18-May-2025

ବଲାଙ୍ଗିର: ବଲାଙ୍ଗିର ସାମ୍ବାଦିକ ଭବନ ଠାରେ ସାମ୍ବାଦିକ ପ୍ରଶାନ୍ତ ମିଶ୍ରଙ୍କ ପ୍ରବନ୍ଧ ସଂକଳନ 'ପ୍ରତିପନ୍ନ'  ଷ୍ଟେଟ ୟୁନିୟନ୍ ଅଫ ଜର୍ଣାଲିଷ୍ଟ, ବଲାଙ୍ଗିର ଶାଖା ଆନୁକୂଲ୍ୟରେ ଉନ୍ମୋଚନ ହୋଇଯାଇଛି।ଏହି କାର୍ଯ୍ୟକ୍ରମରେ ମୁଖ୍ୟଅତିଥି ଭାବେ ରାଜେନ୍ଦ୍ର ବିଶ୍ଵବିଦ୍ୟାଳୟର କୁଳପତି ପ୍ରଫେସର ଡ.ଉମାବଲ୍ଲଭ ମହାପାତ୍ର, ମୁଖ୍ୟବକ୍ତା ଡ.ନୃପରାଜ୍ ସାହୁ, କୁଳସଚିବ, ସମ୍ବଲପୁର ବିଶ୍ୱବିଦ୍ୟାଳୟ,ସମ୍ମାନିତଅତିଥି ରାମଚନ୍ଦ୍ର ପଟେଲ ସଚିବ ଅଖିଳ ଭାରତୀୟ ସାହିତ୍ୟ ପରିଷଦ, ଅନ୍ୟତମ ସମ୍ମାନିତ ଅତିଥି ଶରତ କୁମାର ମହାକୁର, ସଭାପତି ଷ୍ଟେଟ ୟୁନିୟନ୍ ଅଫ ଜର୍ଣାଳିଷ୍ଟ,ବଲାଙ୍ଗିର ଜିଲ୍ଲା ଶାଖା ଏବଂ ରଘୁ ନନ୍ଦନ ସିଂହ ସମ୍ପାଦକ ଏସୟୁଜେ ଜିଲ୍ଲା ଶାଖା ବଲାଙ୍ଗିର ମଞ୍ଚାସୀନ ଥିଲେ।ସଭା ପ୍ରାରମ୍ଭରେ ରଘୁ ନନ୍ଦନ ସିଂହ ଅତିଥି ମାନଙ୍କୁ ମଞ୍ଚରେ ମଞ୍ଚାସୀନ ପାଇଁ ଆମନ୍ତ୍ରଣ କରିଥିବା ବେଳେ ସାମ୍ବାଦିକ ବିରେନ୍ଦ୍ର ଝାଙ୍କର ଅତିଥି ପରିଚୟ ପ୍ରଦାନ କରିଥିଲେ ସଭାକୁ ଲିଲି ପଟେଲ ସଞ୍ଚାଳନ କରିଥିଲେ। ପୁସ୍ତକର ଲେଖକ ପ୍ରଶାନ୍ତ ମିଶ୍ର ତାଙ୍କ ସାମ୍ବାଦିକ ଜୀବନର କିଛି ସାଉଁଟା ଅଭିଜ୍ଞତା ବାଣ୍ଟିଥିଲେ।ସମ୍ମାନିତ ଅତିଥି  ରାମଚନ୍ଦ୍ର ପଟେଲ ପୁସ୍ତକର ପ୍ରତିଟି ଲେଖା ଉପରେ ବିଶଦ ଭାବରେ ଆଲୋକପାତ କରି ଥିଲେ।ମୁଖ୍ୟବକ୍ତା ଡ.ନୃପରାଜ୍ ସାହୁ ତାଙ୍କ ବକ୍ତବ୍ୟରେ ପୁରୁଣା ସଂସ୍କୃତିକୁ ମନେ ପକାଇ ଲେଖକ ପ୍ରଶାନ୍ତ ମିଶ୍ରଙ୍କ ପ୍ରବନ୍ଧ ସହ ସମଭାବାପନ୍ନ ଥିବା ବିଷୟ ଉପସ୍ଥାପନ କରିଥିଲେ।ପୂର୍ବର ସ୍ମୃତି ପାଣି, ପବନ, ପୋଖରୀ,ମନ୍ଦିର,କୂଅ,ତୁଳସୀ ଚଉରା, ଅସଜଡା ଅଙ୍କାବଙ୍କା ରାସ୍ତା, ପର୍ବ ପର୍ବାଣୀ, ସଂସ୍କୃତି, ସେହି ପୁରୁଣା ପରମ୍ପରା ବଞ୍ଚି ରହିଛି ଯାହାକି ପୁସ୍ତକ ଲେଖିବାର ବାଟ ବତାଏ ବୋଲି ସେ ତାଙ୍କ ବକ୍ତବ୍ୟରେ ଉପସ୍ଥାପନ କରି ସମସ୍ତଙ୍କୁ ପୁରୁଣା ସ୍ମୃତି ମନେ ପକେଇ ଦେଇଥିଲେ। ମୁଖ୍ୟ ଅତିଥି ପ୍ରଫେସର ଡ.ଉମାବଲ୍ଲଭ ମହାପାତ୍ର ତାଙ୍କ ବକ୍ତବ୍ୟରେ ପ୍ରତିପନ୍ନ ପୁସ୍ତକର ଲେଖାକୁ ନେଇ ପ୍ରଶଂସା କରିଥିଲେ। ସେ ବକ୍ତବ୍ୟ ମାଧ୍ୟମରେ ତାଙ୍କର ପିଲା ଦିନର ଅନେକ ଅଭୁଲା ସ୍ମୃତିକୁ ବଖାଣି ଥିଲେ।ପରେ ଅତିଥି ମାନେ ତିନିଜଣଙ୍କ ନାମ ଲଟେରୀ ମାଧ୍ୟମରେ ଘୋଷଣା କରି ପୁରସ୍କାର ଦେଇଥିଲେ। ସଭାପତି ଶରତ ମହାକୁର ସଭାପତି ଅଭିଭାଷଣ ଦେଇଥିଲେ।ଶେଷରେ ଏସୟୁଜେ ର ରାଜ୍ୟ ଉପଦେଷ୍ଟା ବରିଷ୍ଠ ସାମ୍ବାଦିକ ଗୋପବନ୍ଧୁ ଶତପଥୀ ସମସ୍ତଙ୍କୁ ଧନ୍ୟବାଦ ଦେଇଥିଲେ।