30-Oct-2025

ଗଣିଆ(ବିଜୟଲକ୍ଷ୍ମୀ ରାଉତ) ଗଣିଆ ପଞ୍ଚାୟତ ଅନ୍ତର୍ଗତ ତେଲିସାହି ୫ନ° ଓ୍ବାର୍ଡର ପଛପାଖ ଡ୍ରେନ ନିର୍ମାଣ ନିମନ୍ତେ ୨୦୨୪/୨୫ ଆର୍ଥିକ ବର୍ଷରେ ସିଏଫସି ପାଣ୍ଠିରୁ ୮୦ ହଜାର ଟଙ୍କା ମଞ୍ଜୁର ହୋଇଥିଲା । କିନ୍ତୁ ୫ନ° ଓ୍ବାର୍ଡରେ କାର୍ଯ୍ୟ ନହୋଇ ୪ ନମ୍ବର ଓ୍ବାର୍ଡରେ କାର୍ଯ୍ୟ ହୋଇଥିବା ଫଟୋକୁ ଦର୍ଶାଇ ୫ନ° ଓ୍ବାର୍ଡର ବିଲ୍ ପଇଠ କରାଯାଇଥିବା ସମିତି ସଭ୍ୟ ଫକୀର ମୋହନ ଡାକୁଆ ଲିଖିତ ଅଭିଯୋଗ କରିଛନ୍ତିି । ଏହାର ଏକକିତା ନକଲ ଉପ ଜିଲ୍ଲାପାଳ, ଜିଲ୍ଲାପାଳ, ଜିଲ୍ଲା ପ୍ରକଳ୍ପ ନିର୍ଦ୍ଦେଶକଙ୍କୁ ପ୍ରଦାନ କରିଛନ୍ତି । ଏପରିକି ଯଦି ୭ ଦିନ ଭିତରେ କାର୍ଯ୍ୟାନୁଷ୍ଠାନ ଗ୍ରହଣ କରା ନଯାଏ ତେବେ ସେ ବ୍ଳକ ସମ୍ମୁଖରେ ଅନଶନ କରିବେ ବୋଲି ଚେତାବନୀ ଦେଇଛନ୍ତି । ତେବେ ଏ ସମ୍ପର୍କରେ ଜିଲ୍ଲା ପ୍ରକଳ୍ପ ନିର୍ଦ୍ଦେଶକ ଲଗ୍ନଜିତ ରାଉତଙ୍କୁ ପଚାରିବାରୁ ସମିତି ସଭ୍ୟ ଦେଇଥିବା ଅଭିଯୋଗ ତାଙ୍କର ହସ୍ତଗତ ହୋଇଥିବା ସେ ପ୍ରକାଶ କରିବା ସହିତ ତଦନ୍ତ ପରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ପ୍ରତିଶ୍ରୁତି ଦେଇଛନ୍ତି । ତେବେ ଉକ୍ତ ଘଟଣା ଭୁଲବଶତଃ ହୋଇଥିବା ତଥା ଉକ୍ତ କାର୍ଯ୍ୟର ବିଲ୍ ପଇଠ କରାଯାଇନଥିବା ସରପଞ୍ଚ ତାଙ୍କ ପ୍ରତିକ୍ରିୟାରେ ପ୍ରକାଶ କରିଛନ୍ତି । ଏପରିକି ରାଜନୈତିକ ଉଦ୍ଦେଶ୍ୟ ରଖି ସମିତି ସଭ୍ୟ ଏଭଳି ଅଭିଯୋଗ ଆଣିଥିବା ସେ ଜଣାଇଛନ୍ତି । ତେବେ ଏଠାରେ ପ୍ରଶ୍ନ ଉଠୁଛି ୫ ନ° ଓ୍ବାର୍ଡରେ ଫଳକଟିଏ ଲାଗି ନଥିଲେ ମଧ୍ୟ ତତ୍କାଳୀନ କନିଷ୍ଠ ଯନ୍ତ୍ରୀ ଏବଂ ସହକାରୀ ଯନ୍ତ୍ରୀ  କାର୍ଯ୍ୟ ହେଉଥିବା ସ୍ଥାନକୁ ନଯାଇ,ତଦାରଖ ନକରି କିଭଳି ବିଲ୍ ଫର୍ମ ପ୍ରସ୍ତୁତ କଲେ ଏବଂ ୭୪ ହଜାର ୨୩୬ ଟଙ୍କା ବିଲ୍ କଲେ । କେଉଁ ଆଧାରରେ କନିଷ୍ଠ ଯନ୍ତ୍ରୀ ଏବଂ ସହକାରୀ ଯନ୍ତ୍ରୀ ମହୋଦୟ ଏଭଳି ଅନୈତିକ କାର୍ଯ୍ୟ କରିଛନ୍ତି ତାହା ଏବେ ପ୍ରଶ୍ନବାଚୀ ସୃଷ୍ଟି ହୋଇଛି । ଆଉ ଗୋଟିଏ କଥା ପଞ୍ଚାୟତ କାର୍ଯ୍ୟନିର୍ବାହୀ ଅଧିକାରୀଙ୍କ ନାମରେ ଉକ୍ତ କାର୍ଯ୍ୟର କାର୍ଯ୍ୟାଦେଶ ଥିଲେ ମଧ୍ୟ ସିଏ କିଭଳି ଏହା ଜାଣିପାରିଲେ ନାହିଁ । ତେବେ ଏହାର ବିଧିବଦ୍ଧ ତଦନ୍ତ କରି ପ୍ରକୃତ ଘଟଣା ପଦାକୁ ଆଣିବା ସହିତ ଦୋଷୀଙ୍କ ବିରୁଦ୍ଧରେ ଦୃଢ‌‌‌ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଅଞ୍ଚଳବାସୀ ଦାବି କରିଛନ୍ତି । ତେବେ ଗଣିଆ ବିଡ଼ିଓ ପ୍ରିତିବାଳା ରଣା କନିଷ୍ଠ ଯନ୍ତ୍ରୀ ନେତ୍ର ରଞ୍ଜନ ମିଶ୍ର ଏବଂ ସହକାରୀ ଯନ୍ତ୍ରୀ ମହେଶ ପ୍ରସାଦ ନାୟକଙ୍କୁ ଉକ୍ତ ଘଟଣାର ତଦନ୍ତ କରି ତଥ୍ୟ ପ୍ରଦାନ କରିବାକୁ ନିର୍ଦ୍ଧେଶ ଦେଇଥିବା ଜଣାପଡିଛି ।