28-Apr-2025

ବରଗଡ଼:(ନିରଞ୍ଜନ ତ୍ରିପାଠୀ)- ବରଗଡ଼ ଜିଲ୍ଲା ପ୍ରାଣୀସମ୍ପଦ ବିକାଶ ବିଭାଗ ତରଫରୁ ବିଶ୍ୱ ପ୍ରାଣୀ ଚିକିତ୍ସା ଦିବସ ୨୦୨୫ ସ୍ଥାନୀୟ ଜିଲ୍ଲା ପରିଷଦ ସମ୍ମିଳନୀ କକ୍ଷ ରେ  ପାଳିତ ହୋଇଯାଇଛି I ଏହି ଉତ୍ସବରେ ମାନ୍ୟବର ବିଧାୟକ ବରଗଡ ତଥା କୃଷି ,ଜଳସମ୍ପଦ ,ମତ୍ସ୍ୟ  ଓ ପ୍ରାଣୀସମ୍ପଦ ଉପରେ  ଗଠିତ ବିଧାନସଭା ସ୍ଥାୟୀ କମିଟି ଅଧ୍ୟକ୍ଷ ଶ୍ରୀ ଅଶ୍ୱିନୀ କୁମାର ଷଡ଼ଙ୍ଗୀ ମୁଖ୍ୟ ଅତିଥି ଭାବରେ ଯୋଗ ଦେଇଥିଲେI ଏହି ପରିପ୍ରେକ୍ଷୀରେ ଆୟୋଜିତ ହୋଇଥିବା କାର୍ଯକ୍ରମରେ ଜିଲ୍ଲା ମୁଖ୍ୟ ପ୍ରାଣୀ ଚିକିତ୍ସା ଅଧିକାରୀ ଡ. ନୀଳମଣି ଦୀପ  ପୌରୋହିତ୍ୟ କରି  ବିଶ୍ୱ ପ୍ରାଣୀ ଚିକିତ୍ସା ଦିବସ ପାଳନ ର ଆଭିମୁଖ୍ୟ ଉପରେ ଆଲୋଚନା କରି  ସମାଜରେ ପ୍ରାଣୀ ମାନଙ୍କ ସ୍ୱାସ୍ଥ୍ୟ ର ସୁରକ୍ଷା ଓ ପ୍ରାଣୀ ପାଳକଙ୍କ ଆର୍ଥିକ ଅଭିବୃଦ୍ଧିରେ ପ୍ରାଣୀ ଚିକିତ୍ସକଙ୍କ ଭୂମିକା ଉପରେ ଆଲୋକପାତ କରିଥିଲେ I କାର୍ଯକ୍ରମରେ ଯୋଗଦେଇଥିବା ଚାଷୀ,ପ୍ରାଣୀପାଳକ ,ବିଭାଗୀୟ କର୍ମକର୍ତ୍ତା ପ୍ରାଣୀପାଳନ ବିଶେଷ ଭାବରେ ଗୋପାଳନ କ୍ଷେତ୍ରରେ ସମ୍ମୁଖୀନ ହେଉଥିବା ବିଭିନ୍ନ  ସମସ୍ୟା  ବିଷୟରେ ସ୍ଥାନୀୟ ବିଧାୟକଙ୍କୁ ଅବଗତ କରିଥିଲେ Iମାନ୍ୟବର ବିଧାୟକ ଚାଷୀମାନଙ୍କ ସହ ଏ ବିଷୟରେ ପୁଙ୍ଖାନୁପୁଙ୍ଖ ଆଲୋଚନା କରି ଆଗାମୀ ଦିନରେ ଏହାର ସମାଧାନ ପାଇଁ ପଦକ୍ଷେପ ନେବେ ବୋଲି କହିଥିଲେ । ସେ ଚାଷୀ ମାନଙ୍କୁ ଅଧିକ ସଂଖ୍ୟାରେ ଗୋପାଳନ କରି ସରକାରଙ୍କ କାମଧେନୁ ଯୋଜନାରେ ଲାଭ ଉଠାଇବାକୁ ପରାମର୍ଶ ଦେଇଥିଲେ। ବୁଲା ଗାଈଗୋରୁ ଙ୍କ ଥଇଥାନ ପାଇଁ ଗୋଶାଳା ସ୍ଥାପନା ପାଇଁ ରହିଥିବା ସରକାରୀ ରିହାତି ଉପରେ ଆଲୋଚନା କରିଥିଲେl ସମ୍ମାନିତ ଅତିଥି ଭାବରେ ପୂର୍ବତନ ଜିଲ୍ଲା ମୁଖ୍ୟ ପ୍ରାଣୀ ଚିକିତ୍ସା ଅଧିକାରୀ ଡ. ଦିଲ୍ଲୀପ କୁମାର ପଣ୍ଡା  ନିଜର ମତ ବ୍ୟକ୍ତ କରି ଗୋପାଳନ ତଥା ଅନ୍ୟାନ୍ୟ ପ୍ରାଣୀପାଳନ କ୍ଷେତ୍ରରେ ବୈଷୟିକ ଜ୍ଞାନ କୌଶଳର ପ୍ରୟୋଗ,ଜୈବିକ କୃଷି ପାଇଁ ଗୋପାଳନ,ଗୋମୂତ୍ର ଓ ଗୋବର ଆଧାରିତ ଶିଳ୍ପ ଉପରେ ଆଲୋଚନା କରିଥିଲେ I ଅନ୍ୟମାନଙ୍କ ମଧ୍ୟରେ ଅତିରିକ୍ତ ଜିଲ୍ଲା ପ୍ରାଣୀ ଚିକିତ୍ସା  ଅଧିକାରୀ ଡ .