୍ର ସାହୁ ୪/୫ଦିନର ମହଲତ ଦେଇଛନ୍ତି । ଯଦି ଏହି ଶୀର୍ଷକାତର ପ୍ରସଙ୍ଗରେ ଉପଯୁକ୍ତ କାର୍ଯ୍ୟାନୁଷ୍ଠାନ ଗ୍ରହଣ କରା ନ ଯାଏ ତେବେ ପୋଲିସର କାର୍ଯ୍ୟକଳାପକୁ ନେଇ ଅଞ୍ଚଳବାସୀ ଆଗାମୀ ଦିନରେ ରାଜରାସ୍ତାକୁ ଓହ୍ଲାଇ ବିକ୍ଷୋଭ ପ୍ରଦର୍ଶନ କରିବେ ବୋଲି ଚେତାବନୀ ଦିଆଯାଇଛି ।