07-Dec-2025

ଭୁବନେଶ୍ୱର :(ପ୍ରେରଣା  ଖବର)- ପ୍ରଥମିକ ଶିକ୍ଷକ ମହାସଂଘ ପକ୍ଷରୁ ବିଭିନ୍ନ ଦାବି ନେଇ ଭୁବନେଶ୍ଵରରେ ଚାଲୁଥିବା ଅହୋରାତ୍ର ଧାରଣା ଚାଲୁରହିଛି । ପ୍ରାଥମିକ ଶିକ୍ଷା, ଶିକ୍ଷକ ଓ ଶିକ୍ଷାୟତନ ଏଲିମେଣ୍ଟାରୀ ସ୍ତରର ହୋଇଥିବାରୁ ନିଖିଳ ଉତ୍କଳ ନିମ୍ନ ମାଧ୍ୟମିକ ଶିକ୍ଷକ ସଂଘ (ଓଲଷ୍ଟା) ପକ୍ଷରୁ ଏହି ଆନ୍ଦୋଳନକୁ ଦୃଢ଼ ସମର୍ଥନ କରିଛି I ଗ୍ରାମଞ୍ଚଳରେ ଗଢ଼ି ଉଠିଥିବା ସମସ୍ତ ପ୍ରାଥମିକ ଉଚ୍ଚ ପ୍ରାଥମିକ ବିଦ୍ୟାଳୟଗୁଡ଼ିକରେ ଶିକ୍ଷକ ନିଯୁକ୍ତ ନ ହେବାରୁ ବିଦ୍ୟାଳୟରେ ନୈରାଶ୍ୟଜନକ ଅବସ୍ଥା ସୃଷ୍ଟି ହେବାରୁ ଛାତ୍ରଛାତ୍ରୀମାନେ ନାମ ଲେଖାଉ ନାହାନ୍ତି ।ଯାହା ଫଳ ସ୍ବରୂପ ଛାତ୍ରସଂଖ୍ୟା ଆଳରେ ରାଜ୍ୟ ସରକାର ବିଦ୍ୟାଳୟଗୁଡ଼ିକ ବନ୍ଦ କରି ଦେଉଛନ୍ତି । ଛାତ୍ରଛାତ୍ରୀମନେ ଦୂର ଦୂରାନ୍ତ ବିଦ୍ୟାଳୟକୁ ଯିବାକୁ ବହୁ ଅସୁବିଧାର ସମ୍ମୁଖୀନ ହେଉଛନ୍ତି । ରାଜ୍ୟରେ ଡ୍ରପଆଉଟ ସଂଖ୍ୟା ବଢ଼ିବା ସହ ପ୍ରଥମିକ ଶିକ୍ଷା ବ୍ୟବସ୍ଥା ଭୂଷୁଡ଼ି ପଡୁଥିବା ବେଳେ ରାଜ୍ୟ ସରକାର ନିଦାବିଷ୍ଣୁ ସାଜିବା କେତେଦୂର ଯୁକ୍ତିଯୁକ୍ତ। ପ୍ରାଥମିକ ଶିକ୍ଷକ ମହାସଂଘର ଦାବି ମଧ୍ୟରେ ୪୨୦୦ ଗ୍ରେଡ଼ ପେ, ଛଅଟି ନୋସନାଲ ଇନ୍‌କ୍ରିମେଣ୍ଟ ପ୍ରଦାନ ପ୍ରମୁଖ ଦାବି ରହିଛି । ତତ୍ ସହିତ ରାଜ୍ୟ ସରକାର ସମସ୍ତ ବିଭାଗରୁ ଠିକା ନିଯୁକ୍ତି ବ୍ୟବସ୍ଥା ଉଚ୍ଛେଦ କରିଥିବା ବେଳେ, ପ୍ରଥମିକ ଶିକ୍ଷା ବିଭାଗ ଏଥିରୁ ବାଦ୍ ପଡ଼ିବା ଏକ ଆଶ୍ଚର୍ଯ୍ୟଜନକ ଘଟଣା । ସବୁଠାରୁ ପରିଚାପର ବିଷୟ ଏହିକି ଯେ ପ୍ରାଥମିକ ବିଦ୍ୟାଳୟଗୁଡ଼ିକ ଜଣେ କିମ୍ବା ଦୁଇ ଜଣ ଶିକ୍ଷଳରେ କେବଳ ଧର୍ମକୁ ଆଖିଠାର ନ୍ୟାୟରେ ଚାଲୁଅଛି । ରାଜ୍ୟର ବର୍ତ୍ତମାନର ଜନପ୍ରିୟ ଡବଲ ଇଞ୍ଜିନ ସରକାର ପ୍ରାଥମିକ ଶିକ୍ଷକମାନଙ୍କ ଦାବି ଗୁଡ଼ିକୁ ତୁରନ୍ତ ପୂରଣ କରିବା ସହ ଏଲିମେଣ୍ଟାରୀସ୍ତରରେ ସମସ୍ତ ବର୍ଗର ବିଦ୍ୟାଳୟଗୁଡ଼ିକରେ ଶିକ୍ଷକ ନିଯୁକ୍ତି କରାଯିବାକୁ ନିଖିଳ ଉତ୍କଳ ନିମ୍ନ ମାଧ୍ୟମିକ ଶିକ୍ଷକ ସଂଘ (ଓଲଷ୍ଟା) ପକ୍ଷରୁ ସାଧାରଣ ସଂପାଦକ ଶ୍ରୀ ସୁକାନ୍ତ କୁମାର ବେହେରା ଦୃଢ଼ ଦାବି କରିଛନ୍ତି । ରାଜ୍ୟ ସରକାର ଯଦି ପ୍ରାଥମିକ ଶିକ୍ଷକ ମହାସଂଘର  ଦାବି ଗୁଡ଼ିକୁ ତୁରନ୍ତ ବିଚାର ନ କରନ୍ତି, ତେବେ ପ୍ରାଥମିକ ଶିକ୍ଷକ ମହାସଂଘ ଧାରଣାରେ ଓଲଷ୍ଟା ସାମିଲ ହେବ । ପ୍ରାଥମିକ ଶିକ୍ଷକମାନଙ୍କ ସ୍ଵାଭିମାନ, ଛାତ୍ରଛାତ୍ରୀମାନଙ୍କ ଅଧିକାର ତଥା ବିଦ୍ୟାଳୟର ଭିତିଭୂମି ସଜାଡ଼ିବା ପାଇଁ ରାଜ୍ୟର ପ୍ରାଥମିକ ଠାରୁ ବିଶ୍ଵ ବିଦ୍ୟାଳୟ ପର୍ଯ୍ୟନ୍ତ ସମସ୍ତ ଗଣ ସଂଗଠନକୁ ଆନ୍ଦୋଳନରେ ସାମିଲ ହେବାପଇଁ ଉଦ୍ୟମ କରିବ ବୋଲି ସଭାପତି - ଶ୍ରୀ ବିକ୍ରମ କୁମାର ଦାସ, ସାଧାରଣ ସଂପାଦକ – ଶ୍ରୀ ସୁକାନ୍ତ କୁମାର ବେହେରା, ଯୁଗ୍ମ ସାଧାରଣ ସଂପାଦକ - ଶ୍ରୀ ସୁଦର୍ଶନ ସ୍ଵାଇଁ, କୋଷାଧ୍ୟକ୍ଷ - ଶ୍ରୀ ଯୁଧିଷ୍ଠିର ପ୍ରଧାନ, ଏଡ଼ିଟର - ଶ୍ରୀ ସୁଶାନ୍ତ ପ୍ରଧାନ ପ୍ରଭୃତି ପ୍ରେସ୍ ଇସ୍ତାହାରରେ ଜଣାଇଛନ୍ତି।