11-Feb-2025

ଡେଲାଙ୍ଗ,ପୁରୀ ଜିଲ୍ଲା ଡେଲାଙ୍ଗ ବ୍ଲକ ଅନ୍ତର୍ଗତ ସୁଜନପୁର ଗ୍ରାମ ପଞ୍ଚାୟତ  କଅଁଳପଡା ଗ୍ରାମର ଆରାଧ୍ୟ ଦେବୀ ମା' ବରାହୀ ଖଣ୍ଡୁଆଳଙ୍କ ପୀଠରେ ପଞ୍ଚଦଶ ବାର୍ଷିକ ବିଶ୍ଵଶାନ୍ତି ମହାଯଜ୍ଞ  ଅନୁଷ୍ଠିତ ହୋଇଯାଇଛି।କଅଁଳପଡା ଗ୍ରାମବାସୀଙ୍କ ସହଯୋଗରେ ଅନୁଷ୍ଠିତ ଏହି ଧାର୍ମିକ କାର୍ଯ୍ୟରେ ଶ୍ରଦ୍ଧାଳୁମାନେ ଯୋଗଦେଇ ମା'ଙ୍କୁ ପୂଜାର୍ଚ୍ଚନା କରିବା ସହ ଆଶୀର୍ବାଦ ଭିକ୍ଷା କରିଥିଲେ।ଏଥିରେ ଅଭିମନ୍ୟୁ ସାହୁ ଓ ତାଙ୍କ ଧର୍ମପତ୍ନୀ ଲିଲି ସାହୁ ଯଥାକ୍ରମେ କର୍ତ୍ତା ଓ କର୍ତ୍ତୀ ଭାବେ ଦାୟିତ୍ୱ ନିର୍ବାହ

କରିଥିଲେ।ଗ୍ରାମର ୧୨ଜଣ ବ୍ରତୀ ସଙ୍କଳ୍ପ କରି ନିକଟସ୍ଥ ପଦନପଡା ପୁଷ୍କରିଣୀରୁ ଜଳଭରା କଳସ ଆଣି ଗ୍ରାମ ପରିକ୍ରମା କରିବା ପରେ ଯଥାବିଧି ଯଜ୍ଞ ମଣ୍ଡପରେ କଳସ ସ୍ଥାପନ କରିଥିଲେ।ପୁରୋଧା ଭାବେ ପଣ୍ଡିତ ମଦନ ମୋହନ ମିଶ୍ର, ପୂଜକ ଚନ୍ଦ୍ରମଣି ରଣା ଓ ସାଥିମାନେ ଯୋଗଦେଇ ଯଥାରୀତି ପୂଜା କାର୍ଯ୍ୟ ତୁଲାଇଥିଲେ।ଶୁକ୍ରବାର ଅଙ୍କୁରାରୋପଣ କାର୍ଯ୍ୟ

ସମ୍ପନ୍ନ ହେବା ପରେ ଶନିବାର ଜଳଯାତ୍ରା କଳସ  ସ୍ଥାପନ,ଯଜ୍ଞାଧିବାସ,ଶାଲାମଣ୍ଡନ,ସର୍ଵ ଦେବାଦେବୀ ଆବାହନ, ସୂର୍ଯ୍ୟପୂଜା, ଗୋପୂଜା,ରୁଦ୍ରାଭିଷେକ, ସପ୍ତଶତ ଚଣ୍ଡୀ ପାଠ,ମା"ଙ୍କ ଶୋଡ଼ଷ ଉପଚାର ପୂଜା,ଅଗ୍ନିସ୍ଥାପନ କାର୍ଯ୍ୟ ସମ୍ପାଦନ ହୋଇଥିଲା। ସୋମବାର ସନ୍ଧ୍ୟାରେ ଯଜ୍ଞର ପୂର୍ଣାହୂତି କାର୍ଯ୍ୟ ସମ୍ପନ୍ନ ହୋବା ସହ ସମସ୍ତଙ୍କ ପାଇଁ ପ୍ରସାଦ ସେବନ ବ୍ୟବସ୍ଥା ହୋଇଥିଲା । ପ୍ରତିବର୍ଷ  ଖଣ୍ଡୁଆଳ ପୀଠରେ କଅଁଳପଡା ଗ୍ରାମବାସୀବୃନ୍ଦଙ୍କ ସହଯୋଗରେ ଏହି ବିଶ୍ଵଶାନ୍ତି ଯଜ୍ଞ ଅନୁଷ୍ଠିତ ହୋଇ ଆସୁଅଛି ।