22-Mar-2025

ରେଢ଼ାଖୋଲ:  ସମ୍ବଲପୁର ଜିଲ୍ଲା ନାକଟିଦେଉଳ ବ୍ଲକ କିସିଣ୍ଡା ଥାନା ଅନ୍ତର୍ଗତ ଗଞ୍ଜାବାହାଲ ଗ୍ରାମରେ ଶନିବାର ସ୍ପଷ୍ଟ ଦିବା ଲୋକରେ ରାସ୍ତା ଉପରେ ଏକ ଜଘନ୍ୟ ହତ୍ୟାକାଣ୍ଡ ଘଟି ଯାଇଛି l ସମୁଦିର ଟାଙ୍ଗିଆ ଚୋଟରେ ଚାଲି ଯାଇଛି ସମୁଦିର ଜୀବନ l ମୃତକ ଜଣଙ୍କ ହେଲେ ଗଞ୍ଜାବାହାଲ ଗ୍ରାମର ମୁରଲୀଧର ଧଳ l ସୂଚନା ଅନୁସାରେ ଗତ ପ୍ରାୟ ତିନି ବର୍ଷ ତଳେ ମୁରଲୀଧର ଧଳଙ୍କ ପୁଅ କେଲୋ ଗ୍ରାମର ଗିରିଧାରୀ ସାହୁଙ୍କ ଝିଅକୁ ପ୍ରେମ ବିବାହ କରିଥିଲେ l ତେବେ ଏହି ବିବାହକୁ ଗିରିଧାରୀ ସେହି ସମୟରେ ବିରୋଧ କରିଥିଲେ l ଏପରିକି ବିବାହ ପରେ ଗିରିଧାରୀ ସମୁଦି ମୁରଲୀଧରଙ୍କୁ ବିଭିନ୍ନ ସମୟରେ ଜୀବନରେ ମାରିଦେବାକୁ ଧମକ ଚମକ ଦେଇ ଆସୁଥିଲା l ତେବେ ଶନିବାର ମଧ୍ୟାହ୍ନ ପ୍ରାୟ ସାଢେ 12 ଟା ସମୟରେ ମୁରଲୀଧର ଧଳ ନିଜର ବାଇକ ରେ ଏକାକୀ କଞ୍ଚନପୁର ପଟରୁ ଘରକୁ ଫେରୁଥିବା ବେଳେ ନୂତନ ଗଞ୍ଜାବାହାଲ ପ୍ରାଥମିକ ସ୍କୁଲ ସମ୍ମୁଖରେ ପୂର୍ବରୁ ଛକି ରହିଥିବା ଗିରିଧାରୀ ମୁରଲୀଧର ଧଳଙ୍କ ଉପରେ ଚୋଟ ପରେ ଚୋଟ ପକାଇ ହତ୍ୟା କରିଥିଲେ l ମୁରଲୀଙ୍କ ଡାହାଣ ପାଖ  ଛାତି, ବେକ ଏବଂ ଜଙ୍ଘ ରେ ଚୋଟ ବାଜିଛି l ଖବର ପାଇ କିସିଣ୍ଡା ପୋଲିସ ଘଟଣା ସ୍ଥଳରେ ପହଞ୍ଚି ମୃତ ଦେହକୁ ଜବତ କରି ଘଟଣାର ତଦନ୍ତ ଚଳାଇଛି l ଅନ୍ୟ ପକ୍ଷରେ ଏହି ଘଟଣାରେ ହତ୍ୟାକାରୀ ଗିରିଧାରୀ ସାହୁଙ୍କୁ ଗିରଫ କରି ପୋଲିସ ପଚରା ଉଚୁରା କରୁଥିବା ଜଣାପଡିଛି l