12-Feb-2025

ବଲାଙ୍ଗୀର (ପ୍ରେରଣା ଖବର)- ସୁନ୍ଦରଗଡ ଜିଲ୍ଲା ବଣେଇ ଉପଖଣ୍ଡରେ ଅନୁଷ୍ଠିତ ଓଡିଶା ଲୋକକଳା ଉତ୍ସବ ତିନି ଦିନ ଧରି ମହାଆଡମ୍ବରରେ ହୋଇ ଚାଲିଥିବା ସମୟରେ ବଲାଙ୍ଗିର ର ଜଣାଶୁଣା କଳାକାର ତଥା ସଙ୍ଗୀତ ବିଦ୍ୟାଳୟ 'ପଞ୍ଚମ'ର ଅଧ୍ୟକ୍ଷ ମୁରଲି ପତି ସମ୍ମାନିତ ଅତିଥି ଭାବେ ଯୋଗଦାନ ପୂର୍ବକ ଉତ୍ସାବ କମିଟି ତରଫରୁ ସମ୍ବର୍ଦ୍ଧିତ ହୋଇଛନ୍ତି l ଗତ ୧୦. ୦୨. ୨୦୨୫  ରବିବାର ଏକ ବର୍ଣ୍ଣାଢ୍ୟ ପରିବେଶରେ ସହସ୍ରାଧିକ ଦର୍ଶକଙ୍କ ଗହଣରେ ବଣେଇ ବିଧାୟକ ଲକ୍ଷ୍ମଣ ମୁଣ୍ଡାଙ୍କ ଉପସ୍ଥିତିରେ ତାଙ୍କୁ ମାନପତ୍ର ଓ ଉପଢୌକନ ଦେଇ  ସମ୍ମାନିତ  କରାଯାଇ ଥିଲା l ପ୍ରତିଉତ୍ତରରେ ବଣେଇ ଭଳି ଉପାନ୍ତ ଅଂଚଳରେ ପ୍ରତ୍ୟେକ ବର୍ଷ ଏହିଭଳି କାର୍ଯ୍ୟକ୍ରମ ଆୟୋଜନ କରାଯାଉଥିବାରୁ ଅଞ୍ଚଳର ଲୁପ୍ତପ୍ରାୟ କଳାର ପୁନର୍ଜୀବିତ କରିବାରେ ଅତ୍ୟନ୍ତ ସହାୟକ ହୋଇପାରିବ ତଥା ଓଡିଶାର ବିଭିନ୍ନ ପ୍ରାନ୍ତର ଲୋକକଳା ସହ ପରିଚିତ ହୋଇ  ଲୋକେ ଉପଭୋଗ କରି ପାରିବେ ବୋଲି  ମତବ୍ୟକ୍ତ କରିଥିଲେ l  ଅନୁଷ୍ଠାନ ତାଙ୍କୁ ସମ୍ବର୍ଦ୍ଧିତ କରିଥିବାରୁ ଶ୍ରୀ ପତି କର୍ମକର୍ତା ଓ ବଣେଇର ଜନସାଧାରଣକୁ ଧନ୍ୟବାଦ ଜ୍ଞାପନ କରିଥିଲେ l ଅନୁଷ୍ଠାନର ସଭାପତି ପଦ୍ମଚରଣ ଆଚାର୍ଯ୍ୟ ସଭାପତିୟ  ଅଭିଭାଷଣ ରଖିଥିବା ବେଳେ କଳାକାର ରମେଶ ସୁନା ସଂଚାଳନ କରିଥିଲେ l ସୂଚନାଯୋଗ୍ୟ ଯେ, ପ୍ରତ୍ୟେକ ବର୍ଷ ଏହି କାର୍ଯ୍ୟକ୍ରମ ତିନିଦିନ ବ୍ୟାପି ସକାଳ ୧୦ଘଣ୍ଟା ରୁ ଆରମ୍ଭ ହୋଇ ରାତ୍ର ୧୦ଘଣ୍ଟା ପର୍ଯ୍ୟନ୍ତ ଜାକଜମକରେ ପାଳିତ ହୋଇଥାଏ l ଓଡ଼ିଶାର କୋଣଅନୁକୋଣରୁ ବଛାବଛା ନୃତ୍ୟ ଓ ସଙ୍ଗୀତ ଦଳମାନ ଯୋଗଦାନ ପୂର୍ବକ କାର୍ଯ୍ୟକ୍ରମ ପରିବେଷଣ କରିଥାନ୍ତି l