27-Mar-2025

ନୂଆଁପଡ଼ା(ପରମେଶ୍ୱର ମେହେର): ନୂଆପଡା ଜିଲ୍ଲାରେ ମୁଖ୍ୟମନ୍ତ୍ରୀ କାମଧେନୁ ଯୋଜନାରେ ମାଈ ବାଛୁରୀ ପାଳନର ଶୁଭାରମ୍ଭ ଆଜି ଜିଲ୍ଲାପାଳ ମଧୁସୂଦନ ଦାଶଙ୍କ ଦ୍ବାରା ତରବୋଡ ପ୍ରାଣୀ ଚିକିତ୍ସାଳୟ ପ୍ରାଙ୍ଗଣରେ ଆୟୋଜିତ ହୋଇଯାଇଛି। ଏହି ଉପଲକ୍ଷେ ଅନୁଷ୍ଠିତ ଏକ ପ୍ରଦର୍ଶନୀକୁ ଜିଲ୍ଲାପାଳ ଉଦ୍ଘାଟନ କରି 21 ଗୋଟି ମାଈ ବାଛୁରୀଙ୍କୁ ଦାନା ଖୁଆଇଥିଲେ । ଗୋପାଳକ ମାନଙ୍କ ଏହି ସଚେତନତା ସଭାରେ ବଲାଙ୍ଗିର କଳାହାଣ୍ଡି ନୂଆପଡା ଦୁଗ୍ଧ ଉତ୍ପାଦକ ସମବାୟ ସଂଘର ସାଧାରଣ ପରିଚାଳକ ଡଃ ରଜନୀକାନ୍ତ ପଣ୍ଡା ସ୍ବାଗତ ସମ୍ଭାଷଣ ପ୍ରଦାନ ପୂର୍ବକ ସରକାରଙ୍କ ଏହି ବହୁ ଆଦୃତ ଯୋଜନାର ଆଭିମୁଖ୍ୟ ଓ ରୂପରେଖ ସମ୍ଵନ୍ଧରେ ସବିଶେଷ ବିବରଣୀ ପ୍ରଦାନ କରିଥିଲେ । ସଭାର ସଭାପତି ଜିଲ୍ଲା ମୁଖ୍ୟ ପ୍ରାଣୀ ଚିକିତ୍ସାଧିକାରୀ ଡଃ ଆଲୋକ କୁମାର ନାୟକ ସଭାକାର୍ଯ୍ୟ ପରିଚାଳନା କରିଥିଲେ। ସେ ସ୍ଵଳ୍ପ ଖର୍ଚ୍ଚରେ ଉତ୍ତମ ସୁସ୍ୱାଦ ଗୋଖାଦ୍ୟ ପ୍ରଦାନ , ନିରନ୍ତର ସ୍ବାସ୍ଥ୍ୟ ପରୀକ୍ଷା ଓ ସମୟୋଚିତ ଟିକା ପ୍ରଦାନ ଦ୍ବାରା ମାଈ ବାଛୁରୀ କିପରି ଭବିଷ୍ୟତରେ ଉତ୍ତମ ଗାଈରେ ପରିଣତ ହେବ ସେଇ ବିଷୟରେ ସୂଚନା ଦେଇଥିଲେ। ମୁଖ୍ୟ ଅତିଥି ଜିଲ୍ଲାପାଳ କୃଷକ ମାନଙ୍କୁ ସମ୍ବୋଧନ କରି ଜିଲ୍ଲାରେ ଗୋପାଳନର ପର୍ଯ୍ୟାପ୍ତ ସୁଯୋଗ ଥିବା ଦର୍ଶାଇଥିଲେ। ଏହାଦ୍ବାରା ପାରିବାରିକ ତଥା ଗ୍ରାମୀଣ ଅର୍ଥନୀତି ସୁଦୃଢ଼ ହେବ । ଲୋକେ ସୁବିଧାରେ ତଟକା ଦୁଧ ପାଇବା ଦ୍ବାରା ପ୍ରାଣୀଜ ପୃଷ୍ଟି ପାଇ ପାରିବେ । ଏହା ସହିତ ଉଦ୍ୟାନ କୃଷି, ପନିପରିବା ଚାଷ , ଅର୍ଥକାରି ଅଣଧାନ ଚାଷ, ମତ୍ସ୍ୟ ପାଳନ ମାଧ୍ଯମରେ ରୋଜଗାର ବୃଦ୍ଧି କରିବା ପାଇଁ ପ୍ରୋତ୍ସାହିତ କରିଥିଲେ। କୃଷକ ଶ୍ରମିକ ମାନଙ୍କୁ ଏବେ ସୁବିଧାରେ ବ୍ୟାଙ୍କ୍ ମାନେ ଋଣ ଯୋଗାଇ ଦେଉଥିବାରୁ

ସମସ୍ତେ ଏହାର ଲାଭ ଉଠାନ୍ତୁ । ପ୍ରବାସୀ ଶ୍ରମିକ ହିସାବରେ ଅନ୍ୟ ରାଜ୍ୟକୁ ନଯାଇ ଘର ପାଖରେ ମନରେଗା ଯୋଜନାରେ କାମ କରିବା ସହିତ ଏହି ସବୁ ସମନ୍ୱିତ ଚାଷ କରି ସମସ୍ତେ ଲକ୍ଷପତି ହୁଅନ୍ତୁ। ଜିଲ୍ଲା କୁ ସମସ୍ତେ ମିଶି ପ୍ରବାସୀ ଶ୍ରମିକ ମୁକ୍ତ ଜିଲ୍ଲା କରି ପାରିବା ବୋଲି କହିଥିଲେ। ଅନ୍ୟତମ ସମ୍ମାନୀତ ଅତିଥି ଭାବରେ କୋମନା ବିଡ଼ିଓ ବିନୟ କୁମାର୍ ଭୋଇ, ତରବୋଡ ସରପଞ୍ଚ ଶ୍ୟାମ ସୁନ୍ଦର ପୃଷ୍ଟି ଉପସ୍ଥିତ ଶତାଧିକ ଚାଷି ମାନଙ୍କୁ ଗୋପାଳନର ଉପଯୋଗୀତା ସମ୍ଵନ୍ଧରେ ବୁଝାଇଥିଲେ । ଅତିରିକ୍ତ ଜିଲ୍ଲା ପ୍ରାଣୀ ଚିକିତ୍ସାଧିକାରୀ ଡଃ ଶାରଦା ପ୍ରସାଦ ସିଂ ବରିହା ଧନ୍ୟବାଦ ଅର୍ପଣ କରିଥିଲେ। ବିଭାଗୀୟ ଅଧିକାରୀ ଡଃ ଲୀଳାମୟ ସାହୁ, ଡଃ ବିକାଶ ଭୋଇ  ଓ ଦୁଗ୍ଧ ଉତ୍ପାଦକ ସଂଘର ଦେବବ୍ରତ ମିଶ୍ର,ସରୋଜ କୁମାର ବେହେରା, ଟିକେଲାଲ ରାଉତ ପ୍ରମୁଖ ଶିବିର ପରିଚାଳନାରେ ସହଯୋଗ କରିଥିଲେ।