11-Feb-2025

 ବିନିକା(ହିମାଂଶୁ ଶେଖର ପୁଟେଲ) ପାପ ମୁକ୍ତିର ସମ୍ଭାର ପୁଣ୍ୟପୀଠ ପାପକ୍ଷୟ ଘାଟ ।ଏହାର ଐତିହାସିକ କିମ୍ବଦନ୍ତୀ ଅନନ୍ୟ ।ରାଜା ଦ୍ଵିତୀୟ ଅନଙ୍ଗ ଭୀମଦେବ ଏହି ଘାଟରେ ବୁଡ଼ ପକାଇ ପାପ ରୁ ମୁକ୍ତି ପାଇଥିଲେ ।ସେହିଦିନ ପରଠାରୁ ଏହି ମୁକ୍ତି ତୀର୍ଥରେ ଯିଏ ବି ବୁଡ଼ ପକାଇବ ତାର ପାପ କ୍ଷୟ ହୋଇ ଥାଏ ବୋଲି ବିଶ୍ୱାସ ରହିଥିବାରୁ ଏହାର ନାମକରଣ ହୋଇଛି ମୁକ୍ତିତୀର୍ଥ ପାପକ୍ଷୟ ଘାଟ ।ଏହି ଘାଟ ତଥା ଏହି ପୀଠର ପ୍ରଚାର ପ୍ରସାର ପାଇଁ ଓ ଅଞ୍ଚଳର ସଂସ୍କୃତିକୁ ବଞ୍ଚାଇ ରଖିବା ନେଇ ଅଞ୍ଚଳର କଳାପ୍ରେମୀ ମାନଙ୍କ ଦ୍ଵାରା ଆରମ୍ଭ ହୋଇ ଆସୁଥିବା ପାପକ୍ଷୟ ଲୋକ ମହୋତ୍ସବ ଏଥର ପଞ୍ଚମ ବର୍ଷରେ ପଦାର୍ପଣ କରିଛି।ଆଜି ମଙ୍ଗଳବାର ୧୧ତାରିଖ ଠାରୁ ୧୪ ତାରିଖ ଶୁକ୍ରବାର ପର୍ଯ୍ୟନ୍ତ ୪ଦିନ ଧରି ଅନୁଷ୍ଠିତ ହେବ ଏହି ମହୋତ୍ସବ ।କଳାକାର ମାନଙ୍କ ସମାବେଶରେ ବିନିକା ସହର ଦୁଲକିବ ।ଅଞ୍ଚଳର କଳାପ୍ରେମୀ ଯୁବକ ମାନେ ମଶାଲ ଧରି ପ୍ରାରମ୍ଭରେ ପୁଣ୍ୟପୀଠ ଠାରୁ ଏକ ବାଇକ ଶୋଭାଯାତ୍ରାରେ ବିନିକା ର ଇଷ୍ଟଦେବୀ ମାଁ ନାରାୟଣୀ ମନ୍ଦିରକୁ ପହଞ୍ଚିବେ।ସେଠାରେ ଯଥାରୀତି ପୂଜାର୍ଚ୍ଚନା ପୂର୍ବକ ସମସ୍ତ କଳାପ୍ରେମି ମାଁ ଙ୍କ ଆଶୀର୍ବାଦ ନେବେ ।ପରେ ବିନିକାର ପାଲା,ବାଡ଼ିଖେଲ, କଇନ୍ତରାର କରମା,କରତଙ୍ଗର ପରଭା,ସକମାର ସଞ୍ଚାର, ଚଡେଇପଙ୍କର ଘୁବୁକୁଡୁ ଆଦି ସାଂସ୍କୃତିକ ଅନୁଷ୍ଠାନ ସହିତ  ଅଞ୍ଚଳର ପ୍ରାୟ ୨୦୦ରୁ ଊର୍ଦ୍ଧ୍ବ କଳାକାର ପାଦରେ ଘୁଙ୍ଗୁର ସହ ପାରମ୍ପରିକ ବେଶଭୂଷାରେ ସଜ୍ଜିତ ହୋଇ ସରଞ୍ଜାମ ସହିତ ନାଚଗୀତରେ ବାହାରିବେ ।ଶୋଭାଯାତ୍ରା ସହର ପରିକ୍ରମା ପରେ ଡାକ୍ତରଖାନା ସମ୍ଭୁଖ ମହୋତ୍ସବ ମଞ୍ଚରେ ପହଞ୍ଚି ପୂଜାର୍ଚ୍ଚନା ହେବ।ସନ୍ଧ୍ୟାରେ ମଞ୍ଚ ଉଦ୍ଘାଟନ ହେବ।୪ଦିନ ଧରି ଅନୁଷ୍ଠିତ ଏହି ମୋହତ୍ସବର ବିଭିନ୍ନ ଦିବସରେ ସ୍ଥାନୀୟ ଲୁକ୍କାୟିତ ପ୍ରତିଭାଙ୍କ ପ୍ରଦର୍ଶନ ସହ ସୁବର୍ଣ୍ଣପୁର, ବୌଦ୍ଧ, ବଲାଙ୍ଗୀର,ବରଗଡ଼,ସମ୍ବଲପୁର,ଝାରସୁଗୁଡ଼ା,କଳାହାଣ୍ଡି,କୋରାପୁଟ,ଜୟପୁର,ପଦମପୁର,ଭୁବନେଶ୍ୱର ଆଦି ସ୍ଥାନର ସାଂସ୍କୃତିକ ଅନୁଷ୍ଠାନ ମାନଙ୍କ ଦ୍ଵାରା ଲୋକକଳା,ଲୋକନୃତ୍ୟ ପରିବେଷଣ କଲାପ୍ରେମୀଙ୍କୁ ବାନ୍ଧି ରଖିବ ।ସେହିପରି ପ୍ରଥମ କରି ଆୟୋଜିତ ପଲ୍ଲୀଶ୍ରୀ ମେଳା ଅଞ୍ଚଳବାସୀଙ୍କୁ ବେଶ ଆକର୍ଷିତ କରିବ ବୋଲି ଆଶା କରାଯାଉଛି।