ସୁଶାନ୍ତ କୁମାର ନାୟକ  ଓଡ଼ିଶାରେ କ୍ଷୀର,ମାଂସ,ଅଣ୍ଡା ଉତ୍ପାଦନ ବୃଦ୍ଧି ପାଇଁ ଚାଲିଥିବା ଯୋଜନା ବିଶେଷ କରି ମୁଖ୍ୟମନ୍ତ୍ରୀ କାମଧେନୁ ଯୋଜନା ,ପ୍ରାଣୀସମ୍ପଦ ସମ୍ୱବୃଦ୍ଧି ଯୋଜନା,ପ୍ରାଣୀକଲ୍ୟାଣ  ଯୋଜନା ତଥା ପ୍ରାଣୀ ଚିକିତ୍ସା ସେବା ବ୍ୟବସ୍ଥାରେ ନୂତନ ବୈଷୟିକ ଜ୍ଞାନ କୌଶଳର ବ୍ୟବହାର ଉପରେ ଗୁରୁତ୍ୱ ଦେଇଥିଲେ I ଉକ୍ତ କାର୍ଯକ୍ରମରେ  ଗୋପାଳନ କ୍ଷେତ୍ରରେ ଉନ୍ନତ ଯନ୍ତ୍ରପାତିର ବ୍ୟବହାର ,ରିହାତି ବ୍ୟବସ୍ଥାରେ ସରଳୀକରଣ,ଦୁଗ୍ଧ ସର୍ବନିମ୍ନ ସହାୟକ  ମୂଲ୍ୟ ଧାର୍ଯ୍ୟ,ଗୋଖାଦ୍ୟ ଓ ପ୍ରକ୍ରିୟାକରଣ କୁ ଗୁରୁତ୍ୱ  ଦେବା ଉପରେ ସାଧାରଣରେ ମତ ପ୍ରକାଶ ପାଇଥିଲା I ପରେ ପରେ ମୁଖ୍ୟମନ୍ତ୍ରୀ କାମଧେନୁ ଯୋଜନା ଉପରେ ଏକ ସବିଶେଷ କାର୍ଯକ୍ରମ ପ୍ରଦର୍ଶିତ କରାଯାଇଥିଲା । ଏଥିରେ ଗୋପାଳନ,ମହିଷୀ ପାଳନ,ବୀମାକରଣ,ଘାସ ଚାଷ ଉପରେ ରହିଥିବା ବିଭିନ୍ନ ରିହାତି ଯୋଜନା ସମ୍ବନ୍ଧରେ ବିସ୍ତୃତ ଭାବରେ ଚାଷୀ ଭାଇ ମାନଙ୍କୁ ଅବଗତ କରiଯାଇଥିଲା।
 ଉକ୍ତ କାର୍ଯକ୍ରମକୁ   ପ୍ରାଣୀ ଚିକତ୍ସା ଅଧିକାରୀ ଡ. ମୀଲି ପାଣ୍ଡେ ପରିଚାଳନା କରିଥିଲେ I ଏହି କାର୍ଯକ୍ରମକୁ ସାଫଲ୍ୟ ମଣ୍ଡିତ କରିବା ପାଇଁ ଜିଲ୍ଲାର ସମସ୍ତ  ପ୍ରାଣୀ ଚିକିତ୍ସକ ଓ  ବିଭାଗୀୟ  କର୍ମକର୍ତା ସହଯୋଗ କରିଥିଲେ I ପରିଶେଷରେ ପଦ୍ମପୁର ଉପଖଣ୍ଡ ପ୍ରାଣୀ ଚିକତ୍ସା ଅଧିକାରୀ ଡ. ଚନ୍ଦ୍ରକାନ୍ତ ପାଟ୍ଟଯୋଶୀ ସଭାରେ ଯୋଗ ଦେଇଥିବା ସମସ୍ତ ପ୍ରାଣୀ ଚିକିତ୍ସକ , ବିଭାଗୀୟ କର୍ମକର୍ତ୍ତା,ଚାଷୀ ଭାଇ ଭଉଣୀ  ତଥା ଗଣ ମାଧ୍ୟମ ପ୍ରତିନିଧିମାନଙ୍କୁ ଧନ୍ୟବାଦ ଅର୍ପଣ ପରେ ସଭା ସାଙ୍ଗ ହୋଇଥିଲା I